ਦਿੱਲੀ ‘ਚ ਅਗਵਾ ਕੀਤੇ ਵਿਦਿਆਰਥੀਆਂ ਤੇ ਹੋਰ ਜਮਹੂਰੀ ਕਾਰਕੁਨਾਂ ਨੂੰ ਤੁਰੰਤ ਰਿਹਾ ਕੀਤਾ ਜਾਵੇ- ਜਮਹੂਰੀ ਫਰੰਟ
New Delhi, 14 March 2026-
ਓਪਰੇਸ਼ਨ ਗ੍ਰੀਨ ਹੰਟ ਵਿਰੋਧੀ ਜਮਹੂਰੀ ਫਰੰਟ ਦੀ ਸੂਬਾ ਕਮੇਟੀ ਨੇ ਕੱਲ੍ਹ ਦਿੱਲੀ ਵਿਚ ਮਜ਼ਦੂਰ ਅਧਿਕਾਰ ਕਾਰਕੁਨਾਂ ਅਤੇ ਹੋਰ ਜਮਹੂਰੀ ਕਾਰਕੁਨਾਂ ਨੂੰ ਖ਼ੁਫ਼ੀਆ ਏਜੰਸੀਆਂ ਵੱਲੋਂ ਗ਼ੈਰਕਾਨੂੰਨੀ ਤੌਰ ‘ਤੇ ਚੁੱਕਣ ਦੀ ਸਖ਼ਤ ਸ਼ਬਦਾਂ ਵਿਚ ਨਿਖੇਧੀ ਕੀਤੀ ਹੈ। ਹਕੂਮਤੀ ਜਬਰ ਵਿਰੁੱਧ ਮੁਹਿੰਮ (ਸੀਏਐੱਸਆਰ) ਵੱਲੋਂ ਜਾਰੀ ਕੀਤੇ ਅਲਰਟ ਅਨੁਸਾਰ ਕੱਲ੍ਹ ਦਿੱਲੀ ਵਿੱਚ ਵਿਦਿਆਰਥੀਆਂ ਅਤੇ ਕਾਰਕੁਨਾਂ ਦੇ ਲਾਪਤਾ ਹੋਣ ਦਾ ਗੰਭੀਰ ਵਰਤਾਰਾ ਸਾਹਮਣੇ ਆਇਆ ਹੈ।
ਇਹ ਹਮਲਾ 12 ਮਾਰਚ ਨੂੰ ਐਡਵੋਕੇਟ ਸੁਰਿੰਦਰ ਗਾਰਡਿੰਗ ਦੀ ਪਿਛਲੇ 7 ਸਾਲ ਤੋਂ ਝੂਠੇ ਕੇਸਾਂ ਤਹਿਤ ਜੇਲ੍ਹਬੰਦੀ ਵਿਰੁੱਧ ਆਵਾਜ਼ ਉਠਾਉਣ ਅਤੇ ਉਸ ਨਾਲ ਇਕਮੁੱਠਤਾ ਪ੍ਰਗਟਾਉਣ ਲਈ ਸੀਏਐੱਸਆਰ ਵੱਲੋਂ ਦਿੱਲੀ ਵਿਚ ਆਯੋਜਤ ਕੀਤੀ ਜਨਤਕ ਇਕੱਤਰਤਾ ਤੋਂ ਬੌਖਲਾ ਕੇ ਜਮਹੂਰੀ ਆਵਾਜ਼ਾਂ ਨੂੰ ਦਹਿਸ਼ਤਜ਼ਦਾ ਕਰਨ ਲਈ ਕੀਤਾ ਗਿਆ ਹੈ।
12 ਮਾਰਚ ਨੂੰ ਦਿਆਲ ਸਿੰਘ ਕਾਲਜ ਵਿਚ ਸੰਪਰਕ ਕਰਨ ਲਈ ਗਈ ਵਿਦਿਆਰਥੀ ਕਾਰਕੁਨ ਇਲਕੀਆ (ਜੋ ਦਿੱਲੀ ਯੂਨੀਵਰਸਿਟੀ ਵਿੱਚ ਮਨੋਵਿਗਿਆਨ ਦੀ ਮਾਸਟਰ ਡਿਗਰੀ ਦੀ ਵਿਦਿਆਰਥਣ ਅਤੇ ਭਗਤ ਸਿੰਘ ਛਾਤਰ ਏਕਤਾ ਮੰਚ ਦੀ ਕਾਰਕੁਨ ਹੈ, ਅਤੇ ਮਜ਼ਦੂਰ ਅਧਿਕਾਰ ਸੰਗਠਨ ਕੁੰਡਲੀ-ਸੋਨੀਪਤ ਦੇ ਮਜ਼ਦੂਰ ਕਾਰਕੁਨ ਸ਼ਿਵ ਕੁਮਾਰ ਨੂੰ ਦੁਪਹਿਰ ਲਗਭਗ 1 ਵਜੇ ਡੀਐੱਸਸੀ/ਜੇਐੱਲਐੱਨ ਮੈਟਰੋ ਗੇਟ ਦੇ ਬਾਹਰੋਂ ਚੁੱਕ ਲਿਆ ਗਿਆ।
ਨੇੜੇ ਮੌਜੂਦ ਦੁਕਾਨਦਾਰਾਂ ਅਨੁਸਾਰ ਸਾਦੇ ਕੱਪੜਿਆਂ ਵਿੱਚ ਕਿਸੇ ਖੁਫ਼ੀਆ ਏਜੰਸੀ ਦੀ 3-4 ਮੈਂਬਰੀ ਟੀਮ ਵੱਲੋਂ ਉਨ੍ਹਾਂ ਨੂੰ ਜਬਰਦਸਤੀ ਸਕਾਰਪਿਓ ਗੱਡੀ ਵਿੱਚ ਬਿਠਾ ਕੇ ਲਿਜਾਇਆ ਗਿਆ। ਉਸ ਤੋਂ ਬਾਅਦ ਦੋਹਾਂ ਦੇ ਫੋਨ ਬੰਦ ਹਨ ਅਤੇ ਉਨ੍ਹਾਂ ਨਾਲ ਕੋਈ ਸੰਪਰਕ ਨਹੀਂ ਹੋ ਰਿਹਾ। ਉਸੇ ਦਿਨ ਸ਼ਾਮ ਤੋਂ ਮਜ਼ਦੂਰ ਅਧਿਕਾਰ ਸੰਗਠਨ ਦੇ ਕਾਰਕੁਨ ਮਨਜੀਤ ਕੁਮਾਰ ਵੀ ਲਾਪਤਾ ਹਨ ਜੋ ਸੀਏਐੱਸਆਰ ਦੇ ਪ੍ਰੋਗਰਾਮ ਤੋਂ ਵਾਪਸ ਆਉਣ ਤੋਂ ਬਾਅਦ ਆਪਣੇ ਘਰ ਨਹੀਂ ਪਹੁੰਚੇ।
ਇਹ ਵੀ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਦਿੱਲੀ ਯੂਨੀਵਰਸਿਟੀ ਨਾਰਥ ਕੈਂਪਸ ਦੇ ਵਿਜੇ ਨਗਰ ਡਬਲ ਸਟੋਰੀ ਇਲਾਕੇ ਤੋਂ ਹੋਰ ਕਈ ਵਿਦਿਆਰਥੀਆਂ ਅਤੇ ਕਾਰਕੁਨਾਂ ਨੂੰ ਵੀ ਪੁਲਿਸ ਚੁੱਕ ਕੇ ਲੈ ਗਈ ਹੈ ਜਿਨ੍ਹਾਂ ਵਿਚ ਭਗਤ ਸਿੰਘ ਛਾਤਰ ਏਕਤਾ ਮੰਚ ਦੇ ਕਾਰਕੁਨ ਅਕਸ਼ੈ, ਦ੍ਰਿਸ਼ਟੀ, ਰੁਦਰ, ਕਿਰਨ ਤੇ ਗੌਰਵ ਅਤੇ ਕਾਰਪੋਰੇਟੀਕਰਨ ਤੇ ਫ਼ੌਜੀਕਰਨ ਵਿਰੁੱਧ ਫੋਰਮ ਦੀ ਕਾਰਕੁਨ ਬਾਦਲ ਅਤੇ ਐਡਵੋਕੇਟ ਏਹਤਮਾਮ ਸ਼ਾਮਲ ਹਨ।
ਕੁਲ ਮਿਲਾ ਕੇ 10 ਵਿਦਿਆਰਥੀ ਅਤੇ ਕਾਰਕੁਨ ਲਾਪਤਾ ਹਨ। ਇਨ੍ਹਾਂ ਸਾਰੇ ਹੀ ਕਾਰਕੁਨਾਂ ਨੂੰ ਪਿਛਲੇ ਸਮੇਂ ਵਿਚ ਵੱਖ-ਵੱਖ ਝੂਠੇ ਕੇਸਾਂ ਤਹਿਤ ਦਿੱਲੀ ਪੁਲਿਸ ਦੇ ਵਿਸ਼ੇਸ਼ ਸੈੱਲ ਅਤੇ ਹੋਰ ਜਾਂਚ ਏਜੰਸੀਆਂ ਵੱਲੋਂ ਹਿਰਾਸਤ ਵਿਚ ਲੈ ਕੇ ਵਹਿਸ਼ੀ ਤਸ਼ੱਦਦ ਕੀਤਾ ਗਿਆ ਹੈ। ਫਰੰਟ ਮੰਗ ਕਰਦਾ ਹੈ ਕਿ ਹੁਣ ਇਨ੍ਹਾਂ ਸਾਰਿਆਂ ਨੂੰ ਕਿਸ ਏਜੰਸੀ ਵੱਲੋਂ ਚੁੱਕਿਆ ਗਿਆ ਹੈ, ਕਿੱਥੇ ਰੱਖਿਆ ਗਿਆ ਹੈ, ਇਸ ਬਾਰੇ ਦਿੱਲੀ ਪੁਲਿਸ ਦੇ ਅਧਿਕਾਰੀ ਜਾਣਕਾਰੀ ਤੁਰੰਤ ਜਨਤਕ ਕਰਨ, ਉਨ੍ਹਾਂ ਨੂੰ ਤੁਰੰਤ ਬਿਨਾਂ ਸ਼ਰਤ ਰਿਹਾ ਕੀਤਾ ਜਾਵੇ।
ਆਦਿਵਾਸੀਆਂ ਅਤੇ ਕਮਿਊਨਿਸਟ ਇਨਕਲਾਬੀਆਂ ਉੱਪਰ ਜਬਰ ਅਤੇ ਕਾਰਪੋਰੇਟ ਹਿਤੈਸ਼ੀ ਆਰਥਕ ਮਾਡਲ ਵਿਰੁੱਧ ਆਵਾਜ਼ ਉਠਾ ਰਹੇ ਵਿਦਿਆਰਥੀ ਤੇ ਹੋਰ ਜਮਹੂਰੀ ਕਾਰਕੁਨਾਂ ਦੀ ਜ਼ੁਬਾਨਬੰਦੀ ਲਈ ਗਿ੍ਰਫ਼ਤਾਰੀ ਅਤੇ ਹਮਲੇ ਬੰਦ ਕੀਤੇ ਜਾਣ, ਆਲੋਚਕ ਆਵਾਜ਼ਾਂ ਨੂੰ ਦਬਾਉਣ ਲਈ ਤਾਇਨਾਤ ਐੱਨਆਈਏ ਭੰਗ ਕੀਤੀ ਜਾਵੇ ਅਤੇ ਯੂਏਪੀਏ ਸਮੇਤ ਤਮਾਮ ਕਾਲੇ ਕਾਨੂੰਨ ਰੱਦ ਕੀਤੇ ਜਾਣ। ਜੇਲ੍ਹਾਂ ਵਿਚ ਡੱਕੇ ਸਾਰੇ ਹੀ ਜਮਹੂਰੀ ਕਾਰਕੁਨਾਂ ਤੇ ਬੁੱਧੀਜੀਵੀਆਂ ਨੂੰ ਤੁਰੰਤ ਰਿਹਾ ਕੀਤਾ ਜਾਵੇ।
