ਸਾਈਬਰ ਠੱਗੀ ‘ਤੇ ਵੱਡਾ ਵਾਰ! WhatsApp ਅਤੇ Telegram ਵਰਤਣ ਵਾਲੇ ਦੇਣ ਧਿਆਨ: 1 ਜਨਵਰੀ 2027 ਤੋਂ ਬਦਲ ਜਾਣਗੇ ਐਪਸ ਦੇ ਨਿਯਮ, ਫ਼ੋਨ ‘ਚ ਸਿਮ ਕਾਰਡ ਹੋਣਾ ਹੋਵੇਗਾ ਲਾਜ਼ਮੀ
ਦੂਰਸੰਚਾਰ ਵਿਭਾਗ ਲਾਗੂ ਕਰੇਗਾ ‘ਸਿਮ ਬਾਈਡਿੰਗ’ ਨਿਯਮ, WhatsApp ਅਤੇ Telegram ਵਰਤਣ ਵਾਲੇ ਦੇਣ ਧਿਆਨ- ਕੇਂਦਰ ਸਰਕਾਰ ਨੇ ਐਪ ਕੰਪਨੀਆਂ ਨੂੰ 31 ਦਸੰਬਰ 2026 ਤੱਕ ਦਿੱਤਾ ਸਮਾਂ
ਨਵੀਂ ਦਿੱਲੀ 26 ਅਕਤੂਬਰ 2026- ਦੇਸ਼ ਵਿੱਚ ਵਧ ਰਹੇ ਸਾਈਬਰ ਅਪਰਾਧਾਂ ਅਤੇ ਆਨਲਾਈਨ ਠੱਗੀ ਦੀਆਂ ਘਟਨਾਵਾਂ ‘ਤੇ ਠੱਲ੍ਹ ਪਾਉਣ ਲਈ ਭਾਰਤੀ ਦੂਰਸੰਚਾਰ ਵਿਭਾਗ (DoT) ਨੇ ਇੱਕ ਬਹੁਤ ਹੀ ਮਹੱਤਵਪੂਰਨ ਅਤੇ ਵੱਡਾ ਫੈਸਲਾ ਲਿਆ ਹੈ। ਸਰਕਾਰ ਪਹਿਲੀ ਜਨਵਰੀ 2027 ਤੋਂ ਦੇਸ਼ ਭਰ ਵਿੱਚ ‘ਸਿਮ ਬਾਈਡਿੰਗ’ (SIM Binding) ਨਾਲ ਸਬੰਧਤ ਨਵੇਂ ਨਿਯਮ ਲਾਗੂ ਕਰਨ ਦੀ ਪੂਰੀ ਤਿਆਰੀ ਕਰ ਰਹੀ ਹੈ।
ਇਹ ਨਿਯਮ ਲਾਗੂ ਹੋਣ ਤੋਂ ਬਾਅਦ ਵਟਸਐਪ (WhatsApp) ਅਤੇ ਟੈਲੀਗ੍ਰਾਮ (Telegram) ਵਰਗੀਆਂ ਪ੍ਰਮੁੱਖ ਮੈਸੇਜਿੰਗ ਐਪਾਂ ਦੀ ਵਰਤੋਂ ਕਰਨ ਲਈ ਉਪਭੋਗਤਾ ਦੇ ਮੋਬਾਈਲ ਫ਼ੋਨ ਵਿੱਚ ਉਸੇ ਨੰਬਰ ਦਾ ਚਲਦਾ ਅਤੇ ਸਰਗਰਮ ਸਿਮ ਕਾਰਡ ਹੋਣਾ ਲਾਜ਼ਮੀ ਹੋ ਜਾਵੇਗਾ, ਜਿਸ ਨੰਬਰ ਨਾਲ ਉਹ ਖਾਤਾ ਤਿਆਰ ਕੀਤਾ ਗਿਆ ਹੈ। ਦੂਰਸੰਚਾਰ ਵਿਭਾਗ ਨੇ ਸਾਰੀਆਂ ਸਬੰਧਤ ਐਪਲੀਕੇਸ਼ਨ ਕੰਪਨੀਆਂ ਨੂੰ 31 ਦਸੰਬਰ 2026 ਤੱਕ ਇਨ੍ਹਾਂ ਨਵੀਆਂ ਹਦਾਇਤਾਂ ਦੀ ਪਾਲਣਾ ਕਰਨ ਦੇ ਸਖ਼ਤ ਨਿਰਦੇਸ਼ ਦਿੱਤੇ ਹਨ।
