ਡਿਗਰੀ ‘ਤੇ ਭਾਰੀ ਪਿਆ ਹੁਨਰ; 19 ਸਾਲਾ ਗੌਰੀ ਨੂੰ BMW ਨੇ ਦਿੱਤੀ ਫੁੱਲ-ਟਾਈਮ ਨੌਕਰੀ; ਬਿਨਾਂ ਕਾਲਜ ਗਏ ਹਾਸਲ ਕੀਤਾ ਵੱਡਾ ਮੁਕਾਮ
ਨਵੀਂ ਦਿੱਲੀ, 17 ਅਪ੍ਰੈਲ 2026:
ਸੋਸ਼ਲ ਮੀਡੀਆ ਪਲੇਟਫਾਰਮ ਲਿੰਕਡਇਨ (LinkedIn) ‘ਤੇ ਇਨੀਂ ਦਿਨੀਂ 19 ਸਾਲਾ ਗੌਰੀ ਐਮ. ਦੀ ਸਫਲਤਾ ਦੀ ਕਹਾਣੀ ਖੂਬ ਵਾਇਰਲ ਹੋ ਰਹੀ ਹੈ, ਜਿਸ ਨੇ ਵੱਡੀਆਂ-ਵੱਡੀਆਂ ਡਿਗਰੀਆਂ ਦੀ ਅਹਿਮਿਤ ‘ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
ਦੁਨੀਆ ਦੀ ਮਸ਼ਹੂਰ ਕਾਰ ਨਿਰਮਾਤਾ ਕੰਪਨੀ BMW ਨੇ ਗੌਰੀ ਨੂੰ ਇੱਕ ਫੁੱਲ-ਟਾਈਮ ਮਾਰਕੀਟਿੰਗ ਰੋਲ ਲਈ ਚੁਣਿਆ ਹੈ, ਜਦਕਿ ਉਸ ਕੋਲ ਅਜੇ ਤੱਕ ਕੋਈ ਕਾਲਜ ਡਿਗਰੀ ਨਹੀਂ ਹੈ।
ਗੌਰੀ ਦੀ ਇਸ ਕਾਮਯਾਬੀ ਪਿੱਛੇ ਉਸ ਦਾ ਮਜ਼ਬੂਤ ‘ਪਰਸਨਲ ਬ੍ਰਾਂਡ’ ਅਤੇ ਸੋਸ਼ਲ ਮੀਡੀਆ ‘ਤੇ ਉਸ ਦੀ ਪਕੜ ਨੂੰ ਸਭ ਤੋਂ ਵੱਡੀ ਵਜ੍ਹਾ ਮੰਨਿਆ ਜਾ ਰਿਹਾ ਹੈ। ਲਿੰਕਡਇਨ ‘ਤੇ ਉਸ ਦੇ 65 ਹਜ਼ਾਰ ਅਤੇ ਇੰਸਟਾਗ੍ਰਾਮ ‘ਤੇ 35 ਹਜ਼ਾਰ ਤੋਂ ਵੱਧ ਫਾਲੋਅਰਜ਼ ਹਨ।
ਗੌਰੀ ਨੇ ਦੱਸਿਆ ਕਿ ਉਸ ਨੂੰ ਇਸ ਨੌਕਰੀ ਲਈ ਕੋਈ ਅਰਜ਼ੀ ਜਾਂ ਈਮੇਲ ਨਹੀਂ ਕਰਨੀ ਪਈ, ਸਗੋਂ ਕੰਪਨੀ ਨੇ ਉਸ ਦੀ ਪ੍ਰੋਫਾਈਲ ਦੇਖ ਕੇ ਖੁਦ ਉਸ ਨਾਲ ਸੰਪਰਕ ਕੀਤਾ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇੱਕ ਹਫ਼ਤੇ ਦੇ ਅੰਦਰ ਤਿੰਨ ਹੋਰ ਕੰਪਨੀਆਂ ਨੇ ਵੀ ਉਸ ਨੂੰ ਨੌਕਰੀ ਦੀ ਪੇਸ਼ਕਸ਼ ਕੀਤੀ।
