IND vs PAK Asia Cup 2026 Final 2026: ਪਾਕਿਸਤਾਨ ਨੂੰ ਹਰਾ ਕੇ ਭਾਰਤ ਬਣਿਆ ਚੈਂਪੀਅਨ
ਏਸ਼ੀਆ ਕੱਪ ਦੇ ਰੋਮਾਂਚਕ ਫਾਈਨਲ ਵਿੱਚ ਪਾਕਿਸਤਾਨ ਨੂੰ ਹਰਾ ਕੇ ਭਾਰਤੀ ਅੰਡਰ-19 ਟੀਮ ਨੇ ਜਿੱਤਿਆ ਖ਼ਤਾਬ
ਭਾਰਤ ਨੇ ਰੋਮਾਂਚਕ ਫਾਈਨਲ ਵਿੱਚ ਪਾਕਿਸਤਾਨ ਨੂੰ 1 ਵਿਕਟ ਨਾਲ ਹਰਾ ਕੇ ਅੰਡਰ-19 ਏਸ਼ੀਆ ਕੱਪ 2026 ਦਾ ਖ਼ਤਾਬ ਆਪਣੇ ਨਾਂ ਕੀਤਾ
ਪਾਕਿਸਤਾਨ ਵੱਲੋਂ ਦਿੱਤੇ 338 ਦੌੜਾਂ ਦੇ ਵਿਸ਼ਾਲ ਟੀਚੇ ਨੂੰ ਭਾਰਤੀ ਟੀਮ ਨੇ ਆਖਰੀ ਗੇਂਦ ਉੱਤੇ ਕੀਤਾ ਹਾਸਲ
IND vs PAK Asia Cup 2026 Final 2026: ਅੰਡਰ-19 ਏਸ਼ੀਆ ਕੱਪ 2026 ਦੇ ਮਹਾਂ-ਮੁਕਾਬਲੇ ਵਿੱਚ ਭਾਰਤੀ ਅੰਡਰ-19 ਟੀਮ ਨੇ ਪਾਕਿਸਤਾਨ ਅੰਡਰ-19 ਟੀਮ ਨੂੰ ਇੱਕ ਰੋਮਾਂਚਕ ਮੁਕਾਬਲੇ ਵਿੱਚ ਇੱਕ ਵਿਕਟ ਨਾਲ ਮਾਤ ਦੇ ਦਿੱਤੀ ਹੈ। ਇਸ ਜਿੱਤ ਦੇ ਨਾਲ ਹੀ ਭਾਰਤੀ-19 ਟੀਮ ਨੇ ਸਾਲ 2026 ਦਾ ਏਸ਼ੀਆ ਕੱਪ ਟਰਾਫੀ ਆਪਣੇ ਨਾਂ ਕਰ ਲਈ ਹੈ। ਦੋਵਾਂ ਟੀਮਾਂ ਵਿਚਾਲੇ ਖੇਡਿਆ ਗਿਆ ਇਹ ਫਾਈਨਲ ਮੈਚ ਕ੍ਰਿਕਟ ਇਤਿਹਾਸ ਦੇ ਸਭ ਤੋਂ ਰੋਮਾਂਚਕ ਮੁਕਾਬਲਿਆਂ ਵਿੱਚੋਂ ਇੱਕ ਰਿਹਾ, ਜਿੱਥੇ ਆਖਰੀ ਗੇਂਦ ਤੱਕ ਸਾਹ ਰੋਕ ਕੇ ਰੱਖਣ ਵਾਲਾ ਮਾਹੌਲ ਬਣਿਆ ਰਿਹਾ।
ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਪਾਕਿਸਤਾਨੀ ਟੀਮ ਨੇ ਵੱਡਾ ਸਕੋਰ ਬਣਾਇਆ, ਪਰ ਭਾਰਤੀ ਖਿਡਾਰੀਆਂ ਦੇ ਅਟੁੱਟ ਹੌਂਸਲੇ ਨੇ ਮੈਚ ਦਾ ਪਾਸਾ ਪਲਟ ਦਿੱਤਾ। ਟਾਸ ਹਾਰ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਉਤਰੀ ਪਾਕਿਸਤਾਨੀ ਟੀਮ ਦੇ ਸਿਖਰਲੇ ਕ੍ਰਮ ਦੇ ਬੱਲੇਬਾਜ਼ਾਂ ਨੇ ਮੈਦਾਨ ਦੇ ਚਾਰੇ ਪਾਸੇ ਸ਼ਾਨਦਾਰ ਸ਼ਾਟ ਲਗਾਏ। ਸਲਾਮੀ ਬੱਲੇਬਾਜ਼ ਉਸਮਾਨ ਖ਼ਾਨ ਨੇ ਸੂਝਵਾਨ ਬੱਲੇਬਾਜ਼ੀ ਕਰਦਿਆਂ ਇੱਕ ਸ਼ਾਨਦਾਰ ਸੈਂਕੜਾ ਜੜਿਆ ਅਤੇ 107 ਦੌੜਾਂ ਦੀ ਜ਼ਬਰਦਸਤ ਪਾਰੀ ਖੇਡੀ।
