ਪੰਜਾਬ ‘ਚ ਔਰਤਾਂ ਨੂੰ 1000 ਰੁਪਏ ਦੇਣ ਵਾਲੀ ਸਕੀਮ ਸਿਰਫ਼ ‘ਵੋਟਾਂ ਬਟੋਰਨ ਦਾ ਸਟੰਟ’- ਸੁਖਪਾਲ ਖਹਿਰਾ
ਵਿਧਾਨ ਸਭਾ ‘ਚ ਹੋਏ ਹੰਗਾਮੇ ਤੋਂ ਬਾਅਦ ਖਹਿਰਾ ਦਾ ਸਪੱਸ਼ਟੀਕਰਨ; ਔਰਤਾਂ ਦੇ ਡਾਂਸ ਨੂੰ ਦੱਸਿਆ ‘ਆਪ’ ਦਾ ਸਕ੍ਰਿਪਟਿਡ ਡਰਾਮਾ
ਚੰਡੀਗੜ੍ਹ, 11 ਮਾਰਚ 2026-
ਵਿਧਾਨ ਸਭਾ ਵਿੱਚ ਆਪਣੇ ਬਿਆਨ ਨੂੰ ਲੈ ਕੇ ਹੋਏ ਭਾਰੀ ਹੰਗਾਮੇ ਤੋਂ ਬਾਅਦ ਕਾਂਗਰਸੀ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨੇ ਸੋਸ਼ਲ ਮੀਡੀਆ ਰਾਹੀਂ ਆਪਣਾ ਪੱਖ ਸਪੱਸ਼ਟ ਕੀਤਾ ਹੈ। ਖਹਿਰਾ ਨੇ ਕਿਹਾ ਹੈ ਕਿ ਉਹ ਆਪਣੇ ਵੱਲੋਂ ਸਾਂਝੇ ਕੀਤੇ ਗਏ ਵਿਚਾਰਾਂ ‘ਤੇ ਪੂਰੀ ਤਰ੍ਹਾਂ ਕਾਇਮ ਹਨ ਅਤੇ ਆਮ ਆਦਮੀ ਪਾਰਟੀ ਵੱਲੋਂ ਸਦਨ ਵਿੱਚ ਕੀਤਾ ਗਿਆ ਹੰਗਾਮਾ ਮਹਿਜ਼ ਇੱਕ ਡਰਾਮਾ ਹੈ।
ਖਹਿਰਾ ਨੇ ਕਿਹਾ ਕਿ ਉਨ੍ਹਾਂ ਨੇ ਇੱਕ ਵੀਡੀਓ ਸਾਂਝੀ ਕੀਤੀ ਸੀ ਜਿਸ ਵਿੱਚ ਇੱਕ ਯੂਟਿਊਬਰ ਨੇ 1000 ਰੁਪਏ ਦੇ ਐਲਾਨ ‘ਤੇ ਨੱਚ ਰਹੀਆਂ ‘ਆਪ’ ਵਾਲੰਟੀਅਰ ਔਰਤਾਂ ਦੀ ਨੈਤਿਕਤਾ ‘ਤੇ ਸਵਾਲ ਚੁੱਕੇ ਸਨ। ਉਨ੍ਹਾਂ ਕਿਹਾ ਕਿ ਇਹ ਔਰਤਾਂ ਸ਼ਾਇਦ ਪੰਜਾਬ ਦੇ ਕਿਸਾਨਾਂ, ਮੁਲਾਜ਼ਮਾਂ ਅਤੇ ਖੁਦ ਔਰਤਾਂ ‘ਤੇ ਹੋਏ ਪੁਲਸੀਆ ਤਸ਼ੱਦਦ ਨੂੰ ਭੁੱਲ ਕੇ ਇਸ ਨਿਗੂਣੀ ਰਕਮ ‘ਤੇ ਖੁਸ਼ ਹੋ ਰਹੀਆਂ ਹਨ।
ਖਹਿਰਾ ਅਨੁਸਾਰ, ਇਹ ਡਾਂਸ ਪੰਜਾਬ ਦੀਆਂ ਬਹਾਦਰ ਔਰਤਾਂ ਦਾ ਸੁਭਾਵਿਕ ਪ੍ਰਤੀਕਰਮ ਨਹੀਂ ਸੀ, ਸਗੋਂ ਆਮ ਆਦਮੀ ਪਾਰਟੀ ਵੱਲੋਂ ਤਿਆਰ ਕੀਤਾ ਗਿਆ ਇੱਕ ‘ਸਕ੍ਰਿਪਟਿਡ ਡਰਾਮਾ’ ਸੀ, ਜਿਸ ਲਈ ਇਹ ਪਾਰਟੀ ਜਾਣੀ ਜਾਂਦੀ ਹੈ।
ਉਨ੍ਹਾਂ ਕਿਹਾ ਕਿ ਪੰਜਾਬ ਦੀਆਂ ਔਰਤਾਂ ਮਾਈ ਭਾਗੋ (ਮਾਤਾ ਭਾਗ ਕੌਰ) ਦੀ ਬਹਾਦਰੀ ਨੂੰ ਆਪਣਾ ਆਦਰਸ਼ ਮੰਨਦੀਆਂ ਹਨ, ਜਿਨ੍ਹਾਂ ਨੇ 1705 ਵਿੱਚ ਮੁਗਲਾਂ ਵਿਰੁੱਧ ਜੰਗ ਲੜੀ ਸੀ। ਅਜਿਹੀ ਬਹਾਦਰ ਨਸਲ ਮਹਿਜ਼ 1000 ਰੁਪਏ ਲਈ ਨਹੀਂ ਨੱਚ ਸਕਦੀ।
ਖਹਿਰਾ ਨੇ ਦੁਹਰਾਇਆ ਕਿ ਜੇਕਰ ‘ਆਪ’ ਸਰਕਾਰ ਇਮਾਨਦਾਰ ਹੁੰਦੀ ਤਾਂ ਇਹ ਸਕੀਮ ਪਹਿਲੇ ਬਜਟ ਵਿੱਚ ਲਾਗੂ ਕਰਦੀ। ਕਾਂਗਰਸ ਪਾਰਟੀ ਮੰਗ ਕਰਦੀ ਹੈ ਕਿ ਭਗਵੰਤ ਮਾਨ ਸਰਕਾਰ ਪਿਛਲੇ 4 ਸਾਲਾਂ ਦਾ 48,000 ਰੁਪਏ ਦਾ ਬਕਾਇਆ ਪੰਜਾਬ ਦੀਆਂ ਔਰਤਾਂ ਨੂੰ ਅਦਾ ਕਰੇ।