ਨਵੇਂ ਨਿਯਮਾਂ ਅਨੁਸਾਰ, ਜੇਕਰ ਕੋਈ ਵਰਤੋਂਕਾਰ ਆਪਣੇ ਫ਼ੋਨ ਵਿੱਚੋਂ ਰਜਿਸਟਰਡ ਮੋਬਾਈਲ ਨੰਬਰ ਵਾਲਾ ਸਿਮ ਕਾਰਡ ਬਾਹਰ ਕੱਢ ਲੈਂਦਾ ਹੈ, ਜਾਂ ਉਹ ਸਿਮ ਬੰਦ ਹੋ ਜਾਂਦਾ ਹੈ, ਜਾਂ ਫਿਰ ਉਸ ਦੀ ਥਾਂ ਕੋਈ ਹੋਰ ਸਿਮ ਪਾ ਦਿੱਤਾ ਜਾਂਦਾ ਹੈ, ਤਾਂ ਸਬੰਧਤ ਮੈਸੇਜਿੰਗ ਐਪ ਦੀ ਸੇਵਾ ਤੁਰੰਤ ਪ੍ਰਭਾਵਿਤ ਹੋ ਸਕਦੀ ਹੈ। ਐਪਸ ਦੀ ਵਰਤੋਂ ਲਗਾਤਾਰ ਜਾਰੀ ਰੱਖਣ ਲਈ ਰਜਿਸਟਰਡ ਨੰਬਰ ਵਾਲਾ ਸਹੀ ਅਤੇ ਚਾਲੂ ਸਿਮ ਕਾਰਡ ਫ਼ੋਨ ਦੇ ਅੰਦਰ ਮੌਜੂਦ ਹੋਣਾ ਬੇਹੱਦ ਜ਼ਰੂਰੀ ਹੋਵੇਗਾ।
ਸਾਈਬਰ ਧੋਖਾਧੜੀ ਅਤੇ ਫ਼ਰਜ਼ੀ ਖਾਤਿਆਂ ‘ਤੇ ਲੱਗੇਗੀ ਲਗਾਮ
ਸਰਕਾਰ ਵੱਲੋਂ ਜਾਰੀ ਜਾਣਕਾਰੀ ਅਨੁਸਾਰ, ਇਸ ਸਮੇਂ ਕੁਝ ਮੈਸੇਜਿੰਗ ਐਪਾਂ ‘ਤੇ ਮੋਬਾਈਲ ਨੰਬਰ ਰਾਹੀਂ ਇੱਕ ਵਾਰ ਖਾਤਾ ਬਣਾਉਣ ਤੋਂ ਬਾਅਦ, ਫ਼ੋਨ ਵਿੱਚ ਸਿਮ ਕਾਰਡ ਮੌਜੂਦ ਨਾ ਹੋਣ ਦੇ ਬਾਵਜੂਦ ਵੀ ਸੇਵਾਵਾਂ ਚੱਲਦੀਆਂ ਰਹਿੰਦੀਆਂ ਸਨ। ਇਸੇ ਖਾਮੀ ਦਾ ਫਾਇਦਾ ਚੁੱਕ ਕੇ ਸਾਈਬਰ ਅਪਰਾਧੀ ਅਤੇ ਠੱਗ ਬਿਨਾਂ ਸਿਮ ਤੋਂ ਐਪਸ ਚਲਾ ਕੇ ਲੋਕਾਂ ਨਾਲ ਧੋਖਾਧੜੀ ਕਰ ਰਹੇ ਸਨ।
ਨਵੇਂ ਨਿਯਮਾਂ ਦਾ ਮੁੱਖ ਮਨੋਰਥ ਮੈਸੇਜਿੰਗ ਐਪਸ ਦੇ ਖਾਤਿਆਂ ਨੂੰ ਉਨ੍ਹਾਂ ਦੇ ਅਸਲ ਅਤੇ ਸਰਗਰਮ ਸਿਮ ਕਾਰਡਾਂ ਨਾਲ ਸਿੱਧਾ ਜੋੜਨਾ ਹੈ, ਤਾਂ ਜੋ ਫ਼ਰਜ਼ੀ ਖਾਤਿਆਂ, ਫਿਸ਼ਿੰਗ, ਆਨਲਾਈਨ ਵਿੱਤੀ ਠੱਗੀ ਅਤੇ ਸਰਕਾਰੀ ਅਧਿਕਾਰੀ ਬਣ ਕੇ ਕੀਤੀਆਂ ਜਾਣ ਵਾਲੀਆਂ ਠੱਗੀਆਂ ਨੂੰ ਪੂਰੀ ਤਰ੍ਹਾਂ ਰੋਕਿਆ ਜਾ ਸਕੇ।
