‌ਦੇਸ਼ ਮੇਰੇ ਵਿੱਚ

ਸ਼ਾਇਰ ਭੱਟੀ

ਦੇਸ਼ ਮੇਰੇ ਵਿੱਚ ਪੀਰ ਬੜੇ ਨੇ,
ਤਾਂ ਵੀ ਦਰਦ ਗੰਭੀਰ ਬੜੇ ਨੇ।

ਜਿਸ ਰਾਜੇ ਦਾ ਸਿੱਕਾ ਚਲਦਾ,
ਉਹਦੇ ਨਾਲ ਵਜ਼ੀਰ ਬੜੇ ਨੇ ।

ਬਾਹਰੋਂ ਚਿੱਟੀ ਚਾਦਰ ਵਰਗੇ,
ਦਾਗ਼ੀ ਅੰਦਰ ਜ਼ਮੀਰ ਬੜੇ ਨੇ ।

ਆਪਣੇ ਹੀ ਜਦ ਧੋਖਾ ਦੇਵਣ,
ਦਿਲ ‘ਤੇ ਪੈਂਦੇ ਚੀਰ ਬੜੇ ਨੇ ।

ਦਾਦ ਮਿਲੀ ਤੇ ਸ਼ਾਇਰ ਹੋ ਗਏ,
ਏਥੇ  ਗ਼ਾਲਿਬ , ਮੀਰ ਬੜੇ ਨੇ।

ਭਾਈਆਂ ਨੂੰ ਬਚਾਵਣ ਖਾਤਿਰ,
ਸਾਹਿਬਾਂ ਤੋੜੇ ਤੀਰ ਬੜੇ ਨੇ।

ਧਰਮ,ਰਾਜਨੀਤੀ,ਝੂਠੇ ਅਡੰਬਰ,
ਮਸਲੇ ਵਿਚ ਕਸ਼ਮੀਰ ਬੜੇ ਨੇ।

ਪੱਕੀ ਸਾਂਝ ਹੈ ਮੁਫ਼ਲਿਸੀ ਦੀ,
ਦਿਲ ਦੇ ਜੋ ਅਮੀਰ ਬੜੇ ਨੇ।

ਜਿਹੜੇ ਸੱਚ ਦਾ ਹੋਕਾ ਦਿੰਦੇ,
ਹੁੰਦੇ ਲੀਰੋ ਲੀਰ ਬੜੇ ਨੇ ।

ਕਿਉਂ ਝੂਠੇ ਹਾਸੇ ਹੱਸਦੈਂ ਭੱਟੀ,
ਤੇਰੇ ਵੀ ਨੈਣੀ ਨੀਰ ਬੜੇ ਨ।

ਤੇਰੇ ਵੀ ਨੈਣੀ ਨੀਰ ਬੜੇ ਨੇ…