ਪੰਜਾਬ ‘ਚ ਬਿਜਲੀ ਸੰਕਟ ਦਾ ਖ਼ਦਸ਼ਾ! ਲਹਿਰਾ ਮੁਹੱਬਤ ਥਰਮਲ ਪਲਾਂਟ ਦੇ ਚਾਰੇ ਯੂਨਿਟ ਮੁਕੰਮਲ ਠੱਪ
ਪੀ.ਐਸ.ਪੀ.ਸੀ.ਐਲ. (PSPCL) ਦੇ ਅਧੀਨ ਆਉਣ ਦੀ ਮੰਗ ਨੂੰ ਲੈ ਕੇ 1,800 ਠੇਕਾ ਮੁਲਾਜ਼ਮ 16 ਜੂਨ ਤੋਂ ਹਨ ਮੁਕੰਮਲ ਹੜਤਾਲ ‘ਤੇ- ਤਿੰਨ ਯੂਨਿਟ ਪਹਿਲਾਂ ਹੀ ਸਨ ਬੰਦ; ਚੌਥਾ ਯੂਨਿਟ ਵੀ ਭਾਰੀ ਮਾਤਰਾ ਵਿੱਚ ਸੁਆਹ (Fly Ash) ਜਮ੍ਹਾਂ ਹੋਣ ਕਾਰਨ ਐਤਵਾਰ ਨੂੰ ਹੋਇਆ ਠੱਪ
ਬਠਿੰਡਾ/ਲਹਿਰਾ ਮੁਹੱਬਤ, 21 ਜੂਨ 2026:
ਪੰਜਾਬ ਵਿੱਚ ਚੱਲ ਰਹੀ ਰਿਕਾਰਡਤੋੜ ਗਰਮੀ ਅਤੇ ਝੋਨੇ ਦੀ ਲਵਾਈ ਦੇ ਅਹਿਮ ਸੀਜ਼ਨ ਦਰਮਿਆਨ ਬਠਿੰਡਾ ਜ਼ਿਲ੍ਹੇ ਦੇ ਪਿੰਡ ਲਹਿਰਾ ਮੁਹੱਬਤ ਸਥਿਤ 920 ਮੈਗਾਵਾਟ ਦੀ ਸਮਰੱਥਾ ਵਾਲੇ ‘ਗੁਰੂ ਹਰਗੋਬਿੰਦ ਥਰਮਲ ਪਲਾਂਟ’ (GHTP) ਤੋਂ ਇੱਕ ਬੇਹੱਦ ਚਿੰਤਾਜਨਕ ਖ਼ਬਰ ਸਾਹਮਣੇ ਆਈ ਹੈ। ਪਲਾਂਟ ਦੇ ਸਾਰੇ ਚਾਰੇ ਯੂਨਿਟ ਪੂਰੀ ਤਰ੍ਹਾਂ ਬੰਦ ਹੋ ਗਏ ਹਨ, ਜਿਸ ਕਾਰਨ ਸੂਬੇ ਵਿੱਚ ਬਿਜਲੀ ਦੀ ਸਪਲਾਈ ਅਤੇ ਉਤਪਾਦਨ ਨੂੰ ਲੈ ਕੇ ਵੱਡਾ ਸੰਕਟ ਖੜ੍ਹਾ ਹੋਣ ਦਾ ਖ਼ਦਸ਼ਾ ਪੈਦਾ ਹੋ ਗਿਆ ਹੈ।
ਪਲਾਂਟ ਦੇ ਤਿੰਨ ਯੂਨਿਟ ਪਹਿਲਾਂ ਹੀ ਵੱਖ-ਵੱਖ ਗੜਬੜੀਆਂ ਕਾਰਨ ਬੰਦ ਸਨ, ਜਦੋਂਕਿ ਚੌਥਾ ਅਤੇ ਆਖ਼ਰੀ ਚੱਲ ਰਿਹਾ ਯੂਨਿਟ ਵੀ ਐਤਵਾਰ ਨੂੰ ਭਾਰੀ ਮਾਤਰਾ ਵਿੱਚ ਸੁਆਹ ਜਮ੍ਹਾਂ ਹੋਣ ਕਾਰਨ ਬੰਦ ਕਰਨਾ ਪਿਆ ਹੈ। ਇਸ ਵੱਡੀ ਤਕਨੀਕੀ ਖ਼ਰਾਬੀ ਅਤੇ ਯੂਨਿਟਾਂ ਦੇ ਠੱਪ ਹੋਣ ਪਿੱਛੇ ਪਲਾਂਟ ਵਿੱਚ ਚੱਲ ਰਹੀ ਮੁਲਾਜ਼ਮਾਂ ਦੀ ਹੜਤਾਲ ਨੂੰ ਮੁੱਖ ਕਾਰਨ ਮੰਨਿਆ ਜਾ ਰਿਹਾ ਹੈ।
