ਵੱਡੀ ਖ਼ਬਰ: 12ਵੀਂ ਜਮਾਤ ਦੀ ਪ੍ਰੀਖਿਆ ‘ਚ ਨਕਲ ਕਰਵਾਉਂਦੀਆਂ 2 ਅਧਿਆਪਕਾਵਾਂ ਫੜੀਆਂ
ਸੋਨੀਪਤ ‘ਚ ਨਕਲ ਕਾਂਡ: 2 Woman ਅਧਿਆਪਕਾਂ ਰੰਗੇ ਹੱਥੀਂ ਕਾਬੂ- 24 ਵਿਦਿਆਰਥੀਆਂ ਨੂੰ ਵੱਖਰੇ ਕਮਰੇ ‘ਚ ਬਿਠਾ ਕੇ ਕਰਵਾਈ ਜਾ ਰਹੀ ਸੀ ਨਕਲ
ਸੋਨੀਪਤ 28 ਮਾਰਚ, 2026:
ਹਰਿਆਣਾ ਸਕੂਲ ਸਿੱਖਿਆ ਬੋਰਡ ਦੀਆਂ 12ਵੀਂ ਦੀਆਂ ਪ੍ਰੀਖਿਆਵਾਂ ਦੌਰਾਨ ਸੋਨੀਪਤ ਦੇ ਪਿੰਡ ਬਿਧਲਾਨ ਸਥਿਤ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿੱਚ ਸਮੂਹਿਕ ਨਕਲ ਦਾ ਇੱਕ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ।
ਬੋਰਡ ਚੇਅਰਮੈਨ ਦੀ ਸਪੈਸ਼ਲ ਰੈਪਿਡ ਐਕਸ਼ਨ ਫੋਰਸ (SRAF) ਨੇ ਛਾਪੇਮਾਰੀ ਕਰਕੇ ਦੋ ਮਹਿਲਾ ਅਧਿਆਪਕਾਂ ਨੂੰ ਨਕਲ ਕਰਵਾਉਂਦੇ ਹੋਏ ਰੰਗੇ ਹੱਥੀਂ ਫੜਿਆ ਹੈ।
ਵੱਖਰੇ ਕਮਰੇ ਵਿੱਚ ਚੱਲ ਰਹੀ ਸੀ ਨਕਲ ਦੀ ‘ਖੇਡ’
ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਜਦੋਂ ਪ੍ਰੀਖਿਆ ਦਾ ਸਮਾਂ ਖ਼ਤਮ ਹੋ ਗਿਆ ਅਤੇ ਬਾਕੀ ਵਿਦਿਆਰਥੀ ਕੇਂਦਰ ਛੱਡ ਚੁੱਕੇ ਸਨ, ਉਦੋਂ 24 ਵਿਦਿਆਰਥੀਆਂ ਨੂੰ ਇੱਕ ਵੱਖਰੇ ਕਮਰੇ ਵਿੱਚ ਬਿਠਾ ਕੇ ਨਕਲ ਕਰਵਾਈ ਜਾ ਰਹੀ ਸੀ।
ਸ਼ੁੱਕਰਵਾਰ ਨੂੰ 12ਵੀਂ ਜਮਾਤ ਦਾ ਭੂਗੋਲ (Geography) ਦਾ ਪੇਪਰ ਸੀ। ਦੁਪਹਿਰ 3:30 ਵਜੇ ਪ੍ਰੀਖਿਆ ਖ਼ਤਮ ਹੋਣ ਤੋਂ ਬਾਅਦ SRAF ਟੀਮ ਨੂੰ ਗੁਪਤ ਸੂਚਨਾ ਮਿਲੀ ਕਿ ਕੇਂਦਰ ਦੇ ਅੰਦਰ ਅਜੇ ਵੀ ਨਕਲ ਜਾਰੀ ਹੈ।
ਟੀਮ ਨਾਲ ਧੱਕਾ-ਮੁੱਕੀ ਕਰਕੇ ਭੱਜੀਆਂ ਮਹਿਲਾ ਅਧਿਆਪਕਾਂ
