ਮੁੱਖ ਮੰਤਰੀ ਸਾਬ੍ਹ ਦੇ ਨਾਮ ਮੁਹੱਬਤੀ ਚਿੱਠੀ
ਲੇਖਕ- ਸਾਹਿਬ ਸਿੰਘ
ਖੁੱਲ੍ਹੇ ਖਤ ਲਿਖੇ ਜਾਂਦੇ ਰਹੇ ਨੇ ਪਰ ਮੈਂ ਤੁਹਾਡੇ ਨਾਲ ਏਨਾ ਨਹੀਂ ਖੁੱਲ੍ਹ ਸਕਦਾ…ਤੁਸੀਂ ਮੁੱਖ ਮੰਤਰੀ ਸਾਹਬ ਹੋ ਤੇ ਮੈਂ ਸਿਰਫ ਸਾਹਬ ਹਾਂ…ਵੈਸੇ ਮੈਂ ਮੁੱਖ ਮੰਤਰੀ ਜੀ ਵੀ ਲਿਖ ਸਕਦਾ ਸੀ ਪਰ ਕਹਿੰਦੇ ਨੇ ਕਿ ਜਿਸ ਵੀ ਨਾਮ ਨਾਲ ਸਾਹਬ ਜੁੜ ਜਾਏ,ਉਹਦੀ ਇਜ਼ਤ ਵਧ ਜਾਂਦੀ ਆ…ਮੇਰੀ ਦਿਲੀ ਇੱਛਾ ਐ ਕਿ ਆਪ ਦੀ ਇੱਜ਼ਤ ਵਧੇ!
ਮੈਂ ਤੇ ਪੰਜਾਬ ਦੇ ਸਮੂਹ ਅਦਬੀ ਤੇ ਕਲਾਤਮਕ ਸੰਸਾਰ ਦੇ ਵਾਸੀ ਰਾਜ਼ੀ ਬਾਜ਼ੀ ਆਂ ਤੇ ਆਪ ਦੀ ਚੰਗੀ ਸਿਹਤ ਦੀ ਕਾਮਨਾ ਕਰਦੇ ਹਾਂ..ਵੈਸੇ ਤਾਂ ਤੁਹਾਡੀ ਸਿਹਤ ਦਾ ਖਿਆਲ ਰੱਖਣ ਵਾਸਤੇ ਵੱਡੇ ਵੱਡੇ ਪ੍ਰਾਈਵੇਟ ਹਸਪਤਾਲ ਮੌਜੂਦ ਨੇ ..ਫੇਰ ਵੀ ਆਪਣੀ ਸਿਹਤ ਦਾ ਖਿਆਲ ਰੱਖਿਆ ਕਰੋ ਬਾਈ ਜੀ…ਆਪਣੀ ਵੀ ਤੇ ਆਪਣੇ ਰੰਗਲੇ ਪੰਜਾਬ ਦੀ ਵੀ!
ਥੋਡੇ ਪੰਜਾਬ ਦੀ ਸਿਹਤ ਠੀਕ ਨਹੀਂ ਐ ਭਗਵੰਤ ਬਾਈ..ਤੁਸੀਂ ਨਸ਼ਿਆਂ ਵਿਰੁੱਧ ਯੁੱਧ ਛੇੜਿਆ ਹੋਇਆ ਪਰ ਯੁੱਧ ਏਨੇ ਸੌਖੇ ਕਿੱਥੇ ਮੁੱਕਦੇ ਆ..ਥੋਡੇ ਈ ਪਿੰਡ ਦਾ ਮੁੰਡਾ ਆ,ਕਹਾਣੀਆਂ ਲਿਖਦੈ…ਪ੍ਰਗਟ ਸੁੰਹ ਸਤੌਜ..ਉਹਦੀ ਕਹਾਣੀ ਐ..ਯੁੱਧ ਦਾ ਅੰਤ..ਪੜ੍ਹੀ ਹੋਣੀ ਬਾਈ..ਨਸ਼ਾ ਕਿਤੇ ਕੱਲਾ ਥੋੜ੍ਹਾ ਆਉਂਦੈ..ਉਪਰੋਂ ਥੱਲੇ ਤਕ ਸੌ ਜਾਲ਼ ਵਿਛਾ ਕੇ ਆਉਂਦੈ…ਸਾਡੇ ਤੇ ਤੁਹਾਡੇ ਬਹੁਤ ਸਤਿਕਾਰਯੋਗ ਪਾਤਰ ਸਾਹਿਬ ਐਵੇਂ ਤਾਂ ਨਹੀਂ ਕਹਿੰਦੇ,”ਲੱਖਾਂ ਹੀ ਅੜਚਨਾਂ ਨੇ ਮੇਰੀ ਖੁਦਕੁਸ਼ੀ ਦੇ ਰਾਹ ਵਿੱਚ ….”