ਹਿੰਦੂ ਰਾਸ਼ਟਰ ਤੋਂ ਮੁਸਲਮਾਨਾਂ ਨੂੰ ਡਰਨ ਦੀ ਲੋੜ ਨਹੀਂ: DU ‘ਚ ਬੋਲੇ ਰਾਮਦੇਵ
ਦਿੱਲੀ ਯੂਨੀਵਰਸਿਟੀ ‘ਚ ਸ਼ੰਕਰਾਚਾਰੀਆ ਦੇ ਪ੍ਰਗਟ ਉਤਸਵ ‘ਚ ਪਹੁੰਚੇ ਬਾਬਾ ਰਾਮਦੇਵ, ਕਿਹਾ- ‘ਮੁਸਲਮਾਨ ਆਪਣੀ ਦਾੜ੍ਹੀ ਰੱਖਣ ਪਰ ਚਰਿੱਤਰ ਪੂਰਵਜਾਂ ਵਰਗਾ ਰੱਖਣ’
ਨਵੀਂ ਦਿੱਲੀ, 13 ਜੁਲਾਈ 2026- ਦਿੱਲੀ ਯੂਨੀਵਰਸਿਟੀ (DU) ਵਿੱਚ ਐਤਵਾਰ ਨੂੰ ਆਯੋਜਿਤ ਇੱਕ ਵਿਸ਼ੇਸ਼ ਪ੍ਰੋਗਰਾਮ ਦੌਰਾਨ ਯੋਗ ਗੁਰੂ ਬਾਬਾ ਰਾਮਦੇਵ ਨੇ ਇੱਕ ਵੱਡਾ ਬਿਆਨ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਸਾਡੇ ਮਜ਼੍ਹਬ (ਧਰਮ) ਵੱਖਰੇ ਹੋ ਸਕਦੇ ਹਨ, ਪਰ ਸਾਡੇ ਪੂਰਵਜ ਇੱਕ ਹੀ ਹਨ। ਹਿੰਦੂ ਰਾਸ਼ਟਰ ਦੀ ਚਰਚਾ ਕਰਦੇ ਹੋਏ ਉਨ੍ਹਾਂ ਨੇ ਮੁਸਲਮਾਨਾਂ ਨੂੰ ਭਰੋਸਾ ਦਿਵਾਇਆ ਕਿ ਉਨ੍ਹਾਂ ਨੂੰ ਕਿਸੇ ਵੀ ਤਰ੍ਹਾਂ ਦਾ ਡਰ ਜਾਂ ਖ਼ਤਰਾ ਨਹੀਂ ਹੋਣਾ ਚਾਹੀਦਾ। ਨਾਰਥ ਕੈਂਪਸ ਸਥਿਤ ਦਿੱਲੀ ਯੂਨੀਵਰਸਿਟੀ ਵਿੱਚ ਜਗਦਗੁਰੂ ਸ਼ੰਕਰਾਚਾਰੀਆ ਸੁਆਮੀ ਨਿਸ਼ਚਲਾਨੰਦ ਸਰਸਵਤੀ ਜੀ ਮਹਾਰਾਜ ਦਾ 84ਵਾਂ ਪ੍ਰਗਟ ਉਤਸਵ “ਰਾਸ਼ਟਰੋਤਕਰਸ਼ ਦਿਵਸ” ਵਜੋਂ ਪੂਰੀ ਸ਼ਰਧਾ ਅਤੇ ਉਤਸ਼ਾਹ ਨਾਲ ਮਨਾਇਆ ਗਿਆ।
ਨਿਊਜ਼ ਏਜੰਸੀ IANS ਮੁਤਾਬਕ, ਇਸ ਸਮਾਗਮ ਵਿੱਚ ਬਾਬਾ ਰਾਮਦੇਵ, ਦਿੱਲੀ ਯੂਨੀਵਰਸਿਟੀ ਦੇ ਉਪ-ਕੁਲਪਤੀ (VC) ਪ੍ਰੋ. ਯੋਗੇਸ਼ ਸਿੰਘ, ਆਚਾਰੀਆ ਧਰਮਵੀਰ, ਆਦਿਸ਼ੰਕਰਾਚਾਰੀਆ ਸਨਾਤਨ ਸੇਵਾ ਸੰਸਥਾਨਮ ਫਾਊਂਡੇਸ਼ਨ ਦੇ ਸੰਦੀਪ ਗਰਗ ਸਮੇਤ ਵੱਖ-ਵੱਖ ਧਰਮ ਸੰਗਠਨਾਂ, ਪੀਠ ਪ੍ਰੀਸ਼ਦਾਂ, ਆਦਿਤਿਆ ਵਾਹਿਨੀ ਅਤੇ ਆਨੰਦ ਵਾਹਿਨੀ ਦੇ ਅਹੁਦੇਦਾਰ, ਦੇਸ਼-ਵਿਦੇਸ਼ ਤੋਂ ਆਏ ਸੰਤ-ਮਹਾਂਪੁਰਸ਼, ਵਿਦਵਾਨ ਅਤੇ ਵੱਡੀ ਗਿਣਤੀ ਵਿੱਚ ਸ਼ਰਧਾਲੂ ਹਾਜ਼ਰ ਸਨ।
ਪ੍ਰੋਗਰਾਮ ਨੂੰ ਸੰਬੋਧਨ ਕਰਦਿਆਂ ਬਾਬਾ ਰਾਮਦੇਵ ਨੇ ਸਾਲ 2009 ਦੇ ਇੱਕ ਪ੍ਰੋਗਰਾਮ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਕਿਸੇ ਵੀ ਮੁਸਲਮਾਨ ਨੂੰ ਡਰਨ ਦੀ ਲੋੜ ਨਹੀਂ ਹੈ। ਸਾਡੇ ਧਰਮ ਭਾਵੇਂ ਵੱਖਰੇ ਹੋਣ, ਪਰ ਸਾਡੀਆਂ ਜੜ੍ਹਾਂ ਅਤੇ ਪੂਰਵਜ ਇੱਕੋ ਹਨ। ਉਨ੍ਹਾਂ ਕਿਹਾ ਕਿ ਦਿੱਲੀ ਯੂਨੀਵਰਸਿਟੀ ਦੇ ਗੇਟ ‘ਤੇ ਵੀ ਇਹੀ ਸੰਦੇਸ਼ ਲਿਖਿਆ ਹੋਇਆ ਹੈ ਕਿ ਹਿੰਦੂ ਰਾਸ਼ਟਰ ਦੇ ਨਾਂ ‘ਤੇ ਕਿਸੇ ਨੂੰ ਡਰਨ ਦੀ ਲੋੜ ਨਹੀਂ, ਅਸੀਂ ਸਾਰੇ ਸਨਾਤਨੀ ਹਿੰਦੂਆਂ ਦੀ ਅੰਸ਼ ਹਾਂ।
ਮੁਸਲਮਾਨਾਂ ਨੂੰ ਬਾਬਾ ਰਾਮਦੇਵ ਦੀ ਅਪੀਲ
ਬਾਬਾ ਰਾਮਦੇਵ ਨੇ ਕਿਹਾ, “ਮੁਸਲਮਾਨਾਂ ਨੂੰ ਡਰਾਇਆ ਜਾਂਦਾ ਹੈ ਕਿ ਜੇਕਰ ਭਾਰਤ ਹਿੰਦੂ ਰਾਸ਼ਟਰ ਬਣ ਗਿਆ ਤਾਂ ਉਹ ਕਿੱਥੇ ਜਾਣਗੇ। ਮੈਂ ਮੁਸਲਮਾਨਾਂ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਉਹ ਆਪਣੇ ਪੂਰਵਜਾਂ ਦੀ ਪਰੰਪਰਾ ਨੂੰ ਅਪਣਾਉਣ। ਜੋ ਆਪਣੇ ਪਿਤਾ ਦਾ ਨਹੀਂ ਹੋ ਸਕਿਆ, ਉਹ ਕਿਸੇ ਦਾ ਨਹੀਂ ਹੋ ਸਕਦਾ। ਤੁਸੀਂ ਆਪਣੇ ਪੂਰਵਜਾਂ, ਰਿਸ਼ੀ-ਮੁਨੀਆਂ ਦੀਆਂ ਗੱਲਾਂ ਨੂੰ ਮੰਨੋ। ਦਾੜ੍ਹੀ ਰੱਖੋ, ਮੁੱਛਾਂ ਕਟਾਓ, ਜਿਹੋ ਜਿਹੇ ਮਰਜ਼ੀ ਕੱਪੜੇ ਪਾਓ, ਪਰ ਆਪਣਾ ਚਰਿੱਤਰ ਆਪਣੇ ਪੂਰਵਜਾਂ ਵਰਗਾ ਪਵਿੱਤਰ ਰੱਖੋ।”
