ਹੱਸਦੇ ਚਿਹਰੇ

ਦੇਖਣ ਨੂੰ ਤਾਂ ਭਾਵੇਂ 
ਹੱਸਦੇ ਚਿਹਰੇ ਨੇ 
ਤੂੰ ਕੀ ਜਾਣੇ 
ਕੀ ਕੀ ਜਰਦੇ ਫਿਰਦੇ ਆਂ 
ਵਿੱੱਚ ਸੌਗਾਤਾਂ ਭਾਵੇਂ 
ਦੁੱਖ ਹਜ਼ਾਰ ਮਿਲੇ 
ਫਿਰ ਵੀ ਸੱਜਣਾਂ 
ਰੌਣਕਾਂ ਵੰਡਦੇ ਫਿਰਦੇ ਆਂ …

 ਹੱਸਦੇ ਚਿਹਰੇ ਕੀਹਨੂੰ ਨੀ ਭਾਉਂਦੇ । ਇਹ ਇਕ ਖਾਸ ਕਲਾ ਹੁੰਦੀ ਐ , ਪਰ ਅੱਜ ਦੇ ਇਸ ਚਿੰਤਾਵਾਂ ਭਰੇ ਦੌਰ ਵਿੱੱਚ ਜਿਵੇਂ ਲੋਕ ਹੱਸਣਾ ਭੁੱਲਦੇ ਹੀ ਜਾ ਰਹੇ ਨੇ ।
  ਪਰ ਫਿਰ ਵੀ ਕੁਦਰਤ ਦੇ ਕੁਛ ਬਹੁ਼ਤ ਨੇੜਲੇ ਲੋਕ ਅੱਜ ਵੀ ਹੱਸਣਾ ਜਾਣਦੇ ਨੇ । ਅੰਦਰ ਭਾਵੇਂ ਸੌ ਦੁਸ਼ਵਾਰੀਆਂ ਹੋਣ ਪਰ ਉਹਨਾਂ ਦੇ ਚਿਹਰਿਆਂ ਦੀ ਰੌਣਕ ਕਦੇ ਫਿੱਕੀ ਨਹੀੰ ਪੈਂਦੀ । ਬਹੁ਼ਤ ਸਿਰੜੀ ਮਿਹਨਤੀ ਤੇ ਜ਼ਿੰਦਾ ਦਿਲ ਇਨਸਾਨ ਹੁੰਦੇ ਨੇ ਇਹ ਲੋਕ ਤੇ ਦੇਖਣ ਵਾਲੇ ਨੂੰ ਲੱਗਦਾ ਜਿਵੇਂ ਸਾਰੇ ਜਹਾਨ ਦੀਆਂ ਖ਼ੁਸ਼ੀਆ ਕੁਦਰਤ ਨੇ ਏਸ ਬੰਦੇ ਦੇ ਹੀ ਝੋਲੀ ਪਾਈਆ ਨੇ , ਤੇ ਕਈ ਇਹਨਾਂ ਨੂੰ ਦੇਖ ਕੇ ਹੀ ਸੜਦੇ ਰਹਿੰਦੇ ਨੇ ।
     ਇਹਨਾਂ ਹੱਸਦਿਆਂ ਚਿਹਰਿਆਂ ਨੂੰ ਥੋੜਾ ਟੋਹ ਕੇ ਵੇਖਿਆ ਜਾਵੇ ਤਾਂ ਇਹ ਅੰਦਰੋਂ ਬਹੁ਼ਤ ਟੁੱਟ ਚੁੱਕੇ ਲੋਕ ਨੇ ਪਰ ਫਿਰ ਵੀ ਮੁਸਕਰਾਹਟੀ ਨੂਰ ਕਿਧਰੇ ਜਾਣ ਨਹੀ ਦਿੱਤਾ । ਇਹ ਲੋਕ ਦੁਪਹਿਰਖਿੜੀ ਦੇ ਫੁੱਲਾਂ ਵਾਂਗ ਜ਼ਿੰਦਗੀ ‘ ਚ  ਆਈਆਂ ਧੁੱਪਾਂ ‘ ਚ ਵੀ  ਖਿੜੇ ਰਹਿੰਦੇ ਨੇ ਕਦੇ ਮੁਰਝਾਉਂਦੇ ਨਹੀ।
     ਪਰ ਕਿਤੇ ਨਾ ਕਿਤੇ ਲੋੜ ਹੁੰਦੀ ਐ ਕਿ ਇਹਨਾਂ ਹੱਸਦਿਆਂ ਚਿਹਰਿਆਂ ਪਿਛਲੇ ਦਰਦ ਦੇ ਭਾਰ ਨੂੰ ਹੌਲਾ ਕੀਤਾ ਜਾਵੇ ਕੁਦਰਤ ਕਰੇ ਇਹ ਰੌਣਕਾਂ ਵੰਡਣ ਵਾਲਿਆ ਦੇ ਚਿਹਰਿਆਂ ਵਾਂਗ ਰੂਹ ਨੂੰ ਵੀ ਚਮਕ ਮਿਲੇ !

ਸੀਪਿਕਾ