ਇਸ ਤੋਂ ਇਲਾਵਾ ਅਬਦੁਲ ਕਾਦਿਰ ਨੇ ਮਹਿਜ਼ 54 ਗੇਂਦਾਂ ਵਿੱਚ ਹੀ ਤੂਫ਼ਾਨੀ ਅੰਦਾਜ਼ ਵਿੱਚ 80 ਦੌੜਾਂ ਕੁੱਟ ਦਿੱਤੀਆਂ, ਜਿਸ ਵਿੱਚ 8 ਛੱਕੇ ਅਤੇ 3 ਚੌਕੇ ਸ਼ਾਮਲ ਸਨ। ਟੀਮ ਦੇ ਕਪਤਾਨ ਫਰਹਾਨ ਯੂਸਫ਼ ਨੇ ਵੀ 63 ਦੌੜਾਂ ਦਾ ਅਹਿਮ ਯੋਗਦਾਨ ਦਿੱਤਾ। ਨਿਰਧਾਰਤ ਓਵਰਾਂ ਵਿੱਚ ਪਾਕਿਸਤਾਨ ਨੇ 9 ਵਿਕਟਾਂ ਦੇ ਨੁਕਸਾਨ ਉੱਤੇ 337 ਦੌੜਾਂ ਦਾ ਵਿਸ਼ਾਲ ਸਕੋਰ ਖੜ੍ਹਾ ਕਰ ਦਿੱਤਾ ਅਤੇ ਭਾਰਤੀ ਟੀਮ ਉੱਤੇ ਸ਼ੁਰੂ ਤੋਂ ਹੀ ਭਾਰੀ ਦਬਾਅ ਬਣਾ ਦਿੱਤਾ।
ਭਾਰਤੀ ਗੇਂਦਬਾਜ਼ੀ ਦੀ ਗੱਲ ਕਰੀਏ ਤਾਂ ਕਾਵਿਆ ਪਟੇਲ ਨੇ 10 ਓਵਰਾਂ ਵਿੱਚ 68 ਦੌੜਾਂ ਦੇ ਕੇ 4 ਖਿਡਾਰੀਆਂ ਨੂੰ ਆਊਟ ਕੀਤਾ। ਇਸ ਤੋਂ ਇਲਾਵਾ ਵੈਂਕਟ ਨੇ 5 ਓਵਰਾਂ ਵਿੱਚ 40 ਦੌੜਾਂ ਦੇ ਕੇ 3 ਵਿਕਟਾਂ ਹਾਸਲ ਕੀਤੀਆਂ। ਅਰਜੁਨ ਰਾਜਪੂਤ ਨੇ ਵੀ ਇੱਕ ਵਿਕਟ ਆਪਣੇ ਨਾਂ ਕੀਤੀ, ਹਾਲਾਂਕਿ ਮਨਲ ਚੌਹਾਨ ਕਾਫ਼ੀ ਮਹਿੰਗੇ ਸਾਬਤ ਹੋਏ ਜਿਨ੍ਹਾਂ ਨੇ 3 ਓਵਰਾਂ ਵਿੱਚ 40 ਦੌੜਾਂ ਖਰਚ ਕੀਤੀਆਂ।
ਭਾਰਤੀ ਟੀਮ ਦੀ ਸ਼ਾਨਦਾਰ ਸ਼ੁਰੂਆਤ ਅਤੇ ਸੰਕਟ
ਵਿਸ਼ਾਲ ਟੀਚੇ ਦਾ ਪਿੱਛਾ ਕਰਨ ਉਤਰੀ ਭਾਰਤੀ ਟੀਮ ਨੇ ਬੇਹੱਦ ਮਜ਼ਬੂਤ ਸ਼ੁਰੂਆਤ ਕੀਤੀ। ਆਰੀਵੀਰ ਸਹਿਗਲ ਅਤੇ ਕਪਤਾਨ ਲਕਸ਼ ਰਾਏਚੰਦਾਨੀ ਨੇ ਪਹਿਲੇ ਵਿਕਟ ਲਈ 95 ਦੌੜਾਂ ਦੀ ਸ਼ਾਨਦਾਰ ਸਾਂਝੇਦਾਰੀ ਕੀਤੀ। ਆਰੀਵੀਰ ਸਹਿਗਲ ਨੇ 58 ਦੌੜਾਂ ਦੀ ਪ੍ਰਭਾਵਸ਼ਾਲੀ ਪਾਰੀ ਖੇਡੀ। ਹਾਲਾਂਕਿ, ਇਸ ਤੋਂ ਬਾਅਦ ਭਾਰਤੀ ਮੱਧਕ੍ਰਮ ਪੂਰੀ ਤਰ੍ਹਾਂ ਲੜਖੜਾ ਗਿਆ ਅਤੇ ਲਗਾਤਾਰ ਅੰਤਰਾਲ ਉੱਤੇ ਵਿਕਟਾਂ ਡਿੱਗਦੀਆਂ ਰਹੀਆਂ।