ਟ੍ਰਿਬਿਊਨ ਦੀ ਰਿਪੋਰਟ ਮੁਤਾਬਿਕ, ਥਰਮਲ ਪਲਾਂਟ ਦੇ ਲਗਭਗ 1,800 ਠੇਕਾ ਮੁਲਾਜ਼ਮ (ਕੰਟਰੈਕਟ ਵਰਕਰ) ਇਸ ਵੇਲੇ ਹੜਤਾਲ ‘ਤੇ ਹਨ। ਚਾਰੇ ਯੂਨਿਟਾਂ ਦੇ ਮੁਕੰਮਲ ਰੂਪ ਵਿੱਚ ਠੱਪ ਹੋਣ ਤੋਂ ਬਾਅਦ, ਹੁਣ ਪਲਾਂਟ ਪ੍ਰਬੰਧਨ ਨੇ ਜਮ੍ਹਾਂ ਹੋਈ ਸੁਆਹ ਨੂੰ ਤੁਰੰਤ ਸਾਫ਼ ਕਰਨ ਅਤੇ ਬਿਜਲੀ ਉਤਪਾਦਨ ਮੁੜ ਬਹਾਲ ਕਰਨ ਲਈ ਵਾਧੂ ਮਨੁੱਖੀ ਸ਼ਕਤੀ (ਲੇਬਰ) ਦੀ ਮੰਗ ਕੀਤੀ ਹੈ।
ਸੂਤਰਾਂ ਮੁਤਾਬਕ ਪਲਾਂਟ ਵਿੱਚ ਕਰੀਬ 500 ਰੈਗੂਲਰ ਮੁਲਾਜ਼ਮ ਹਨ, ਜਿਨ੍ਹਾਂ ਵਿੱਚੋਂ ਲਗਭਗ ਅੱਧੇ ਸਿਰਫ਼ ਕਲੈਰੀਕਲ (ਦਫ਼ਤਰੀ) ਕੰਮਾਂ ਵਿੱਚ ਲੱਗੇ ਹੋਏ ਹਨ, ਜਿਸ ਕਾਰਨ ਫੀਲਡ ਦੇ ਤਕਨੀਕੀ ਕੰਮਾਂ ਲਈ ਸਟਾਫ਼ ਦੀ ਭਾਰੀ ਕਿੱਲਤ ਦਾ ਸਾਹਮਣਾ ਕਰਨਾ ਪੜ ਰਿਹਾ ਹੈ।
ਥਰਮਲ ਪਲਾਂਟ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਪਲਾਂਟ ਦਾ ਪਹਿਲਾ ਯੂਨਿਟ 17 ਜੂਨ ਨੂੰ ਬੰਦ ਹੋਇਆ ਸੀ, ਜਿਸ ਤੋਂ ਬਾਅਦ 19 ਜੂਨ ਨੂੰ ਦੋ ਹੋਰ ਯੂਨਿਟ ਬੰਦ ਹੋ ਗਏ ਅਤੇ ਚੌਥਾ ਯੂਨਿਟ ਅੱਜ ਐਤਵਾਰ ਨੂੰ ਬੰਦ ਕਰਨਾ ਪਿਆ। ਜੀਐੱਚਟੀਪੀ (GHTP) ਦੇ ਚੀਫ਼ ਇੰਜੀਨੀਅਰ ਤੇਜ ਬੰਸਲ ਨੇ ਸਥਿਤੀ ਸਪੱਸ਼ਟ ਕਰਦਿਆਂ ਦੱਸਿਆ, “ਸਾਨੂੰ ਉਮੀਦ ਹੈ ਕਿ 210 ਮੈਗਾਵਾਟ ਦੀ ਉਤਪਾਦਨ ਸਮਰੱਥਾ ਵਾਲਾ ਇੱਕ ਯੂਨਿਟ ਅੱਜ ਸ਼ਾਮ ਤੱਕ ਚਾਲੂ ਕਰ ਦਿੱਤਾ ਜਾਵੇਗਾ।