ਕਿਸਮਤ ਨਹੀਂ, ਮਿਹਨਤ ਦਾ ਨਤੀਜਾ
ਇੰਟਰਨੈੱਟ ‘ਤੇ ਲੋਕ ਇਸ ਨੂੰ ਸਿਰਫ਼ ਕਿਸਮਤ ਨਹੀਂ, ਸਗੋਂ ਸਹੀ ਦਿਸ਼ਾ ਵਿੱਚ ਕੀਤੀ ਗਈ ਮਿਹਨਤ ਦੱਸ ਰਹੇ ਹਨ। ਗੌਰੀ ਪਿਛਲੇ ਕਾਫੀ ਸਮੇਂ ਤੋਂ ਟਾਟਾ ਮੋਟਰਜ਼ ਵਰਗੀਆਂ ਵੱਡੀਆਂ ਕੰਪਨੀਆਂ ਨਾਲ ਕੰਮ ਕਰ ਚੁੱਕੀ ਹੈ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਅੱਜ ਦੇ ਦੌਰ ਵਿੱਚ ਤੁਹਾਡਾ ਲਿੰਕਡਇਨ ਅਕਾਊਂਟ ਇੱਕ ਪੋਰਟਫੋਲੀਓ ਵਾਂਗ ਕੰਮ ਕਰਦਾ ਹੈ, ਜੋ ਸਹੀ ਲੋਕਾਂ ਤੱਕ ਤੁਹਾਡੀ ਪਹੁੰਚ ਬਣਾਉਂਦਾ ਹੈ।
ਸਿੱਖਿਆ ਬਨਾਮ ਹੁਨਰ ‘ਤੇ ਛਿੜੀ ਬਹਿਸ
ਗੌਰੀ ਦੀ ਇਸ ਕਹਾਣੀ ਨੇ ਪੇਸ਼ੇਵਰ ਦੁਨੀਆ ਵਿੱਚ ‘ਡਿਗਰੀ ਬਨਾਮ ਹੁਨਰ’ (Degree vs Skill) ਦੀ ਇੱਕ ਨਵੀਂ ਬਹਿਸ ਛੇੜ ਦਿੱਤੀ ਹੈ। ਨੌਜਵਾਨ ਪ੍ਰੋਫੈਸ਼ਨਲਸ ਇਸ ਨੂੰ ਆਧੁਨਿਕ ਕਰੀਅਰ ਦਾ ਨਵਾਂ ਅਤੇ ਸਹੀ ਰਸਤਾ ਦੱਸ ਰਹੇ ਹਨ।
ਕੁਝ ਲੋਕਾਂ ਦਾ ਮੰਨਣਾ ਹੈ ਕਿ ਰਸਮੀ ਸਿੱਖਿਆ (Formal Education) ਦੀ ਆਪਣੀ ਅਹਿਮਿਅਤ ਹੈ ਅਤੇ ਹਰ ਖੇਤਰ ਵਿੱਚ ਬਿਨਾਂ ਡਿਗਰੀ ਦੇ ਕੰਮ ਨਹੀਂ ਚੱਲ ਸਕਦਾ।
ਇਸ ਦੇ ਬਾਵਜੂਦ, ਗੌਰੀ ਨੇ ਇਹ ਸਾਬਿਤ ਕਰ ਦਿੱਤਾ ਹੈ ਕਿ ਜੇਕਰ ਤੁਹਾਡੇ ਕੋਲ ਸਹੀ ਹੁਨਰ ਹੈ ਅਤੇ ਤੁਸੀਂ ਉਸ ਨੂੰ ਦੁਨੀਆ ਨੂੰ ਦਿਖਾਉਣਾ ਜਾਣਦੇ ਹੋ, ਤਾਂ ਮੌਕੇ ਖੁਦ ਤੁਹਾਡੇ ਕੋਲ ਚੱਲ ਕੇ ਆਉਂਦੇ ਹਨ।
