Punjab News: 39 ਵਿਦਿਆਰਥੀਆਂ ਨਾਲ 23 ਲੱਖ ਰੁਪਏ ਦੀ ਠੱਗੀ
ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਦੋ ਮੁਲਾਜ਼ਮਾਂ ‘ਤੇ ਲੱਖਾਂ ਦੀ ਠੱਗੀ ਦਾ ਕੇਸ; 39 ਵਿਦੇਸ਼ੀ ਵਿਦਿਆਰਥੀਆਂ ਨੂੰ ਬਣਾਇਆ ਸ਼ਿਕਾਰ
ਮੋਹਾਲੀ/ਖਰੜ 30 ਅਪ੍ਰੈਲ 2026: ਚੰਡੀਗੜ੍ਹ ਯੂਨੀਵਰਸਿਟੀ ਵਿੱਚ ਵਿਦੇਸ਼ੀ ਵਿਦਿਆਰਥੀਆਂ ਦੀਆਂ ਫੀਸਾਂ ਹੜੱਪਣ ਦੇ ਮਾਮਲੇ ਵਿੱਚ ਪੁਲਿਸ ਨੇ ਯੂਨੀਵਰਸਿਟੀ ਦੇ ਦੋ ਮੁਲਾਜ਼ਮਾਂ ਖ਼ਿਲਾਫ਼ ਧੋਖਾਧੜੀ ਦਾ ਮਾਮਲਾ ਦਰਜ ਕੀਤਾ ਹੈ।
ਦੋਸ਼ੀਆਂ ਨੇ ਕਥਿਤ ਤੌਰ ‘ਤੇ 39 ਵਿਦੇਸ਼ੀ ਵਿਦਿਆਰਥੀਆਂ ਨਾਲ 23.7 ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ।
ਪੁਲਿਸ ਵੱਲੋਂ ਦਰਜ FIR ਅਨੁਸਾਰ ਮੁਲਜ਼ਮਾਂ ਦੀ ਪਛਾਣ ਦਾਨਿਸ਼ ਮਹਾਜਨ ਐਡਮਿਸ਼ਨ ਅਫਸਰ (ਵਾਸੀ ਗੁਰਦਾਸਪੁਰ), ਅਕਸ਼ੈ ਵੈਸਲੇ ਮੁਲਾਜ਼ਮ (ਵਾਸੀ ਪਠਾਨਕੋਟ) ਵਜੋਂ ਹੋਈ ਹੈ।
ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਇਹ ਮੁਲਾਜ਼ਮ ਵਿਦਿਆਰਥੀਆਂ ਨੂੰ ਗੁੰਮਰਾਹ ਕਰਕੇ ਫੀਸਾਂ ਯੂਨੀਵਰਸਿਟੀ ਦੇ ਅਧਿਕਾਰਤ ਖਾਤੇ ਦੀ ਬਜਾਏ ਆਪਣੇ ਨਿੱਜੀ ਬੈਂਕ ਖਾਤਿਆਂ ਵਿੱਚ ਜਮ੍ਹਾਂ ਕਰਵਾ ਲੈਂਦੇ ਸਨ।
ਭਰੋਸਾ ਜਿੱਤਣ ਲਈ ਉਹ ਵਿਦਿਆਰਥੀਆਂ ਨੂੰ ਯੂਨੀਵਰਸਿਟੀ ਦੀਆਂ ਜਾਅਲੀ ਰਸੀਦਾਂ ਵੀ ਜਾਰੀ ਕਰ ਦਿੰਦੇ ਸਨ।
ਇਸ ਤੋਂ ਇਲਾਵਾ, ਉਹ ਵਿਦਿਆਰਥੀਆਂ ਨੂੰ ਕੰਸਲਟੈਂਸੀ ਦੇ ਬਹਾਨੇ ਬਾਹਰੀ ਏਜੰਟਾਂ ਕੋਲ ਭੇਜ ਕੇ ਉੱਥੋਂ ਮੋਟਾ ਕਮਿਸ਼ਨ ਵੀ ਵਸੂਲਦੇ ਸਨ।
ਇਸ ਪੂਰੇ ਘਪਲੇ ਦਾ ਪਰਦਾਫਾਸ਼ 3 ਫਰਵਰੀ ਨੂੰ ਹੋਇਆ। ਇੱਕ ਨੇਪਾਲੀ ਵਿਦਿਆਰਥੀ ਨੇ ਜਦੋਂ ਆਪਣੇ ਪੋਰਟਲ ‘ਤੇ ਚੈੱਕ ਕੀਤਾ ਤਾਂ ਪਤਾ ਲੱਗਾ ਕਿ 2.1 ਲੱਖ ਰੁਪਏ ਭਰਨ ਦੇ ਬਾਵਜੂਦ ਉਸ ਦੀ ਟਿਊਸ਼ਨ ਅਤੇ ਹੋਸਟਲ ਫੀਸ ਅਜੇ ਵੀ ‘Unpaid’ ਦਿਖਾਈ ਦੇ ਰਹੀ ਸੀ।
ਜਦੋਂ ਮਾਮਲਾ ਯੂਨੀਵਰਸਿਟੀ ਪ੍ਰਬੰਧਕਾਂ ਕੋਲ ਪਹੁੰਚਿਆ ਤਾਂ ਜਾਂਚ ਦੌਰਾਨ ਵੱਡੀ ਠੱਗੀ ਸਾਹਮਣੇ ਆਈ।
ਸ਼ਿਕਾਇਤਕਰਤਾ ਸਚਿਨ ਗਿੱਲ ਦੀ ਸ਼ਿਕਾਇਤ ‘ਤੇ ਕਾਰਵਾਈ ਕਰਦਿਆਂ ਮੋਹਾਲੀ ਪੁਲਿਸ ਨੇ 25 ਅਪ੍ਰੈਲ ਨੂੰ ਖਰੜ ਥਾਣੇ ਵਿੱਚ ਵਿਸ਼ਵਾਸਘਾਤ ਅਤੇ ਧੋਖਾਧੜੀ (Fraud) ਦੀਆਂ ਧਾਰਾਵਾਂ ਤਹਿਤ ਕੇਸ ਦਰਜ ਕਰ ਲਿਆ ਹੈ।
ਯੂਨੀਵਰਸਿਟੀ ਅਧਿਕਾਰੀਆਂ ਨੇ ਭਰੋਸਾ ਦਿੱਤਾ ਹੈ ਕਿ ਉਹ ਪੀੜਤ ਵਿਦਿਆਰਥੀਆਂ ਦੇ ਪੈਸੇ ਵਾਪਸ ਦਿਵਾਉਣ ਲਈ ਹਰ ਸੰਭਵ ਕੋਸ਼ਿਸ਼ ਕਰ ਰਹੇ ਹਨ।
