ਹਾਲ-ਏ-ਬਦਲਾਅ! CM ਮਾਨ ਦੇ ਜ਼ਿਲ੍ਹੇ ‘ਚ 117 ਪੋਸਟਾਂ ਲਈ ਹਜ਼ਾਰਾਂ ਬੇਰੁਜ਼ਗਾਰਾਂ ਦਾ ਆਇਆ ਹੜ੍ਹ
ਲੰਬੇ ਸਮੇਂ ਤੋਂ ਰੁਜ਼ਗਾਰ ਦੀ ਉਡੀਕ ਕਰ ਰਹੇ ਨੌਜਵਾਨਾਂ ਲਈ 117 ਅਸਾਮੀਆਂ ਦੀ ਇਸ ਭਰਤੀ ਨੇ ਇੱਕ ਉਮੀਦ ਜਗਾਈ ਸੀ, ਪਰ ਬੇਰੁਜ਼ਗਾਰਾਂ ਦੀਆਂ ਉਮੀਦਾਂ ‘ਤੇ ਪਾਣੀ ਫਿਰ ਗਿਆ…
ਸੰਗਰੂਰ, 21 ਅਪ੍ਰੈਲ, 2026
ਸੰਗਰੂਰ ਦੇ ਸਿਵਲ ਸਰਜਨ ਦਫ਼ਤਰ ਦੇ ਬਾਹਰ ਸੋਮਵਾਰ ਨੂੰ ਬੇਰੁਜ਼ਗਾਰੀ ਦੀ ਇੱਕ ਦਰਦਨਾਕ ਤਸਵੀਰ ਸਾਹਮਣੇ ਆਈ। ਪੰਜਾਬ ਸਰਕਾਰ ਵੱਲੋਂ ਪ੍ਰਸਤਾਵਿਤ 117 ਆਮ ਆਦਮੀ ਗ੍ਰਾਮੀਣ ਕਲੀਨਿਕਾਂ ਵਿੱਚ ਸਟਾਫ ਨਰਸਾਂ (ਏ.ਐੱਨ.ਐੱਮ. ਅਤੇ ਜੀ.ਐੱਨ.ਐੱਮ.) ਦੀਆਂ ਅਸਾਮੀਆਂ ਲਈ ਰੱਖੀ ਗਈ ਭਰਤੀ ਪ੍ਰਕਿਰਿਆ ਦੌਰਾਨ ਹਜ਼ਾਰਾਂ ਦੀ ਗਿਣਤੀ ਵਿੱਚ ਨੌਜਵਾਨ ਪਹੁੰਚੇ, ਜਿੱਥੇ ਪ੍ਰਸ਼ਾਸਨਿਕ ਨਾਕਾਮੀ ਕਾਰਨ ਉਨ੍ਹਾਂ ਨੂੰ ਭਾਰੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ।
ਦੂਰ-ਦਰਾਜ ਤੋਂ ਆਏ ਸੈਂਕੜੇ ਉਮੀਦਵਾਰਾਂ ਲਈ ਨਾ ਤਾਂ ਪੀਣ ਵਾਲੇ ਪਾਣੀ ਦਾ ਪ੍ਰਬੰਧ ਸੀ ਅਤੇ ਨਾ ਹੀ ਬੈਠਣ ਲਈ ਕੋਈ ਸਹੂਲਤ ਦਿੱਤੀ ਗਈ ਸੀ। ਨੌਜਵਾਨਾਂ ਨੇ ਦੋਸ਼ ਲਾਇਆ ਕਿ ਉਹ ਬਾਹਰੋਂ ਫਾਰਮ ਭਰ ਕੇ ਲਿਆਏ ਸਨ, ਪਰ ਮੌਕੇ ‘ਤੇ ਵਿਭਾਗ ਨੇ ਉਨ੍ਹਾਂ ਨੂੰ ਰੱਦ ਕਰ ਦਿੱਤਾ ਅਤੇ ਨਵੇਂ ਫਾਰਮ ਭਰਨ ਲਈ ਮਜਬੂਰ ਕੀਤਾ, ਜਿਸ ਕਾਰਨ ਕਈ ਘੰਟੇ ਬਰਬਾਦ ਹੋਏ।
ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਦੇ ਆਡੀਟੋਰੀਅਮ ਹਾਲ ਵਿੱਚ ਸਾਰਾ ਦਿਨ ਅਫਰਾ-ਤਫਰੀ ਦਾ ਮਾਹੌਲ ਬਣਿਆ ਰਿਹਾ ਅਤੇ ਉਮੀਦਵਾਰਾਂ ਨੂੰ ਇੰਟਰਵਿਊ ਲਈ ਲੰਬੀਆਂ ਕਤਾਰਾਂ ਵਿੱਚ ਖੱਜਲ-ਖੁਆਰ ਹੋਣਾ ਪਿਆ।
ਮੀਡੀਆ ਰਿਪੋਰਟਾਂ ਦੇ ਮੁਤਾਬਿਕ, ਕੁੱਝ ਉਮੀਦਵਾਰਾਂ ਨੇ ਦੱਸਿਆ ਕਿ ਉਹ ਸਵੇਰੇ 7-8 ਵਜੇ ਤੋਂ ਹੀ ਦਫ਼ਤਰ ਪਹੁੰਚ ਗਏ ਸਨ। ਉਨ੍ਹਾਂ ਕਿਹਾ ਕਿ ਲੰਬੇ ਸਮੇਂ ਤੋਂ ਰੁਜ਼ਗਾਰ ਦੀ ਉਡੀਕ ਕਰ ਰਹੇ ਨੌਜਵਾਨਾਂ ਲਈ 117 ਅਸਾਮੀਆਂ ਦੀ ਇਸ ਭਰਤੀ ਨੇ ਇੱਕ ਉਮੀਦ ਜਗਾਈ ਸੀ, ਪਰ ਸਿਹਤ ਵਿਭਾਗ ਦੇ ਬੇਤਰਤੀਬੇ ਪ੍ਰਬੰਧਾਂ ਨੇ ਉਨ੍ਹਾਂ ਦੀਆਂ ਉਮੀਦਾਂ ‘ਤੇ ਪਾਣੀ ਫੇਰ ਦਿੱਤਾ ਹੈ।
ਪੰਜਾਬ ਸਰਕਾਰ ਪਿੰਡਾਂ ਵਿੱਚ ਆਮ ਆਦਮੀ ਗ੍ਰਾਮੀਣ ਕਲੀਨਿਕ ਖੋਲ੍ਹਣ ਦੀ ਯੋਜਨਾ ਬਣਾ ਰਹੀ ਹੈ, ਜਿਸ ਤਹਿਤ ਇਹ ਪੈਰਾ ਮੈਡੀਕਲ ਸਟਾਫ ਭਰਤੀ ਕੀਤਾ ਜਾਣਾ ਹੈ। ਪਰ ਸੰਗਰੂਰ ਵਿੱਚ ਹੋਈ ਇਸ ਭਰਤੀ ਦੌਰਾਨ ਸਾਹਮਣੇ ਆਈ ਬਦਇੰਤਜ਼ਾਮੀ ਨੇ ਪ੍ਰਸ਼ਾਸਨਿਕ ਪ੍ਰਬੰਧਾਂ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ ਹੈ।
