Supply Updates: ਕੀ ਭਾਰਤ ‘ਚ ਤੇਲ ਅਤੇ ਰਸੋਈ ਗੈਸ ਦਾ ਸੰਕਟ? ਕੇਂਦਰ ਸਰਕਾਰ ਨੇ ਜਾਰੀ ਕੀਤੇ ਨਵੇਂ ਅੰਕੜੇ
ਦੇਸ਼ ਵਿੱਚ ਲੋੜ ਨਾਲੋਂ ਵੱਧ ਡੀਜ਼ਲ ਦਾ ਸਟਾਕ ਮੌਜੂਦ; ਅਫ਼ਵਾਹਾਂ ਕਾਰਨ ਪੰਪਾਂ ‘ਤੇ 25% ਤੱਕ ਵਧੀ ਭੀੜ
ਅਪ੍ਰੈਲ ਮਹੀਨੇ ‘ਚ 10 MMT ਡੀਜ਼ਲ ਦਾ ਹੋਇਆ ਉਤਪਾਦਨ, ਜਦੋਂ ਕਿ ਖਪਤ ਸਿਰਫ਼ 8 MMT ਰਹੀ
ਰਸੋਈ ਗੈਸ (LPG) ਦੀ ਸਪਲਾਈ ਨੂੰ ਲੈ ਕੇ ਵੀ ਸਰਕਾਰ ਨੇ ਸਥਿਤੀ ਕੀਤੀ ਸਾਫ਼; ਕਿਹਾ- ਚਿੰਤਾ ਦੀ ਕੋਈ ਲੋੜ ਨਹੀਂ
ਨਵੀਂ ਦਿੱਲੀ, 22 May 2026-
ਦੇਸ਼ ਦੇ ਕਈ ਹਿੱਸਿਆਂ ਵਿੱਚ ਪੈਟਰੋਲ ਪੰਪਾਂ ‘ਤੇ ਲੱਗੀਆਂ ਲੰਬੀਆਂ ਕਤਾਰਾਂ ਅਤੇ ਡੀਜ਼ਲ ਦੀ ਕਿੱਲਤ ਦੀਆਂ ਖ਼ਬਰਾਂ ਵਿਚਾਲੇ ਹੁਣ ਕੇਂਦਰ ਸਰਕਾਰ ਨੇ ਸਾਹਮਣੇ ਆ ਕੇ ਸਥਿਤੀ ਪੂਰੀ ਤਰ੍ਹਾਂ ਸਾਫ਼ ਕਰ ਦਿੱਤੀ ਹੈ।
ਸਰਕਾਰ ਨੇ ਦੇਸ਼ ਵਾਸੀਆਂ ਨੂੰ ਭਰੋਸਾ ਦਿਵਾਇਆ ਹੈ ਕਿ ਦੇਸ਼ ਵਿੱਚ ਤੇਲ ਦਾ ਭਰਪੂਰ ਸਟਾਕ ਮੌਜੂਦ ਹੈ ਅਤੇ ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ ਹੈ। ਅਫ਼ਵਾਹਾਂ ਕਾਰਨ ਲੋਕ ਘਬਰਾਹਟ ਵਿੱਚ ਆ ਕੇ ਲੋੜ ਨਾਲੋਂ ਵੱਧ ਤੇਲ ਖ਼ਰੀਦ ਰਹੇ ਹਨ, ਜਿਸ ਕਾਰਨ ਡੀਜ਼ਲ ਦੀ ਮੰਗ ਅਚਾਨਕ ਵਧ ਗਈ ਹੈ।
ਪੈਟਰੋਲੀਅਮ ਅਤੇ ਕੁਦਰਤੀ ਗੈਸ ਮੰਤਰਾਲੇ ਦੀ ਸੰਯੁਕਤ ਸਕੱਤਰ ਸੁਜਾਤਾ ਸ਼ਰਮਾ ਨੇ ਦੇਸ਼ ਵਿੱਚ ਡੀਜ਼ਲ ਦੇ ਉਤਪਾਦਨ ਅਤੇ ਖਪਤ ਦੇ ਅਧਿਕਾਰਤ ਅੰਕੜੇ ਜਾਰੀ ਕੀਤੇ ਹਨ। ਉਨ੍ਹਾਂ ਦੱਸਿਆ ਕਿ ਪਿਛਲੇ ਮਹੀਨੇ ਯਾਨੀ ਅਪ੍ਰੈਲ ਵਿੱਚ ਭਾਰਤ ਨੇ ਕੁੱਲ 10 ਮਿਲੀਅਨ ਮੀਟ੍ਰਿਕ ਟਨ (MMT) ਡੀਜ਼ਲ ਦਾ ਉਤਪਾਦਨ ਕੀਤਾ ਸੀ।
ਜਦੋਂ ਕਿ ਇਸ ਦੇ ਮੁਕਾਬਲੇ ਪੂਰੇ ਦੇਸ਼ ਵਿੱਚ ਸਿਰਫ਼ 8 ਮਿਲੀਅਨ ਮੀਟ੍ਰਿਕ ਟਨ (MMT) ਡੀਜ਼ਲ ਦੀ ਹੀ ਖਪਤ ਹੋਈ ਹੈ। ਇਨ੍ਹਾਂ ਅੰਕੜਿਆਂ ਤੋਂ ਸਾਫ਼ ਹੈ ਕਿ ਦੇਸ਼ ਵਿੱਚ ਲੋੜ ਨਾਲੋਂ 2 MMT ਵੱਧ ਡੀਜ਼ਲ ਤਿਆਰ ਹੋਇਆ ਹੈ, ਇਸ ਲਈ ਤੇਲ ਦੀ ਕਮੀ ਦਾ ਸਵਾਲ ਹੀ ਪੈਦਾ ਨਹੀਂ ਹੁੰਦਾ।
