ਵੱਡੀ ਖ਼ਬਰ: ਤਲਵਾਰ ਵਾਲਾ ‘ਪਾਖੰਡੀ ਬਾਬਾ’ ਗ੍ਰਿਫ਼ਤਾਰ! ਅੰਧਵਿਸ਼ਵਾਸ ਦਾ ਫੈਲਾਉਂਦਾ ਸੀ ਜਾਲ
‘ਜਾਦੂ-ਟੂਣਾ ਵਿਰੋਧੀ ਕਾਨੂੰਨ’ ਤਹਿਤ ਮਾਮਲਾ ਦਰਜ; ਪੁਲਿਸ ਨੇ ਛਾਪੇਮਾਰੀ ਦੌਰਾਨ ਸ਼ੱਕੀ ਸਮੱਗਰੀ ਕੀਤੀ ਬਰਾਮਦ
Punjab Network
ਨਾਂਦੇੜ (ਮਹਾਰਾਸ਼ਟਰ) 03 ਅਪ੍ਰੈਲ 2026 –
ਮਹਾਰਾਸ਼ਟਰ ਦੇ ਨਾਂਦੇੜ ਜ਼ਿਲ੍ਹੇ ਵਿੱਚ ਖ਼ੁਦ ਨੂੰ ਦੈਵੀ ਸ਼ਕਤੀਆਂ ਵਾਲਾ ਦੱਸ ਕੇ ਭੋਲੇ-ਭਾਲੇ ਲੋਕਾਂ ਨੂੰ ਠੱਗਣ ਵਾਲੇ ‘ਤਲਵਾਰ ਬਾਬਾ’ ਨੂੰ ਪੁਲਿਸ ਨੇ ਸਲਾਖਾਂ ਪਿੱਛੇ ਭੇਜ ਦਿੱਤਾ ਹੈ। ਮੁਲਜ਼ਮ ‘ਤੇ ਅੰਧਵਿਸ਼ਵਾਸ ਫੈਲਾਉਣ, ਔਰਤਾਂ ਅਤੇ ਬੱਚਿਆਂ ਨੂੰ ਹਥਿਆਰ ਦਿਖਾ ਕੇ ਡਰਾਉਣ ਅਤੇ ਉਨ੍ਹਾਂ ਦਾ ਮਾਨਸਿਕ ਤੇ ਆਰਥਿਕ ਸ਼ੋਸ਼ਣ ਕਰਨ ਦੇ ਗੰਭੀਰ ਇਲਜ਼ਾਮ ਹਨ।
ਕੌਣ ਹੈ ‘ਤਲਵਾਰ ਬਾਬਾ’ ਅਤੇ ਕੀ ਸੀ ਕਾਰਾ?
ਨਾਂਦੇੜ ਦੀ ਬਿਲੋਲੀ ਤਹਿਸੀਲ ਦਾ ਰਹਿਣ ਵਾਲਾ ਗਿਆਨੇਸ਼ਵਰ ਕਰਡੇ, ਜੋ ਖ਼ੁਦ ਨੂੰ ‘ਤਲਵਾਰ ਬਾਬਾ’ ਕਹਾਉਂਦਾ ਸੀ, ਪਿਛਲੇ ਕਰੀਬ ਚਾਰ ਸਾਲਾਂ ਤੋਂ ਇੱਕ ਮੰਦਰ ਵਰਗੀ ਥਾਂ ‘ਤੇ ਆਪਣਾ ਦਰਬਾਰ ਲਗਾ ਰਿਹਾ ਸੀ। ਉਹ ਦਾਅਵਾ ਕਰਦਾ ਸੀ ਕਿ ਉਸ ਦੇ ਸਰੀਰ ਵਿੱਚ ਰੱਬ ਆਉਂਦਾ ਹੈ ਅਤੇ ਉਹ ਕਿਸੇ ਵੀ ਤਰ੍ਹਾਂ ਦੀ ਬਿਮਾਰੀ, ਪਰਿਵਾਰਕ ਕਲੇਸ਼ ਜਾਂ ਓਪਰੀ ਕਸਰ ਨੂੰ ਦੂਰ ਕਰ ਸਕਦਾ ਹੈ।