ਇਹ ਸਾਰੀ ਸਮੱਸਿਆ ਠੇਕਾ ਮੁਲਾਜ਼ਮਾਂ ਦੀ ਹੜਤਾਲ ਕਾਰਨ ਪੈਦਾ ਹੋਈ ਹੈ। ਮੁਲਾਜ਼ਮ ਮੰਗ ਕਰ ਰਹੇ ਹਨ ਕਿ ਉਨ੍ਹਾਂ ਨੂੰ ਠੇਕੇਦਾਰਾਂ ਰਾਹੀਂ ਰੱਖਣ ਦੀ ਬਜਾਏ ਸਿੱਧੇ ਤੌਰ ’ਤੇ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ (PSPCL) ਦੇ ਅਧੀਨ ਲਿਆ ਜਾਵੇ। ਉਨ੍ਹਾਂ ਦਾ ਇਹ ਅੰਦੋਲਨ 9 ਜੂਨ ਨੂੰ ਸ਼ੁਰੂ ਹੋਇਆ ਸੀ, ਜਦਕਿ 16 ਜੂਨ ਤੋਂ ਸਾਰੇ ਠੇਕਾ ਮੁਲਾਜ਼ਮ ਮੁਕੰਮਲ ਹੜਤਾਲ ’ਤੇ ਚਲੇ ਗਏ ਹਨ।”
ਚੀਫ਼ ਇੰਜੀਨੀਅਰ ਨੇ ਅੱਗੇ ਦੱਸਿਆ, “250 ਮੈਗਾਵਾਟ ਦੀ ਸਮਰੱਥਾ ਵਾਲੇ ਚੌਥੇ ਯੂਨਿਟ ਨੂੰ ਅੱਜ ਇਸ ਲਈ ਬੰਦ ਕਰਨਾ ਪਿਆ ਕਿਉਂਕਿ ਪਲਾਂਟ ਨੂੰ ਪੂਰੀ ਤਰ੍ਹਾਂ ਬੰਦ ਕੀਤੇ ਬਿਨਾਂ ਅੰਦਰ ਜਮ੍ਹਾਂ ਹੋਈ ਫਲਾਈ ਐੱਸ਼ (ਸੁਆਹ) ਨੂੰ ਬਾਹਰ ਕੱਢਣਾ ਅਸੰਭਵ ਸੀ। ਸਾਡੀਆਂ ਤਕਨੀਕੀ ਟੀਮਾਂ ਅਤੇ ਇੰਜੀਨੀਅਰ ਬਿਜਲੀ ਸਪਲਾਈ ਨੂੰ ਬਹਾਲ ਕਰਨ ਲਈ ਲਗਾਤਾਰ ਕੰਮ ਕਰ ਰਹੇ ਹਨ ਅਤੇ ਉਮੀਦ ਜਤਾਈ ਜਾ ਰਹੀ ਹੈ ਕਿ ਅੱਜ ਸ਼ਾਮ ਜਾਂ ਰਾਤ ਤੱਕ ਇੱਕ ਹੋਰ ਯੂਨਿਟ ਕਾਰਜਸ਼ੀਲ ਹੋ ਜਾਵੇਗਾ, ਤਾਂ ਜੋ ਸੂਬੇ ਵਿੱਚ ਬਿਜਲੀ ਦੇ ਵੱਡੇ ਕੱਟਾਂ ਤੋਂ ਬਚਿਆ ਜਾ ਸਕੇ।”
