ਰਾਖੀ ਕਤਲ ਕਾਂਡ; ਭਾਜਪਾ ਆਗੂ ਗ੍ਰਿਫ਼ਤਾਰ
ਫਾਰਮ ਹਾਊਸ ਦੀਆਂ ਦੀਵਾਰਾਂ ‘ਤੇ ਅੱਜ ਵੀ ਮੌਜੂਦ ਹਨ ਖ਼ੂਨ ਦੇ ਛਿੱਟੇ
ਸਹਾਰਨਪੁਰ/ਬਾਗਪਤ, 2 ਮਈ 2026: ਬਾਗਪਤ ਦੇ ਮਿਸ਼ਨ ਮੈਨੇਜਰ ਵਿਕਰਾਂਤ ਅਤੇ ਉਸ ਦੀ ਪ੍ਰੇਮਿਕਾ ਰਾਖੀ ਕਸ਼ਯਪ ਦੇ ਦੋਹਰੇ ਕਤਲ ਕਾਂਡ ਵਿੱਚ ਪੁਲਿਸ ਨੇ ਵੱਡੀ ਸਫਲਤਾ ਹਾਸਲ ਕੀਤੀ ਹੈ। ਪੁਲਿਸ ਨੇ ਇਸ ਮਾਮਲੇ ਦੇ ਮੁੱਖ ਮੁਲਜ਼ਮ ਅਤੇ ਭਾਜਪਾ ਯੁਵਾ ਮੋਰਚਾ ਦੇ ਸਾਬਕਾ ਨਗਰ ਪ੍ਰਧਾਨ ਸੁਧਾਰਸ ਚੌਹਾਨ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸ ਦਾ ਸਾਥੀ ਕਪਿਲ ਚੌਹਾਨ ਪਹਿਲਾਂ ਹੀ ਪੁਲਿਸ ਦੀ ਗ੍ਰਿਫ਼ਤ ਵਿੱਚ ਹੈ।
ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਰਾਖੀ ਕਸ਼ਯਪ ਦਾ ਕਤਲ ਸਹਾਰਨਪੁਰ ਦੇ ਨੌਗਾਂਵਾ ਸਥਿਤ ਇੱਕ ਫਾਰਮ ਹਾਊਸ ਵਿੱਚ ਬੇਹੱਦ ਬੇਰਹਿਮੀ ਨਾਲ ਕੀਤਾ ਗਿਆ ਸੀ। ਫਾਰਮ ਹਾਊਸ ਦੀਆਂ ਦੀਵਾਰਾਂ ‘ਤੇ ਅੱਜ ਵੀ ਖ਼ੂਨ ਦੇ ਛਿੱਟੇ ਲੱਗੇ ਹੋਏ ਹਨ। ਪੋਸਟਮਾਰਟਮ ਰਿਪੋਰਟ ਮੁਤਾਬਕ ਰਾਖੀ ਦਾ ਪਹਿਲਾਂ ਗਲਾ ਵੱਢਿਆ ਗਿਆ ਅਤੇ ਫਿਰ ਸੀਨੇ ਤੇ ਪਿੱਠ ‘ਤੇ ਚਾਕੂਆਂ ਨਾਲ ਕਈ ਵਾਰ ਕੀਤੇ ਗਏ।
ਮੁਲਜ਼ਮਾਂ ਨੇ ਕਤਲ ਲਈ ਆਪਣੇ ਫਾਰਮ ਹਾਊਸ ਦੀ ਬਜਾਏ ਦੇਹਰਾਦੂਨ ਦੇ ਇੱਕ ਵਿਅਕਤੀ ਦਾ ਫਾਰਮ ਹਾਊਸ ਚੁਣਿਆ। ਵਾਰਦਾਤ ਤੋਂ ਬਾਅਦ ਲਾਸ਼ ਨੂੰ ਚੌਕੀਦਾਰ ਦੇ ਬਿਸਤਰੇ ਵਿੱਚ ਲਪੇਟ ਕੇ ਨਹਿਰ ਵਿੱਚ ਸੁੱਟ ਦਿੱਤਾ ਗਿਆ। ਪੁਲਿਸ ਨੇ ਫਾਰਮ ਹਾਊਸ ਦੇ ਚੌਕੀਦਾਰ ਨੂੰ ਵੀ ਹਿਰਾਸਤ ਵਿੱਚ ਲਿਆ ਹੈ, ਜਿਸ ਤੋਂ ਪੁੱਛਗਿੱਛ ਜਾਰੀ ਹੈ।
