ਪਠਾਨਕੋਟ:
ਬੇਸ਼ੱਕ ਕਰੋਨਾ ਵਾਇਰਸ ਦਾ ਹੁਣ ਤੱਕ ਇਲਾਜ਼ ਪਰੋਪਰ ਤੌਰ ‘ਤੇ ਲੱਭ ਨਹੀਂ ਸਕਿਆ, ਪਰ ਫਿਰ ਵੀ ਕਈ ਲੋਕ ਸਾਵਧਾਨੀਆਂ ਵਰਤ ਕੇ ਇਸ ਬਿਮਾਰੀ ਤੋਂ ਠੀਕ ਹੋ ਰਹੇ ਹਨ। ਪਰ ਜਿਹੜੇ ਵੀ ਮਰੀਜ਼ ਠੀਕ ਹੋ ਰਹੇ ਹਨ, ਉਨ੍ਹਾਂ ਨੂੰ ਜੇਕਰ ਹੋਰ ਕੋਈ ਬਿਮਾਰੀ ਕੋਰੋਨਾ ਤੋਂ ਪਹਿਲੋਂ ਚੰਭੜੀ ਹੋਈ ਹੈ ਤਾਂ, ਉਕਤ ਮਰੀਜ਼ਾਂ ਦਾ ਨੁਕਸਾਨ ਹੋ ਰਿਹਾ ਹੈ। ਕਰੋਨਾ ਵਰਗੀ ਭਿਆਨਕ ਬਿਮਾਰੀ ਤੋਂ ਠੀਕ ਹੋਣ ਤੋਂ ਅਗਲੇ ਦਿਨ ਹੀ ਪਠਾਨਕੋਟ ਵਿਖੇ ਇੱਕ ਵਿਅਕਤੀ ਦੀ ਮੌਤ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ।
ਮਮੂਨ ਦੇ ਰਹਿਣ ਵਾਲੇ 35 ਸਾਲਾ ਆਟੋ ਚਾਲਕ ਜੈਪਾਲ ਨੇ 40 ਦਿਨਾਂ ਤੱਕ ਕੋਰੋਨਾ ਨਾਲ ਲੜਾਈ ਕੀਤੀ ਅਤੇ ਉਸ ਦੀ ਰਿਪੋਰਟ 17 ਮਈ ਨੂੰ ਨਕਾਰਾਤਮਕ ਆਈ ਸੀ। ਪਰ ਤੜਕੇ ਸਵੇਰੇ ਉਸ ਨੂੰ ਸਾਹ ਲੈਣ ਵਿਚ ਤਕਲੀਫ ਹੋਈ ਅਤੇ ਉਸ ਨੂੰ ਵੈਂਟੀਲੇਟਰ ‘ਤੇ ਪਾਉਣ ਦੇ 6 ਘੰਟਿਆਂ ਬਾਅਦ ਉਸ ਦੀ ਮੌਤ ਹੋ ਗਈ।
ਪਰਿਵਾਰ ਨੇ ਜੈਪਾਲ ਦੀ ਮੌਤ ਨੂੰ ਜੀਐਨਡੀਐਚ ਅੰਮ੍ਰਿਤਸਰ ਅਤੇ ਪਠਾਨਕੋਟ ਸਿਹਤ ਵਿਭਾਗ ਦੇ ਅਧਿਕਾਰੀਆਂ ਦੀ ਲਾਪਰਵਾਹੀ ਕਰਾਰ ਦਿੱਤਾ ਹੈ। ਪਰਿਵਾਰ ਦਾ ਕਹਿਣਾ ਹੈ ਕਿ ਜੈਪਾਲ ਨੂੰ ਕੋਰੋਨਾਵਾਇਰਸ ਨਹੀਂ ਹੋਇਆ ਸੀ, ਜਦੋਂਕਿ ਉਹ ਤਾਂ ਟੀ ਬੀ ਦਾ ਮਰੀਜ਼ ਸੀ। ਪਰ ਪ੍ਰਸ਼ਾਸਨ ਨੇ ਉਸ ਨੂੰ ਕੋਰੋਨਾ ਸੰਕਰਮਿਤ ਐਲਾਨ ਕਰ ਦਿੱਤਾ ਅਤੇ ਸਹੀ ਇਲਾਜ ਨਾ ਮਿਲ ਕਾਰਨ ਅੰਮ੍ਰਿਤਸਰ ਵਿਖੇ ਉਸ ਦੀ ਮੌਤ ਹੋ ਗਈ। ਜੈਪਾਲ ਪਹਿਲਾਂ ਹੀ ਟੀਬੀ ਦਾ ਮਰੀਜ਼ ਸੀ ਅਤੇ 4 ਮਹੀਨਿਆਂ ਤੋਂ ਇਕ ਨਿੱਜੀ ਹਸਪਤਾਲ ਵਿੱਚ ਜ਼ੇਰੇ ਇਲਾਜ ਸੀ।
ਛਾਤੀ ਵਿਚ ਇਨਫੈਕਸ਼ਨ ਕਾਰਨ ਉਸ ਨੂੰ ਸਾਹ ਲੈਣ ਵਿਚ ਦਿੱਕਤ ਆਈ, ਤਾਂ ਉਸ ਨੂੰ ਸਿਵਲ ਹਸਪਤਾਲ ਲਿਆਂਦਾ ਗਿਆ। ਜਿਥੇ ਉਸ ਦਾ ਸੈਂਪਲ ਲਿਆ ਗਿਆ। 40 ਦਿਨ ਪਹਿਲਾਂ ਰਿਪੋਰਟ ਸਕਾਰਾਤਮਕ ਆਈ, ਜਿਸ ਤੋਂ ਬਾਅਦ ਉਸ ਨੂੰ ਪਠਾਨਕੋਟ ਸਿਵਲ ਹਸਪਤਾਲ ਵਿਖੇ ਦਾਖਲ ਕਰਵਾਇਆ ਗਿਆ। ਪਰ ਵਿਗੜਦੀ ਸਥਿਤੀ ਵੇਖਦਿਆਂ ਅੰਮ੍ਰਿਤਸਰ ਦੇ ਸ੍ਰੀ ਗੁਰੂ ਨਾਨਕ ਦੇਵ ਜੀ ਹਸਪਤਾਲ ਰੈਫਰ ਕਰ ਦਿੱਤਾ ਗਿਆ।
ਜਿਥੇ ਉਸ ਦਾ ਇਲਾਜ ਚੱਲਿਆ ਅਤੇ 15 ਮਈ ਨੂੰ ਪਹਿਲੇ ਫੇਜ਼ ਦਾ ਸੈਂਪਲ ਲਿਆ, ਜਿਸ ਦੀ ਰਿਪੋਰਟ ਨੇ ਨੈਗੇਟਿਵ ਹੋਣ ‘ਤੇ ਦੂਜਾ ਸੈਂਪਲ ਲਿਆ। ਦੱਸ ਦਈਏ ਕਿ ਪੰਜਾਬ ਦੇ ਅੰਦਰ ਬਹੁਤ ਸਾਰੇ ਅਜਿਹੇ ਫਰਜ਼ੀ ਮਾਮਲੇ ਸਾਹਮਣੇ ਆ ਰਹੇ ਹਨ, ਜਿਸ ਦੇ ਵਿਚ ਇਹ ਸਾਫ਼ ਤੌਰ ‘ਤੇ ਸਪਸ਼ਟ ਹੋ ਰਿਹਾ ਹੈ ਕਿ ਕਰੋਨਾ ਨਾਲ ਪੀੜਤ ਲੋਕਾਂ ਦੀ ਰਿਪੋਰਟ ਨੈਗੇਟਿਵ ਹੋਣ ‘ਤੇ ਵੀ ਸਰਕਾਰੀ ਹਸਪਤਾਲਾਂ ਦੀਆਂ ਲੈਬਾਂ ਉਸ ਨੂੰ ਪਾਜੀਟਿਵ ਵਿਖਾ ਰਹੀਆਂ ਹਨ।