…ਅੜਚਨਾਂ ਬਹੁਤ ਨੇ ਬਾਈ ਤੇਰੇ ਪੰਜਾਬ ਦੀ ਨਰੋਈ ਸਿਹਤ ਦੇ ਰਾਹ ਵਿੱਚ…ਉਹਨਾਂ ਨੂੰ ਦੂਰ ਕਰਨ ਦਾ ਜਿੰਮਾ ਤੇਰਾ ਹੈਗਾ ਐ ਨਾ ਬਾਈ?…ਲੋਕਾਂ ਤੈਨੂੰ ਅੱਡੀਆਂ ਚੁੱਕ ਕੇ ਇਹ ਜਿੰਮਾ ਦਿੱਤਾ ਐ ਬਾਈ..ਦੂਰ ਕਰੇਂਗਾ ਨਾ ਅੜਚਨਾਂ!..ਪਰ ਤੇਰੇ ਅਫਸਰ,ਤੇਰੇ ਮੰਤਰੀ,ਤੇਰੀ ਪੁਲਿਸ ਤਾਂ ਲੋਕਾਂ ਨੂੰ ਹੀ ਦੂਰ ਕਰਨ ‘ਤੇ ਲੱਗੇ ਆ..ਤੈਨੂੰ ਪਤਾ ਈ ਹੋਊ ਬਾਈ!
ਜਿਓਂਦ ਪਿੰਡ ਦੇ ਜਿਓਂਦੇ ਲੋਕਾਂ ਨਾਲ ਤੇਰੀ ਤਾਂ ਕੋਈ ਦੁਸ਼ਮਣੀ ਨਹੀਂ ਹੋ ਸਕਦੀ ਬਾਈ…ਤੂੰ ਤਾਂ ਖੁਦ ਪਟੇ ‘ਤੇ ਬਰੋਜ਼ਾ ਲਾਉਂਦਾ ਰਿਹੈ ਤਾਂ ਕਿ ਪਟਾ ਲਹਿ ਨਾ ਜਾਵੇ..ਉਹ ਤਾਂ ਏਸੇ ਸੰਘਰਸ਼ ਦੇ ਲੜ ਲੱਗੇ ਆ ਬਾਈ..ਉਹਨਾਂ ਨੂੰ ਆਪਣੀ ਜ਼ਿੰਦਗੀ ਦਾ ਪਟਾ ਇੰਜਣ ਦੇ ਪਹੀਏ ਤੋਂ ਲਹਿੰਦਾ ਮਹਿਸੂਸ ਹੋ ਰਿਹਾ ਆ..ਉਹ ਆਪਣੇ ਜੁਆਕਾਂ ਦੇ ਭਵਿੱਖ ਲਈ ਚਿੰਤਤ ਨੇ ਬਾਈ,ਕਿਵੇਂ ਨਾ ਕਿਵੇਂ ਕਬੀਲਦਾਰੀ ਚਲਦੀ ਰੱਖਣੀ ਚਾਹੁੰਦੇ ਆ…ਆਪਣੇ ਵਾਹਣ ਬਚਾਉਣ ਦੀ ਕੋਸ਼ਿਸ਼ ਕਰ ਰਹੇ ਆ…ਤੈਨੂੰ ਤਾਂ ਪਤਾ ਈ ਹੋਊ ਬਾਈ,ਦਿੱਲੀ ਵਾਲ਼ਾ ਪ੍ਰਧਾਨ ਬਾਊ ਅਮਰੀਕਾ ਨਾਲ ਸਮਝੌਤੇ ਆਲ਼ੀ ਜਿਹੜੀ ਫਾਈਲ ਕੱਛੇ ਮਾਰੀ ਫਿਰਦਾ,ਉਸ ਫਾਈਲ ‘ਤੇ ਹਿੰਦੁਸਤਾਨ ਦੇ ਹਰ ਜਿਓਂਦ ਦੇ ਜਿਓਣ ਜੋਗਿਆਂ ਦੀ ਉਹਨਾਂ ਦੇ ਵਾਹਣਾਂ ਸਮੇਤ ਮੌਤ ਲਿਖੀ ਆ ..ਤੇਰੇ ਰੰਗਲੇ ਪੰਜਾਬ ਦੇ ਲੋਕ ਸਮਝਦੇ ਨੇ ਆਹ ਸਭ ਕੁਝ…ਕੀ ਤੂੰ ਨਹੀਂ ਸਮਝਦਾ ਬਾਈ??!!
ਤੇਰਾ ਰੰਗਲਾ ਪੰਜਾਬ ਹਰ ਰੋਜ਼ ਲਗਭਗ 80 ਏਕੜ ਵਾਹੀਯੋਗ ਜ਼ਮੀਨ ਗੁਆ ਰਿਹਾ ਐ..ਉਸ ਜ਼ਮੀਨ ‘ਤੇ ਸਰਮਾਏ ਦੀ ਹਵਸ ‘ਚ ਡੂੰਘਾ ਉਤਰੀਆਂ ਕੰਪਨੀਆਂ,ਬਿਲਡਰ ਕੰਕਰੀਟ ਦਾ ਜੰਗਲ ਉਸਾਰ ਰਹੀਆਂ ਨੇ..ਉਹ ਕੰਕਰੀਟ ਨਾ ਲੋੜ ਐ,ਨਾ ਵਿਕਾਸ ਦਾ ਚਿੰਨ੍ਹ ਐ..ਵੱਡੇ ਹਾਈਵੇ ਤੇ ਉਹਨਾਂ ਦੇ ਖੱਬੇ ਸੱਜੇ ਉਸਰਦੇ ਮਾਲ,ਪਲਾਜੇ, ਪੁੰਗਰਦੇ ਬੀਆਂ ਨੂੰ ਨਿੱਘੀ ਹਿੱਕ ਵਿੱਚ ਸੰਭਾਲਣ ਵਾਲ਼ੀ ਜ਼ਰਖੇਜ਼ ਭੋਂ ਨਿਗ਼ਲ ਰਹੇ ਨੇ…ਤਾਕਤ ਦੇ ਗ਼ਰੂਰ ‘ਚ ਤੇਰੀ ਹਕੂਮਤੀ ਮਸ਼ੀਨਰੀ ਦੀ ਬੀਬੀ ਜਿਹਨਾਂ ਨੂੰ ਭੀੜ ਤੇ ਵਾਂਟਿਡ ਅਪਰਾਧੀ ਕਹਿ ਰਹੀ ਆ,ਓਹੀ ‘ਪੀਲ਼ੇ ਪਰਨੇ’ ਆਲ਼ੇ ਅਸਲ ਮਾਅਨਿਆਂ ਵਿੱਚ ਤੇਰਾ ਰੰਗਲਾ ਪੰਜਾਬ ਬਚਾਉਣ ਲਈ ਲੜ ਰਹੇ ਆ ਵੀਰਨਾ…ਤੇਰੇ ਸਿਰ ਕਲਗੀ ਵੀ ਦਿੱਲੀ ਆਲ਼ਿਆਂ ਨਹੀਂ ਸਜਾਈ,ਇਹਨਾਂ ਪੀਲ਼ੇ ਪਰਨਿਆਂ ਦੀ ਮਿਹਰਬਾਨੀ ਹੋਈ ਆ…
ਭਗਵੰਤ ਬਾਈ,ਜਿਵੇਂ ਚਲਦੇ ਖੇਡ ਮੁਕਾਬਲੇ ਵਿੱਚ ਕੋਈ ਗ਼ੈਰਤਮੰਦ ਭਲਵਾਨ ਕੂਕ ਉਠਦੈ,”ਨਾ ਉਏ,ਸਾਹਮਣੇ ਮੇਰੇ ਮਾਮੇ ਦੇ ਪੁੱਤ ਖੜ੍ਹੇ ਆ,ਇਹਨਾਂ ਖਿਲਾਫ ਨਹੀਂ ਖੇਡਣਾ!”…ਉਵੇਂ ਹੀ ਤੂੰ ਵੀ ਮਾਰ ਲਲਕਾਰਾ ਬਾਈ,ਇਹ ਤਾਂ ਤੇਰੇ ਮਾਮੇ ਦੇ ਈ ਨਹੀਂ,ਸਕੇ ਆ…ਪੰਜਾਬ ਤੇਰੀ ਲਲਕਾਰ ਨੂੰ ਤਰਸ ਗਿਆ ਬਾਈ..ਏਨਾ ਤਾਂ ਜਾਣਦਾ ਈ ਐਂ ਨਾ ਬਾਈ,ਦੋ ਹਜ਼ਾਰ ਬਾਈ ‘ਚ ਪੰਜਾਬ ਦੇ ਲੋਕਾਂ ਨੇ ਆਪਣਾ ਭਗਵੰਤ ਬਾਈ ਜਿਤਾਇਆ ਸੀ…ਜੇ ਦਿੱਲੀ ਆਲ਼ਿਆਂ ਨੂੰ ਈ ਜਿਤਾਉਣਾ ਹੁੰਦਾ ਤਾਂ ਦੋ ਹਜ਼ਾਰ ਸਤਾਰਾਂ ‘ਚ ਹੀ ਜਿਤਾ ਦੇਣਾ ਸੀ ਪਰ ਉਦੋਂ ਕਲਗੀ ਤੇਰੇ ਸਿਰ ਨਹੀਂ ਸੀ!
ਇਹ ਤਾਂ ਤੇਰੇ ਹੀ ਲਫ਼ਜ਼ ਸਨ ਬਾਈ ਕਿ ਸਰਕਾਰ ਸੱਥਾਂ ਚੋਂ ਚੱਲੇਗੀ..ਤੇਰੇ ਆਲ਼ੀ ਪੁਲਿਸ ਤਾਂ ਹੁਣ ਕਹਿੰਦੀ ਆ ਕਿ ਥੋਨੂ ਆਪਣੇ ਈ ਪਿੰਡ ਦੀ ਸੱਥ ‘ਚ ਬਹਿਣ ਵੀ ਨਹੀਂ ਦੇਣਾ…ਤੇਰੇ ਕੁ ਜਿੰਨੀ ਉਮਰ ਆ ਬਾਈ ਮੇਰੀ ਵੀ,ਮੈਂ ਤਾਂ ਆਪਣੀ ਸੁਰਤ ‘ਚ ਕਦੇ ਪਿੰਡ ਦੇ ਘਰਾਂ ਸਕੂਲਾਂ ‘ਚ ਅੱਥਰੂ ਗੈਸ ਦੇ ਗੋਲ਼ੇ ਡਿੱਗਦੇ ਨਹੀਂ ਦੇਖੇ..ਬਾਈ ਉਹ ਬੀਬੀਆਂ ਜਿਹੜੀਆਂ ਇਸ ਸਭ ਕੁਝ ਤੋਂ ਬਾਅਦ ਵੀ ਸੱਥ ‘ਚ ਖੜ੍ਹ ਕੇ ਇਹ ਕਹਿੰਦੀਆਂ ,”ਜਿਹਦਾ ਹੱਥ ਪਾਟਾ,ਉਹ ਮੇਰਾ ਪੁੱਤ ਐ ਪਰ ਪਿੱਛੇ ਨਹੀਂ ਹਟਦੇ!”..ਸੁਣੀਆਂ ਨਾ ਬਾਈ..ਗੱਚ ਭਰਦਾ ਬਾਈ ਸੁਣ ਕੇ..ਉਹਨਾਂ ਦਾ ਬੋਲਿਆ ਛੱਡ,ਅੱਖਾਂ ‘ਚ ਦੇਖ ਬਾਈ,ਤੈਨੂੰ ਸੱਚ ਦੇ ਦੀਦਾਰ ਹੋਣਗੇ…ਓ ਬਾਈ,ਚੱਲ ਪਲ ਭਰ ਲਈ ਮੰਨ ਲੈਨੇ ਆਂ ਕਿ ਜਥੇਬੰਦੀਆਂ ਦੇ ਆਗੂਆਂ ਨਾਲ ਤੇਰਾ ਕੋਈ ਮਨ ਮੁਟਾਵ ਆ…ਪਰ ਆਹ ਬੀਬੀਆਂ ਨੇ ਤਾਂ ਆਪਣੇ ਘਰ ਦਾ ਈ ਰਾਜ ਸੰਭਾਲਣੈ…ਇਹਨਾਂ ਨੂੰ ਕਿਉਂ ਏਡੀ ਮਰਨ ਮਿੱਟੀ ਚੜ੍ਹੀ ਆ..ਠੰਡੇ ਦਿਮਾਗ਼ ਨਾਲ ਵਿਚਾਰਨਾ ਪਊ!…ਇਹਨਾਂ ਨੇ ਮਾਤਾ ਗੁਜਰੀ ਤੇ ਮਾਈ ਭਾਗੋ ਦਾ ਇਤਿਹਾਸ ਪੜ੍ਹਨ ਤੋਂ ਬਾਅਦ ਸਾਖੀ ਵਾਲਾ ਕਿਤਾਬਚਾ ਅਗਨ ਭੇਂਟ ਨਹੀਂ ਕੀਤਾ,ਬਲਕਿ ਆਪਣੀ ਹਿੱਕ ਚ ਸੰਭਾਲ ਲਿਆ ਹੋਇਆ…ਇਹਨਾਂ ਨੂੰ ਜਾ ਮਿਲ ਭਗਵੰਤ ਬਾਈ..ਇਹ ਤੈਨੂੰ ਚਾਟੀ ਦੀ ਲੱਸੀ ਪਿਲਾਉਣਗੀਆਂ…ਤੇਰੀ ਸਿਹਤ ਵੀ ਵੱਲ ਹੋਜੂ,ਐਵੇਂ ਰਾਜ ਮਹਿਲ ‘ਚ ਤੈਨੂੰ ਪਤਾ ਨਹੀਂ ਕਿਹੜੇ ਮਸਾਲੇ ਖੁਆਈ ਜਾਂਦੇ ਆ!
ਮੁੜ ਆ ਬਾਈ…ਆਪਣੇ ਸਾਰੇ ਵਾਅਦੇ ਯਾਦ ਕਰ..ਤੇਰੀ ਬਾਦਸ਼ਾਹਤ ਧਰਨਿਆਂ ਦੀ ਪੈਦਾਵਾਰ ਐ..ਰੋਂਦਿਆਂ ਨੂੰ ਚੁੱਪ ਕਰਾਉਣ ਲਈ ਉਹਨਾਂ ਦੇ ਢਿੱਡ ‘ਚ ਪਈ ਮਰਜ਼ ਸਮਝਣ ਦੇ ਰਾਹ ਤੁਰ,ਰੋਂਦਿਆਂ ਨੂੰ ਹੋਰ ਕੁੱਟਣ ਦਾ ਰਾਹ ਤਿਆਗਣ ਦਾ ਹੁਕਮ ਦੇ ਆਪਣੀ ਫੋਰਸ ਨੂੰ…ਆਖ਼ਰੀ ਗੱਲ ਭਗਵੰਤ ਬਾਈ…
ਨਾਟਕ ਜਦੋਂ ਆਰੰਭ ਹੁੰਦਾ ਐ ਤਾਂ ਸਿਆਣਾ ਨਾਟਕਕਾਰ ਦਰਸ਼ਕਾਂ ਨੂੰ ਹੌਲੀ ਹੌਲੀ ਵਿਸ਼ੇ ਦੀ ਕੇਂਦਰੀ ਚੂਲ਼ ਵਲ ਲੈ ਕੇ ਜਾਂਦਾ ਪਰ ਉਹ ਮੁੱਖ ਥੀਮ ‘ਤੇ ਆਪਣੀ ਪਕੜ ਅੰਤ ਤਕ ਬਰਕਰਾਰ ਰੱਖਦਾ ਐ…ਆਰੰਭ ਵਿੱਚ ਵੀ,ਮੱਧ ਚ ਵੀ ਤੇ ਅੰਤ ਵਿੱਚ ਵੀ!..ਚਲਦੇ ਨਾਟਕ ਵਿੱਚ ਤੇਰੀ ਸਕਰਿਪਟ ਬਦਲ ਗਈ ਐ ਬਾਈ..ਆਰੰਭ ਕੁਝ ਹੋਰ ਸੀ,ਮੱਧ ਹੋਰ ਪਾਸੇ ਤੁਰ ਪਿਆ ਤੇ ਅੰਤ….!..ਡਰ ਲਗਦੈ ਅੰਤ ਬਾਰੇ ਸੋਚ ਕੇ!…ਤੇਰੀ ਸਕਰਿਪਟ ਕਿਸੇ ਨੇ ਬਦਲੀ ਜਾਂ ਤੂੰ ਆਪ,ਇਹ ਤੂੰ ਜਾਣੇਂ…ਪਰ ਬਾਈ,ਜੇ ਇਹ ਮੇਰਾ ਈ ਵਹਿਮ ਆ ਕਿ ਚਲਦੇ ਨਾਟਕ ਵਿੱਚ ਸਕਰਿਪਟ ਬਦਲੀ ਗਈ ਐ..ਤੇ ਜੇ ਸੱਚ ਇਹ ਐ ਕਿ ਅਸਲ ਵਿੱਚ ਸਭ ਕੁਝ ਸਕਰਿਪਟ ਅਨੁਸਾਰ ਹੀ ਚੱਲ ਰਿਹਾ ਐ ਤਾਂ….ਭਗਵੰਤ ਬਾਈ!!!!…ਤੈਨੂੰ ਕੀ ਸਮਝਾਉਣਾ…ਤੂੰ ਕਿਹੜਾ ਦਿੱਲੀਓਂ ਆਇਆਂ..ਕਾਢਿਆਂ ਦਾ ਭੌਣ ਚਾਹੇ ਸਤੌਜ ਪਿੰਡ ਦਾ ਹੋਵੇ ਚਾਹੇ ਜਿਓਂਦ ਦਾ…ਬਹਿਣਾ ਔਖਾ ਕਰ ਦਿੰਦਾ!
ਰਾਜ਼ੀ ਬਾਜ਼ੀ ਰਹੁ ਬਾਈ…ਸਮਾਂ ਆਉਣ ‘ਤੇ ਨਾਇਕ ਬਣ ਉੱਭਰ ਬਾਈ…ਪੰਜਾਬ ਤੇਰਾ ਵੀ ਐ..ਖੋਲ਼ੇ ਅਰਗੇ ਘਰ ‘ਚ ਗੁਜ਼ਾਰਾ ਕਰਦੇ ਮਜ਼ਦੂਰ ਦਾ ਵੀ..ਪੀਲ਼ੇ ਪਰਨੇ ਆਲ਼ਿਆਂ ਦਾ ਵੀ,ਕੇਸਰੀ ਚੁੰਨੀਆਂ ਵਾਲ਼ੀਆਂ ਦਾ ਵੀ,ਨੰਗੇ ਸਿਰਾਂ ਦਾ ਵੀ..ਸਭ ਨੂੰ ਗਲਵੱਕੜੀ ‘ਚ ਲੈ ਲੈ…ਸਿਹਤ ਠੀਕ ਹੋਜੂ…ਤੇਰੀ ਵੀ..ਤੇਰੇ ਪੰਜਾਬ ਦੀ ਵੀ!!…ਪੰਜਾਬ ਉੱਤੋਂ ਈ ਲੜਨ ਭਿੜਨ ਵਾਲਾ ਜਾਪਦੈ ਭਗਵੰਤ ਬਾਈ ,ਏਹਦੀ ਅੰਦਰੂਨੀ ਤਾਸੀਰ ਤਾਂ ਮੁਹੱਬਤ ਵਾਲ਼ੀ ਐ…ਏਸੇ ਲਈ ਤੈਨੂੰ ਮੁਹੱਬਤੀ ਚਿੱਠੀ ਲਿਖੀ ਆ ..ਬਾਬਾ ਨਾਨਕ ਪੰਜਾਬ ਦੇ ਦਿਲ ‘ਚ ਵਸਦੈ,ਮੁਹੱਬਤ ਦੇ ਸੰਦੇਸ਼ ਕਾਰਨ…ਤੂੰ ਵੀ ਮੁਹੱਬਤ ਦਾ ਛੱਟਾ ਦੇ…ਵਿਹੜੇ ਮੁੜ ਆ …ਤੂੰ ਸਾਡੇ ਕਲਾਕਾਰ ਭਾਈਚਾਰੇ ਦਾ ਸਟਾਰ ਪ੍ਰਤੀਨਿਧੀ ਐਂ…ਲਾਜ ਰੱਖ ਲੈ ਭਾਈਚਾਰੇ ਦੀ!
ਆਪਣੀ ਸਮੁੱਚੀ ਮੁਹੱਬਤ ਸਮੇਤ ਅਦਬੀ ਭਾਈਚਾਰੇ ਵੱਲੋਂ
ਸਾਹਿਬ ਸਿੰਘ
+919888011096
