CM ਸਾਬ੍ਹ ਆਰਾਮ ਫਰਮਾਉਣ ਗਏ! ਇੱਕ ਹਫ਼ਤੇ ਤੱਕ ਨੇਚਰੋਪੈਥੀ ਕੇਂਦਰ ਵਿੱਚ ਕਰਵਾਉਣਗੇ ਕੁਦਰਤੀ ਇਲਾਜ, ਮੁੱਖ ਮੰਤਰੀ ਭਗਵੰਤ ਮਾਨ ਬੈਂਗਲੁਰੂ ਰਵਾਨਾ
ਚੰਡੀਗੜ੍ਹ 02 ਜੁਲਾਈ, 2026:
CM ਸਾਬ੍ਹ ਆਰਾਮ ਫਰਮਾਉਣ ਗਏ! ਪੰਜਾਬ ਦੇ ਕਈ ਧਾਰਮਿਕ ਅਤੇ ਸਿਆਸੀ ਮੁੱਦਿਆਂ ‘ਤੇ ਘਿਰੇ ਸੂਬੇ ਦੇ ਸੀ.ਐੱਮ ਸਾਬ੍ਹ ਆਰਾਮ ਫਰਮਾਉਣ ਲਈ ਬੈਂਗਲੁਰੂ ਰਵਾਨਾ ਟੁਰ ਗਏ ਹਨ। ਇੱਕ ਮੀਡੀਆ ਰਿਪੋਰਟ ਦੇ ਮੁਤਾਬਿਕ, ਮੁੱਖ ਮੰਤਰੀ ਭਗਵੰਤ ਮਾਨ ਇੱਕ ਹਫ਼ਤੇ ਦੇ ਕੁਦਰਤੀ ਇਲਾਜ (ਨੇਚਰੋਪੈਥੀ) ਅਤੇ ਸਿਹਤ ਸੁਧਾਰ ਪ੍ਰੋਗਰਾਮ ਲਈ ਬੈਂਗਲੁਰੂ ਚਲੇ ਗਏ ਹਨ।
ਪ੍ਰਸ਼ਾਸਨਿਕ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ, ਉਹ ਬੈਂਗਲੁਰੂ ਦੇ ਇੱਕ ਨਿੱਜੀ ਨੇਚਰ ਕੇਅਰ ਸੈਂਟਰ ਵਿੱਚ ਲਗਭਗ ਸੱਤ ਦਿਨ ਰਹਿਣਗੇ, ