ਅਧਿਆਪਕਾਂ ਦੀਆਂ ਬਦਲੀਆਂ ਦਾ ਮਸਲਾ: ETT 6635 ਅਤੇ 4161 ਮਾਸਟਰ ਕੇਡਰ ਯੂਨੀਅਨ ਵੱਲੋਂ DPI ਦਫ਼ਤਰ ਦਾ ਘਿਰਾਓ
ਚੰਡੀਗੜ੍ਹ/ਮੋਹਾਲੀ, 22 ਜੂਨ 2026-
ਅੱਜ ਈ.ਟੀ.ਟੀ. 6635 ਅਧਿਆਪਕ ਯੂਨੀਅਨ ਪੰਜਾਬ ਅਤੇ 4161 ਮਾਸਟਰ ਕੇਡਰ ਯੂਨੀਅਨ ਪੰਜਾਬ ਵੱਲੋਂ ਅਧਿਆਪਕਾਂ ਦੀਆਂ ਬਦਲੀਆਂ (ਟਰਾਂਸਫਰ) ਦੇ ਵਿੱਚ ਆ ਰਹੀਆਂ ਤਕਨੀਕੀ ਅਤੇ ਪ੍ਰਸ਼ਾਸਨਿਕ ਮੁਸ਼ਕਿਲਾਂ ਦੇ ਸੰਬੰਧ ਵਿੱਚ ਡੀ.ਪੀ.ਆਈ. ਸੈਕੰਡਰੀ ਦਫ਼ਤਰ ਦਾ ਵਿਸ਼ਾਲ ਘਿਰਾਓ ਕੀਤਾ ਗਿਆ।
ਅਧਿਆਪਕ ਆਗੂਆਂ ਦੇ ਤਿੱਖੇ ਰੋਸ ਨੂੰ ਵੇਖਦੇ ਹੋਏ ਵਿਭਾਗ ਦੇ ਉੱਚ ਅਧਿਕਾਰੀਆਂ ਵੱਲੋਂ ਯੂਨੀਅਨ ਦੇ ਵਫ਼ਦ ਨਾਲ ਤੁਰੰਤ ਮੀਟਿੰਗ ਕੀਤੀ ਗਈ। ਇਸ ਮੌਕੇ ਟਰਾਂਸਫਰ ਸੈੱਲ ਦੇ AD ਮਹੇਸ਼ ਕੁਮਾਰ ਅਤੇ ਡੀ.ਪੀ.ਆਈ. ਐਲੀਮੈਂਟਰੀ ਮੈਡਮ ਹਰਕੀਰਤ ਕੌਰ ਚਾਨੇ ਨਾਲ ਅਧਿਆਪਕਾਂ ਦੀਆਂ ਮੰਗਾਂ ਨੂੰ ਲੈ ਕੇ ਵਿਸਥਾਰਪੂਰਵਕ ਚਰਚਾ ਹੋਈ।
ਮੀਟਿੰਗ ਦੌਰਾਨ ਯੂਨੀਅਨ ਦੇ ਦਬਾਅ ਸਦਕਾ ਡੀ.ਡੀ.ਓ. (DDO) ਵੱਲੋਂ ਅਧਿਆਪਕਾਂ ਦੇ ਰਿਜੈਕਟ ਕੀਤੇ ਗਏ ਡਾਟਾ ਦੀ ਸਮੱਸਿਆ ਦਾ ਮੌਕੇ ’ਤੇ ਹੀ ਪ੍ਰਸ਼ਾਸਨਿਕ ਹੱਲ ਕਰਵਾਇਆ ਗਿਆ।
ਬੀ.ਐੱਲ.ਓ. (BLO) ਅਤੇ ਜਨਗਣਨਾ (Census) ਡਿਊਟੀ ‘ਤੇ ਤਾਇਨਾਤ ਅਧਿਆਪਕਾਂ ਨੂੰ ਬਾਕੀ ਅਧਿਆਪਕਾਂ ਵਾਂਗ ਬਦਲੀ ਪ੍ਰਕਿਰਿਆ ਵਿੱਚ ਬਰਾਬਰ (ਸਮਾਨ) ਮੌਕਾ ਦੇਣ ਦੀ ਮੰਗ ਪ੍ਰਵਾਨ ਕਰ ਲਈ ਗਈ ਹੈ। ਅਧਿਕਾਰੀਆਂ ਨੇ ਭਰੋਸਾ ਦਿੱਤਾ ਕਿ ਇਹਨਾਂ ਅਧਿਆਪਕਾਂ ਨੂੰ ਬਦਲੀ ਦਾ ਲਾਭ ਦਿੱਤਾ ਜਾਵੇਗਾ, ਚਾਹੇ ਇਹਨਾਂ ਨੂੰ ਮੌਜੂਦਾ ਡਿਊਟੀ ਕਾਰਨ ਰਿਲੀਵ ਬਾਅਦ ਵਿੱਚ ਕਰ ਦਿੱਤਾ ਜਾਵੇ।
ਇਸ ਮੌਕੇ ਯੂਨੀਅਨ ਦੇ ਮੁੱਖ ਆਗੂਆਂ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਅਧਿਆਪਕਾਂ ਦੇ ਹੱਕਾਂ ਦੀ ਰਾਖੀ ਲਈ ਸੰਘਰਸ਼ ਹਮੇਸ਼ਾ ਜਾਰੀ ਰਹੇਗਾ ਅਤੇ ਕਿਸੇ ਵੀ ਅਧਿਆਪਕ ਨਾਲ ਬਦਲੀ ਪ੍ਰਕਿਰਿਆ ਵਿੱਚ ਬੇਇਨਸਾਫ਼ੀ ਨਹੀਂ ਹੋਣ ਦਿੱਤੀ ਜਾਵੇਗੀ।
ਇਸ ਮੌਕੇ ‘ਤੇ ਦੀਪਕ ਕੰਬੋਜ, ਕੁਲਦੀਪ ਖੋਖਰ, ਰਵਿੰਦਰ ਕੰਬੋਜ਼, ਦਾਨਿਸ਼ ਭੱਟੀ, ਸੁਰੇਸ਼ ਕੁਮਾਰ ਸੋਨੀ, ਸੰਦੀਪ ਗਿੱਲ, ਗੁਰਦਾਸ ਮਾਨਸਾ, ਡੀ.ਟੀ.ਐੱਫ. (DTF) ਤੋਂ ਰੁਪਿੰਦਰ ਪਾਲ ਗਿੱਲ, ਜਸਵਿੰਦਰ ਅਤਿਆਣਾ ਅਤੇ ਇਕਬਾਲ ਸਿੰਘ ਸਮੇਤ ਵੱਡੀ ਗਿਣਤੀ ਵਿੱਚ ਅਧਿਆਪਕ ਸਾਥੀ ਹਾਜ਼ਰ ਸਨ।