ਵਿਕਰਾਂਤ ਦਾ ਕਤਲ ਅਤੇ ਪਾਰਟੀ ਦਾ ਵਿਵਾਦ
ਪੁਲਿਸ ਮੁਤਾਬਕ ਵਿਕਰਾਂਤ ਅਤੇ ਰਾਖੀ ਪ੍ਰੇਮ ਸਬੰਧਾਂ ਵਿੱਚ ਸਨ ਅਤੇ ਸ਼ਾਦੀ ਕਰਨਾ ਚਾਹੁੰਦੇ ਸਨ। ਰਾਖੀ ਦੇ ਘਰ ਹੋਈ ਇੱਕ ਪਾਰਟੀ ਦੌਰਾਨ ਕਿਸੇ ਗੱਲ ਨੂੰ ਲੈ ਕੇ ਵਿਵਾਦ ਹੋਇਆ। ਇਸ ਤੋਂ ਬਾਅਦ ਸੁਧਾਰਸ ਅਤੇ ਕਪਿਲ, ਵਿਕਰਾਂਤ ਨੂੰ ਸਹਾਰਨਪੁਰ ਲੈ ਗਏ, ਜਿੱਥੇ ਉਸ ਦੇ ਮੂੰਹ ‘ਤੇ ਪੱਥਰ ਮਾਰ ਕੇ ਉਸ ਦਾ ਕਤਲ ਕਰ ਦਿੱਤਾ ਗਿਆ ਅਤੇ ਲਾਸ਼ ਨਹਿਰ ਵਿੱਚ ਸੁੱਟ ਦਿੱਤੀ ਗਈ।
ਰਾਖੀ ਦਾ ਕਤਲ ਕਿਉਂ ਕੀਤਾ?
ਵਿਕਰਾਂਤ ਦੇ ਲਾਪਤਾ ਹੋਣ ਤੋਂ ਬਾਅਦ ਜਦੋਂ ਪੁਲਿਸ ਨੇ ਰਾਖੀ ਤੋਂ ਪੁੱਛਗਿੱਛ ਸ਼ੁਰੂ ਕੀਤੀ, ਤਾਂ ਭਾਜਪਾ ਆਗੂ ਸੁਧਾਰਸ ਨੂੰ ਫਸਣ ਦਾ ਡਰ ਸਤਾਉਣ ਲੱਗਾ। ਆਪਣੇ ਆਪ ਨੂੰ ਬਚਾਉਣ ਲਈ ਉਸ ਨੇ 25 ਅਪ੍ਰੈਲ ਦੀ ਰਾਤ ਨੂੰ ਰਾਖੀ ਨੂੰ ਫਾਰਮ ਹਾਊਸ ‘ਤੇ ਲਿਜਾ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ।
ਗ੍ਰਿਫ਼ਤਾਰੀ ਤੋਂ ਪਹਿਲਾਂ ਸੁਧਾਰਸ ਚੌਹਾਨ ਦੇ ਪਰਿਵਾਰ ਨੂੰ ਉਸ ਦੇ ਐਨਕਾਊਂਟਰ ਦਾ ਡਰ ਸਤਾ ਰਿਹਾ ਸੀ। ਉਸ ਦੀ ਪਤਨੀ ਕੋਮਲ ਨੇ ਮੁੱਖ ਮੰਤਰੀ ਅਤੇ ਮਨੁੱਖੀ ਅਧਿਕਾਰ ਕਮਿਸ਼ਨ ਨੂੰ ਸ਼ਿਕਾਇਤ ਭੇਜ ਕੇ ਪਤੀ ਦੀ ਸੁਰੱਖਿਆ ਅਤੇ ਨਿਰਪੱਖ ਜਾਂਚ ਦੀ ਮੰਗ ਕੀਤੀ ਸੀ।
ਪੁਲਿਸ ਨੇ ਸੁਧਾਰਸ ਦੀ ਨਿਸ਼ਾਨਦੇਹੀ ‘ਤੇ ਕਤਲ ਵਿੱਚ ਵਰਤਿਆ ਖ਼ੂਨ ਨਾਲ ਲਿਬੜਿਆ ਹਥਿਆਰ (ਦਾਵ) ਅਤੇ ਸੀਸੀਟੀਵੀ ਦੀ ਡੀਵੀਆਰ ਬਰਾਮਦ ਕਰ ਲਈ ਹੈ। ਐਸਪੀ ਦੇਹਾਤ ਮਯੰਕ ਪਾਠਕ ਨੇ ਦੱਸਿਆ ਕਿ ਮਾਮਲੇ ਦੀ ਜਾਂਚ ਬਾਰੀਕੀ ਨਾਲ ਜਾਰੀ ਹੈ।
