MLA
ਅਨੋਖਾ ਪ੍ਰਦਰਸ਼ਨ! ਵਿਧਾਇਕ ਨੇ ਮੱਛਰਦਾਨੀ ਪਹਿਨ ਕੇ ਸਰਕਾਰ ਨੂੰ ਘੇਰਿਆ
ਮੱਛਰਾਂ ਦੇ ਪ੍ਰਕੋਪ ਵਿਰੁੱਧ ਵਿਧਾਇਕ ਦਾ ਅਨੋਖਾ ਪ੍ਰਦਰਸ਼ਨ; ਮੱਛਰਦਾਨੀ ਪਹਿਨ ਕੇ ਸਰਕਾਰ ਨੂੰ ਘੇਰਿਆ
ਹੈਦਰਾਬਾਦ, 5 April 2026-
ਤੇਲੰਗਾਨਾ ਦੀ ਰਾਜਧਾਨੀ ਹੈਦਰਾਬਾਦ ਵਿੱਚ ਮੱਛਰਾਂ ਦੀ ਵਧਦੀ ਗਿਣਤੀ ਅਤੇ ਸਰਕਾਰ ਦੀ ਕਥਿਤ ਨਾਕਾਮੀ ਵਿਰੁੱਧ ਭਾਰਤ ਰਾਸ਼ਟਰ ਸਮਿਤੀ (BRS) ਦੇ ਵਿਧਾਇਕ ਦੇਵੀਰੇਡੀ ਸੁਧੀਰ ਰੈੱਡੀ ਨੇ ਇੱਕ ਬੇਹੱਦ ਵਿਲੱਖਣ ਤਰੀਕੇ ਨਾਲ ਰੋਸ ਪ੍ਰਦਰਸ਼ਨ ਕੀਤਾ।
ਵਿਧਾਇਕ ਰੈੱਡੀ ਮੀਡੀਆ ਦੇ ਸਾਹਮਣੇ ਮੱਛਰਦਾਨੀ ਤੋਂ ਬਣੇ ਕੱਪੜੇ ਪਹਿਨ ਕੇ ਪਹੁੰਚੇ, ਜੋ ਕਿ ਪੂਰੇ ਸ਼ਹਿਰ ਵਿੱਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ।
ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਵਿਧਾਇਕ ਰੈੱਡੀ ਨੇ ਰੇਵੰਤ ਰੈੱਡੀ ਦੀ ਅਗਵਾਈ ਵਾਲੀ ਕਾਂਗਰਸ ਸਰਕਾਰ ‘ਤੇ ਜੰਮ ਕੇ ਹਮਲੇ ਕੀਤੇ।
ਰੈੱਡੀ ਨੇ ਕਿਹਾ ਕਿ ਹੈਦਰਾਬਾਦ ਦੇ ਆਮ ਨਾਗਰਿਕ ਮੱਛਰਾਂ ਕਾਰਨ ਨਰਕ ਵਰਗੀ ਜ਼ਿੰਦਗੀ ਜੀ ਰਹੇ ਹਨ ਅਤੇ ਸਰਕਾਰ ਇਸ ਸਮੱਸਿਆ ‘ਤੇ ਕਾਬੂ ਪਾਉਣ ਵਿੱਚ ਪੂਰੀ ਤਰ੍ਹਾਂ ਫੇਲ੍ਹ ਸਾਬਤ ਹੋਈ ਹੈ।
ਉਨ੍ਹਾਂ ਦਾਅਵਾ ਕੀਤਾ ਕਿ ਬੀ.ਆਰ.ਐੱਸ. ਸਰਕਾਰ ਵੇਲੇ ਝੀਲਾਂ ਅਤੇ ਜਲ ਸਰੋਤਾਂ ਵਿੱਚ ਮੱਛਰਾਂ ਨੂੰ ਰੋਕਣ ਲਈ ਪੰਜ ਪੜਾਵਾਂ ਵਾਲੀ ਵਿਗਿਆਨਕ ਪ੍ਰਣਾਲੀ ਲਾਗੂ ਸੀ।
ਮੌਜੂਦਾ ਸਰਕਾਰ ਨੇ ਇਨ੍ਹਾਂ ਉਪਾਵਾਂ ਨੂੰ ਬੰਦ ਕਰ ਦਿੱਤਾ ਹੈ, ਜਿਸ ਕਾਰਨ ਮਲੇਰੀਆ ਅਤੇ ਚਿਕਨਗੁਨੀਆ ਵਰਗੀਆਂ ਬਿਮਾਰੀਆਂ ਵਧ ਰਹੀਆਂ ਹਨ।
ਉਨ੍ਹਾਂ ਗ੍ਰੇਟਰ ਹੈਦਰਾਬਾਦ ਮਿਊਂਸਪਲ ਕਾਰਪੋਰੇਸ਼ਨ (GHMC) ‘ਤੇ ਲਾਪਰਵਾਹੀ ਦਾ ਦੋਸ਼ ਲਾਉਂਦਿਆਂ ਕਿਹਾ ਕਿ ਸ਼ਹਿਰ ਵਿੱਚ ਫੌਗਿੰਗ ਅਤੇ ਐਂਟੀ-ਲਾਰਵਾ ਮੁਹਿੰਮਾਂ ਨਾਂ ਮਾਤਰ ਰਹਿ ਗਈਆਂ ਹਨ।
ਵਿਧਾਇਕ ਰੈੱਡੀ ਨੇ ਸਰਕਾਰ ਤੋਂ ਕੀਤੀ ਮੰਗ
ਵਿਧਾਇਕ ਨੇ ਮੰਗ ਕੀਤੀ ਕਿ ਸਰਕਾਰ ਤੁਰੰਤ ਪੁਰਾਣੇ ਵਿਗਿਆਨਕ ਤਰੀਕਿਆਂ ਨੂੰ ਮੁੜ ਸ਼ੁਰੂ ਕਰੇ ਅਤੇ ਐਮਰਜੈਂਸੀ ਯੋਜਨਾ ਬਣਾ ਕੇ ਇਸ ਸਮੱਸਿਆ ਦਾ ਹੱਲ ਕੱਢੇ।
ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਜੇਕਰ ਹਾਲਾਤ ਨਾ ਸੁਧਰੇ ਤਾਂ ਹੈਦਰਾਬਾਦ ਦਾ ਅਕਸ ਖ਼ਰਾਬ ਹੋ ਸਕਦਾ ਹੈ। ਫਿਲਹਾਲ ਇਨ੍ਹਾਂ ਦੋਸ਼ਾਂ ‘ਤੇ ਕਾਂਗਰਸ ਸਰਕਾਰ ਜਾਂ ਨਗਰ ਨਿਗਮ ਵੱਲੋਂ ਕੋਈ ਅਧਿਕਾਰਤ ਪ੍ਰਤੀਕਿਰਿਆ ਸਾਹਮਣੇ ਨਹੀਂ ਆਈ ਹੈ।\