ਉਨ੍ਹਾਂ ਨੇ ਆਪਣੀ ਗੱਲ ‘ਤੇ ਜ਼ੋਰ ਦਿੰਦਿਆਂ ਮੁੜ ਦੁਹਰਾਇਆ ਕਿ ਮੈਂ ਫਿਰ ਕਹਿਣਾ ਚਾਹੁੰਦਾ ਹਾਂ ਕਿ ਮੁਸਲਮਾਨਾਂ ਨੂੰ ਕੋਈ ਖ਼ਤਰਾ ਨਹੀਂ ਹੈ। ਇਸ ਦੇ ਨਾਲ ਹੀ ਬਾਬਾ ਰਾਮਦੇਵ ਨੇ ਗੁਰੂਕੁਲ ਵਿਵਸਥਾ ‘ਤੇ ਜ਼ੋਰ ਦਿੰਦਿਆਂ ਕਿਹਾ ਕਿ ਹਰ ਘਰ ਗੁਰੂਕੁਲ ਹੋਣਾ ਚਾਹੀਦਾ ਹੈ। ਮਾਪਿਆਂ ਨੂੰ ਆਪਣੇ ਬੱਚਿਆਂ ਨੂੰ ਚੰਗੇ ਸੰਸਕਾਰ ਦੇਣੇ ਚਾਹੀਦੇ ਹਨ ਤਾਂ ਜੋ ਉਹ ਕਦੇ ਵੀ ਧਰਮ ਦੇ ਮਾਰਗ ਤੋਂ ਨਾ ਭਟਕਣ। ਅਸੀਂ ਸਾਰੇ ਇੱਥੇ ਇੱਕਜੁੱਟ ਹੋਏ ਹਾਂ, ਇਸ ਲਈ ਗੁਰੂਦੇਵ ਦਾ ਜੋ ਵੀ ਹੁਕਮ ਹੋਵੇਗਾ, ਉਹ ਮੰਨਣਾ ਪਵੇਗਾ। ਅਸੀਂ ਭਾਰਤ ਨੂੰ ਇੱਕ ਸ਼ਾਨਦਾਰ ਹਿੰਦੂ ਰਾਸ਼ਟਰ ਬਣਾਵਾਂਗੇ, ਇਸੇ ਸੰਕਲਪ ਨਾਲ ਅੱਗੇ ਵਧਣਾ ਹੈ।
ਆਪਣੇ ਸੰਬੋਧਨ ਦੇ ਅੰਤ ਵਿੱਚ ਬਾਬਾ ਰਾਮਦੇਵ ਨੇ ਦੱਸਿਆ ਕਿ ਦੇਸ਼ ਵਿੱਚ 5 ਲੱਖ ਤੋਂ ਵੱਧ ਮੰਦਰ ਹਨ, ਜਿਨ੍ਹਾਂ ਵਿੱਚੋਂ 500 ਤੋਂ 1,000 ਵੱਡੇ ਮੰਦਰ ਗੁਰੂਕੁਲ ਅਤੇ ਗਊਸ਼ਾਲਾ ਦੋਵੇਂ ਚਲਾ ਸਕਦੇ ਹਨ। ਰਾਮ ਮੰਦਰ, ਕਾਸ਼ੀ ਵਿਸ਼ਵਨਾਥ, ਵੈਸ਼ਨੋ ਦੇਵੀ, ਬਾਂਕੇ ਬਿਹਾਰੀ, ਸਿੱਧੀ ਵਿਨਾਇਕ ਵਰਗੇ ਪ੍ਰਮੁੱਖ ਮੰਦਰ ਇਸ ਦਿਸ਼ਾ ਵਿੱਚ ਅਹਿਮ ਭੂਮਿਕਾ ਨਿਭਾ ਸਕਦੇ ਹਨ। ਪ੍ਰੋਗਰਾਮ ਵਿੱਚ ਮੌਜੂਦ ਸਾਰੇ ਲੋਕਾਂ ਨੇ ਹਿੰਦੂ ਰਾਸ਼ਟਰ ਦੇ ਨਿਰਮਾਣ ਅਤੇ ਸਨਾਤਨ ਸੰਸਕ੍ਰਿਤੀ ਦੀ ਰੱਖਿਆ ਦੇ ਸੰਕਲਪ ਨੂੰ ਦੁਹਰਾਇਆ।