ਕਪਤਾਨ ਲਕਸ਼ ਵੀ 80 ਦੌੜਾਂ ਬਣਾ ਕੇ ਆਊਟ ਹੋ ਗਏ। ਇਸ ਤੋਂ ਤੁਰੰਤ ਬਾਅਦ ਅਨਵਯ ਦ੍ਰਵਿੜ ਵੀ ਰਨ ਆਊਟ ਹੋ ਗਏ, ਜਿਸ ਨਾਲ ਟੀਮ ਮੁਸ਼ਕਲ ਵਿੱਚ ਫਸ ਗਈ। ਇੱਕ ਸਮਾਂ ਅਜਿਹਾ ਆਇਆ ਜਦੋਂ ਭਾਰਤ ਦਾ ਸਕੋਰ ਸਿਰਫ਼ 252 ਦੌੜਾਂ ਉੱਤੇ 8 ਵਿਕਟਾਂ ਹੋ ਚੁੱਕਾ ਸੀ ਅਤੇ ਜਿੱਤ ਬਹੁਤ ਜ਼ਿਆਦਾ ਦੂਰ ਨਜ਼ਰ ਆ ਰਹੀ ਸੀ। ਭਾਰਤ ਨੂੰ ਜਿੱਤ ਲਈ ਅਜੇ ਵੀ 86 ਦੌੜਾਂ ਦੀ ਸਖ਼ਤ ਲੋੜ ਸੀ।
ਅਜਿਹੇ ਮੁਸ਼ਕਲ ਸਮੇਂ ਵਿੱਚ ਮਨਲ ਚੌਹਾਨ ਅਤੇ ਮੋਹਿਤ ਉਲਵਾ ਨੇ ਮੋਰਚਾ ਸੰਭਾਲਿਆ। ਦੋਵਾਂ ਨੇ ਬੇਹੱਦ ਜ਼ਿੰਮੇਵਾਰੀ ਅਤੇ ਹਿੰਮਤ ਨਾਲ ਬੱਲੇਬਾਜ਼ੀ ਕਰਦਿਆਂ ਮੈਚ ਦਾ ਰੁੱਖ ਪੂਰੀ ਤਰ੍ਹਾਂ ਭਾਰਤ ਵੱਲ ਮੋੜ ਦਿੱਤਾ। ਇਨ੍ਹਾਂ ਦੋਵਾਂ ਬੱਲੇਬਾਜ਼ਾਂ ਵਿਚਕਾਰ ਮਹਿਜ਼ 35 ਗੇਂਦਾਂ ਵਿੱਚ 57 ਦੌੜਾਂ ਦੀ ਤੂਫ਼ਾਨੀ ਸਾਂਝੇਦਾਰੀ ਹੋਈ। ਸਕੋਰ 309 ਦੌੜਾਂ ਉੱਤੇ ਪਹੁੰਚਣ ਤੋਂ ਬਾਅਦ ਮਨਲ ਚੌਹਾਨ ਆਊਟ ਹੋ ਕੇ ਪੈਵੇਲੀਅਨ ਪਰਤ ਗਏ। ਇਸ ਤੋਂ ਬਾਅਦ ਆਖਰੀ ਬੱਲੇਬਾਜ਼ ਵੈਂਕਟ ਮੈਦਾਨ ਉੱਤੇ ਆਏ ਅਤੇ ਆਉਂਦੇ ਹੀ ਦੋ ਸ਼ਾਨਦਾਰ ਚੌਕੇ ਜੜ ਦਿੱਤੇ।
ਆਖਰੀ ਓਵਰ ਵਿੱਚ ਭਾਰਤੀ ਟੀਮ ਨੂੰ ਜਿੱਤ ਲਈ 8 ਦੌੜਾਂ ਦੀ ਲੋੜ ਸੀ। ਪਹਿਲੀਆਂ ਪੰਜ ਗੇਂਦਾਂ ਵਿੱਚ ਸਿਰਫ਼ 5 ਦੌੜਾਂ ਹੀ ਬਣ ਸਕੀਆਂ, ਜਿਸ ਕਾਰਨ ਆਖਰੀ ਗੇਂਦ ਉੱਤੇ ਜਿੱਤ ਲਈ 3 ਦੌੜਾਂ ਬਾਕੀ ਰਹਿ ਗਈਆਂ। ਦਬਾਅ ਦੇ ਇਸ ਪਲਾਂ ਵਿੱਚ ਮੋਹਿਤ ਉਲਵਾ ਨੇ ਆਖਰੀ ਗੇਂਦ ਉੱਤੇ ਸ਼ਾਨਦਾਰ ਚੌਕਾ ਜੜ ਕੇ ਭਾਰਤੀ ਟੀਮ ਨੂੰ ਇਤਿਹਾਸਕ ਜਿੱਤ ਦਿਵਾ ਦਿੱਤੀ। ਮੋਹਿਤ ਉਲਵਾ 49 ਦੌੜਾਂ ਬਣਾ ਕੇ ਨਾਬਾਦ ਰਹੇ ਅਤੇ ਭਾਰਤ ਨੇ ਆਖਰੀ ਵਿਕਟ ਰਹਿੰਦਿਆਂ ਮੈਚ ਆਪਣੇ ਨਾਂ ਕਰ ਲਿਆ।