ਮੰਤਰਾਲੇ ਮੁਤਾਬਕ ਸਾਰੇ ਪੈਟਰੋਲ ਪੰਪਾਂ ‘ਤੇ ਡੀਜ਼ਲ ਦਾ ਪੂਰਾ ਸਟਾਕ ਉਪਲਬਧ ਹੈ। ਹਾਲਾਂਕਿ, ਅਫ਼ਵਾਹਾਂ ਦੇ ਚਲਦਿਆਂ ਪਿਛਲੇ ਕੁਝ ਦਿਨਾਂ ਵਿੱਚ ਪੈਟਰੋਲ ਪੰਪਾਂ ‘ਤੇ ਖ਼ਰੀਦਦਾਰਾਂ ਦੀ ਗਿਣਤੀ 20 ਤੋਂ 25 ਫ਼ੀਸਦੀ ਤੱਕ ਵਧ ਗਈ ਹੈ।
ਆਮ ਤੌਰ ‘ਤੇ ਹਰ ਪੈਟਰੋਲ ਪੰਪ ਕੋਲ 2 ਤੋਂ 3 ਦਿਨਾਂ ਦਾ ਐਡਵਾਂਸ ਸਟਾਕ ਹਮੇਸ਼ਾ ਰਹਿੰਦਾ ਹੈ, ਪਰ ਜਦੋਂ ਲੋਕ ਡਰ ਕੇ ਗੱਡੀਆਂ ਵਿੱਚ ਲੋੜ ਨਾਲੋਂ ਵੱਧ ਤੇਲ ਭਰਵਾਉਣ ਲੱਗਦੇ ਹਨ, ਤਾਂ ਸਪਲਾਈ ਚੇਨ ‘ਤੇ ਦਬਾਅ ਪੈਂਦਾ ਹੈ।
ਇਸੇ ਕਾਰਨ ਕੁਝ ਸਮੇਂ ਲਈ ਪੰਪਾਂ ‘ਤੇ ਤੇਲ ਖ਼ਤਮ ਹੋਇਆ ਦਿਖਾਈ ਦਿੰਦਾ ਹੈ। ਸਰਕਾਰ ਨੇ ਲੋਕਾਂ ਨੂੰ ਸੰਜਮ ਵਰਤਣ ਅਤੇ ਘਬਰਾਹਟ ਵਿੱਚ ਆ ਕੇ ਤੇਲ ਦਾ ਸਟਾਕ ਨਾ ਕਰਨ ਦੀ ਅਪੀਲ ਕੀਤੀ ਹੈ।
ਰਸੋਈ ਗੈਸ (LPG) ਨੂੰ ਲੈ ਕੇ ਵੀ ਦਿੱਤੀ ਸਫ਼ਾਈ
ਰਸੋਈ ਗੈਸ ਦੀ ਸਥਿਤੀ ਬਾਰੇ ਗੱਲ ਕਰਦਿਆਂ ਸੰਯੁਕਤ ਸਕੱਤਰ ਨੇ ਦੱਸਿਆ ਕਿ ਭਾਰਤ ਆਪਣੀ ਲੋੜ ਦਾ ਲਗਭਗ 60 ਫ਼ੀਸਦੀ ਐਲ.ਪੀ.ਜੀ. (LPG) ਵਿਦੇਸ਼ਾਂ ਤੋਂ ਆਯਾਤ ਕਰਦਾ ਹੈ।
ਆਯਾਤ ‘ਤੇ ਇੰਨੀ ਵੱਡੀ ਨਿਰਭਰਤਾ ਹੋਣ ਦੇ ਬਾਵਜੂਦ ਸਰਕਾਰ ਨੇ ਅਜਿਹੇ ਪੁਖ਼ਤਾ ਇੰਤਜ਼ਾਮ ਕੀਤੇ ਹਨ ਕਿ ਘਰੇਲੂ ਉਪਭੋਗਤਾਵਾਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਕਿੱਲਤ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ।
ਪੈਟਰੋਲੀਅਮ ਮੰਤਰਾਲੇ ਅਤੇ ਤੇਲ ਕੰਪਨੀਆਂ ਨੇ ਸਪੱਸ਼ਟ ਕੀਤਾ ਹੈ ਕਿ ਦੇਸ਼ ਦੇ ਕੋਨੇ ਕੋਨੇ ਵਿੱਚ ਸਪਲਾਈ ਲਗਾਤਾਰ ਜਾਰੀ ਰਹੇਗੀ। ਨਾਗਰਿਕ ਅਫ਼ਵਾਹਾਂ ‘ਤੇ ਬਿਲਕੁਲ ਧਿਆਨ ਨਾ ਦੇਣ ਅਤੇ ਆਮ ਦਿਨਾਂ ਵਾਂਗ ਹੀ ਖ਼ਰੀਦਦਾਰੀ ਕਰਨ।