ਲੋਕਾਂ ਨੂੰ ‘ਮੰਤਰਾਂ ਵਾਲੇ ਨਿੰਬੂ’ ਦੇ ਕੇ ਉਨ੍ਹਾਂ ਕੋਲੋਂ ਮੋਟੀਆਂ ਰਕਮਾਂ ਅਤੇ ਸਾਮਾਨ ਵਸੂਲਦਾ ਸੀ। ਉਹ ਅਕਸਰ ਔਰਤਾਂ ਅਤੇ ਬੱਚਿਆਂ ਦੇ ਮਨ ਵਿੱਚ ਡਰ ਪੈਦਾ ਕਰਨ ਲਈ ਉਨ੍ਹਾਂ ਨੂੰ ਤਲਵਾਰ ਦਿਖਾਉਂਦਾ ਸੀ।
ਲੋਕਾਂ ਦੀਆਂ ਲਗਾਤਾਰ ਮਿਲ ਰਹੀਆਂ ਸ਼ਿਕਾਇਤਾਂ ਤੋਂ ਬਾਅਦ ਸਬ-ਡਿਵੀਜ਼ਨਲ ਪੁਲਿਸ ਅਫ਼ਸਰ ਸ਼ਿਆਮ ਪਾਨੇਗਾਂਵਕਰ ਅਤੇ ਪੁਲਿਸ ਇੰਸਪੈਕਟਰ ਅਤੁਲ ਭੋਸਲੇ ਦੀ ਟੀਮ ਨੇ ਜਾਲ ਵਿਛਾ ਕੇ ਛਾਪਾ ਮਾਰਿਆ। ਕਾਰਵਾਈ ਦੌਰਾਨ ਮੌਕੇ ਤੋਂ ਅੰਧਵਿਸ਼ਵਾਸ ਨਾਲ ਜੁੜੀ ਕਾਫੀ ਸਮੱਗਰੀ ਜ਼ਬਤ ਕੀਤੀ ਗਈ।
‘ਜਾਦੂ-ਟੂਣਾ ਵਿਰੋਧੀ ਕਾਨੂੰਨ’ ਤਹਿਤ ਮਾਮਲਾ ਦਰਜ
ਪੁਲਿਸ ਨੇ ਮੁੱਖ ਮੁਲਜ਼ਮ ਦੇ ਨਾਲ-ਨਾਲ ਉਸ ਦੇ ਦੋ ਸਮਰਥਕਾਂ, ਸ਼ਿਵਕਾਂਤ ਮੇਲਾਰੇ ਅਤੇ ਨਬਾਜੀ ਵਾਘੇਕਰ ਦੇ ਖ਼ਿਲਾਫ਼ ਵੀ ਮਹਾਰਾਸ਼ਟਰ ਜਾਦੂ-ਟੂਣਾ ਵਿਰੋਧੀ ਕਾਨੂੰਨ ਅਤੇ ਸਰਕਾਰੀ ਕੰਮ ਵਿੱਚ ਵਿਘਨ ਪਾਉਣ ਦੇ ਤਹਿਤ ਮਾਮਲਾ ਦਰਜ ਕਰਕੇ ਉਨ੍ਹਾਂ ਨੂੰ ਹਿਰਾਸਤ ਵਿੱਚ ਲਿਆ ਹੈ।
ਨਾਂਦੇੜ ਪੁਲਿਸ ਨੇ ਆਮ ਜਨਤਾ ਨੂੰ ਅਪੀਲ ਕੀਤੀ ਹੈ ਕਿ ਉਹ ਅਜਿਹੇ ਪਾਖੰਡੀ ਬਾਬਿਆਂ ਦੇ ਝਾਂਸੇ ਵਿੱਚ ਨਾ ਆਉਣ। ਪੁਲਿਸ ਨੇ ਕਿਹਾ ਕਿ ਲੋਕਾਂ ਨੂੰ ਅੰਧਵਿਸ਼ਵਾਸ ਦੀ ਬਜਾਏ ਵਿਗਿਆਨ ‘ਤੇ ਭਰੋਸਾ ਕਰਨਾ ਚਾਹੀਦਾ ਹੈ ਅਤੇ ਜੇਕਰ ਕਿਤੇ ਵੀ ਅਜਿਹੀ ਧੋਖਾਧੜੀ ਦਾ ਸ਼ੱਕ ਹੋਵੇ, ਤਾਂ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ ਜਾਵੇ।