ਵਟਸਐਪ ਅਤੇ ਟੈਲੀਗ੍ਰਾਮ ਤੋਂ ਇਲਾਵਾ ਸਿਗਨਲ, ਅਰਟਾਈ, ਸ਼ੇਅਰਚੈਟ, ਜੋਸ਼ ਅਤੇ ਜੀਓਚੈਟ ਵਰਗੀਆਂ ਹੋਰ ਪ੍ਰਮੁੱਖ ਮੈਸੇਜਿੰਗ ਅਤੇ ਸੋਸ਼ਲ ਮੀਡੀਆ ਸੇਵਾਵਾਂ ਵੀ ਦੂਰਸੰਚਾਰ ਵਿਭਾਗ ਦੇ ਇਸ ਘੇਰੇ ਵਿੱਚ ਸ਼ਾਮਲ ਕੀਤੀਆਂ ਗਈਆਂ ਹਨ। ਇਸ ਦੇ ਨਾਲ ਹੀ, ਸਰਕਾਰ ਨੇ ਮੈਸੇਜਿੰਗ ਐਪਾਂ ਦੇ ਵੈੱਬ ਵਰਜਨ (ਕੰਪਿਊਟਰ ਜਾਂ ਲੈਪਟਾਪ ‘ਤੇ ਚੱਲਣ ਵਾਲੇ ਵਰਜਨ) ਦੀ ਸੁਰੱਖਿਆ ਲਈ ਵੀ ਨਵੇਂ ਨਿਯਮ ਬਣਾਏ ਹਨ।
ਪਹਿਲਾਂ ਹਰ ਛੇ ਘੰਟਿਆਂ ਬਾਅਦ ਵੈੱਬ ਸੇਵਾਵਾਂ ਨੂੰ ਲਾਜ਼ਮੀ ਤੌਰ ‘ਤੇ ਲੌਗਆਊਟ ਕਰਨ ਦੀ ਸ਼ਰਤ ਰੱਖੀ ਗਈ ਸੀ, ਪਰ ਹੁਣ ਸਰਕਾਰ ਨੇ ਇਸ ਵਿੱਚ ਸੁਧਾਰ ਕਰਦਿਆਂ ਜੋਖ਼ਮ ਦੇ ਆਧਾਰ ‘ਤੇ ਲੌਗਆਊਟ ਕਰਨ ਦੀ ਵਿਵਸਥਾ ਨੂੰ ਅਪਣਾਇਆ ਹੈ।
ਇੱਥੇ ਇਹ ਗੱਲ ਸਾਫ਼ ਕਰਨੀ ਜ਼ਰੂਰੀ ਹੈ ਕਿ ਨਵੇਂ ਨਿਯਮਾਂ ਦਾ ਇਹ ਬਿਲਕੁਲ ਮਤਲਬ ਨਹੀਂ ਹੈ ਕਿ 1 ਜਨਵਰੀ 2027 ਤੋਂ ਸਾਰੇ ਲੋਕਾਂ ਦੇ ਫ਼ੋਨਾਂ ਵਿੱਚ ਵਟਸਐਪ ਜਾਂ ਟੈਲੀਗ੍ਰਾਮ ਬੰਦ ਹੋ ਜਾਣਗੇ। ਜੋ ਉਪਭੋਗਤਾ ਆਪਣੇ ਫ਼ੋਨ ਵਿੱਚ ਰਜਿਸਟਰਡ ਸਿਮ ਕਾਰਡ ਰੱਖ ਕੇ ਐਪਸ ਚਲਾ ਰਹੇ ਹਨ, ਉਨ੍ਹਾਂ ‘ਤੇ ਇਸ ਦਾ ਕੋਈ ਮਾੜਾ ਅਸਰ ਨਹੀਂ ਪਵੇਗਾ। ਇਸ ਦਾ ਅਸਰ ਸਿਰਫ਼ ਉਨ੍ਹਾਂ ਲੋਕਾਂ ‘ਤੇ ਪਵੇਗਾ ਜੋ ਫ਼ੋਨ ਵਿੱਚ ਸਿਮ ਕਾਰਡ ਪਾਏ ਬਿਨਾਂ ਜਾਂ ਕਿਸੇ ਹੋਰ ਦੇ ਨੰਬਰ ‘ਤੇ ਵਾਈ-ਫਾਈ ਜ਼ਰੀਏ ਇਹ ਐਪਾਂ ਚਲਾ ਰਹੇ ਹਨ।