ਜਦੋਂ ਟੀਮ ਨੇ ਕਮਰੇ ਵਿੱਚ ਛਾਪਾ ਮਾਰਿਆ ਤਾਂ ਉੱਥੇ ਪੀ.ਜੀ.ਟੀ. ਹਿੰਦੀ ਮੰਜੂ ਦੇਵੀ, ਪੀ.ਜੀ.ਟੀ. ਸੰਸਕ੍ਰਿਤ ਵੀਣਾ ਕੁਮਾਰੀ ਅਤੇ ਚਪੜਾਸੀ ਨਵੀਨ ਕੁਮਾਰ 24 ਵਿਦਿਆਰਥੀਆਂ ਨੂੰ ਨਕਲ ਕਰਵਾ ਰਹੇ ਸਨ।
ਟੀਮ ਨੂੰ ਦੇਖਦਿਆਂ ਹੀ ਕਮਰੇ ਵਿੱਚ ਹੜਕੰਪ ਮਚ ਗਿਆ। ਦੋਵੇਂ ਮਹਿਲਾ ਅਧਿਆਪਕਾਂ ਆਪਣਾ ਮੂੰਹ ਛੁਪਾ ਕੇ ਅਤੇ ਟੀਮ ਨਾਲ ਧੱਕਾ-ਮੁੱਕੀ ਕਰਕੇ ਮੌਕੇ ਤੋਂ ਫ਼ਰਾਰ ਹੋ ਗਈਆਂ। ਉਹ ਆਪਣੇ ਮੋਬਾਈਲ ਫ਼ੋਨ ਵੀ ਨਾਲ ਲੈ ਗਈਆਂ।
ਸਖ਼ਤ ਕਾਰਵਾਈ ਦੀ ਸਿਫ਼ਾਰਸ਼/ ਸਿੱਖਿਆ ਤੰਤਰ ‘ਤੇ ਸਵਾਲ
ਸਾਰੇ 24 ਵਿਦਿਆਰਥੀਆਂ ਵਿਰੁੱਧ ਯੂ.ਐਮ.ਸੀ. (UMC) ਦਰਜ ਕੀਤਾ ਗਿਆ ਹੈ। ਦੋਵਾਂ ਮਹਿਲਾ ਅਧਿਆਪਕਾਂ ਅਤੇ ਚਪੜਾਸੀ ਵਿਰੁੱਧ ਐਫ.ਆਈ.ਆਰ. (FIR) ਦਰਜ ਕਰਨ ਦੀ ਸਿਫ਼ਾਰਸ਼ ਕੀਤੀ ਗਈ ਹੈ।
ਬੋਰਡ ਚੇਅਰਮੈਨ ਡਾ. ਪਵਨ ਕੁਮਾਰ ਸ਼ਰਮਾ ਨੇ ਕਿਹਾ ਕਿ ਇਹ ਬੇਹੱਦ ਗੰਭੀਰ ਮਾਮਲਾ ਹੈ ਅਤੇ ਪੁਲਿਸ ਸ਼ਿਕਾਇਤ ਦੇ ਨਾਲ-ਨਾਲ ਵਿਭਾਗੀ ਕਾਰਵਾਈ ਦੇ ਨਿਰਦੇਸ਼ ਵੀ ਦਿੱਤੇ ਗਏ ਹਨ।
ਸੋਨੀਪਤ ਵਿੱਚ ਸਮੂਹਿਕ ਨਕਲ ਦਾ ਇਹ ਦੂਜਾ ਵੱਡਾ ਮਾਮਲਾ ਹੈ। ਜਦੋਂ ਗੁਰੂ ਕਹਾਉਣ ਵਾਲੇ ਅਧਿਆਪਕ ਹੀ ਨਿਯਮਾਂ ਦੀਆਂ ਧੱਜੀਆਂ ਉਡਾਉਣ ਲੱਗ ਪੈਣ, ਤਾਂ ਪ੍ਰੀਖਿਆ ਪ੍ਰਣਾਲੀ ਦੀ ਭਰੋਸੇਯੋਗਤਾ ‘ਤੇ ਵੱਡੇ ਸਵਾਲੀਆ ਚਿੰਨ੍ਹ ਲੱਗ ਜਾਂਦੇ ਹਨ।
ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਨਵੀਨ ਗੁਲੀਆ ਨੇ ਸਪੱਸ਼ਟ ਕੀਤਾ ਹੈ ਕਿ ਦੋਸ਼ੀ ਕਰਮਚਾਰੀਆਂ ਵਿਰੁੱਧ ਮਿਸਾਲੀ ਕਾਰਵਾਈ ਕੀਤੀ ਜਾਵੇਗੀ।
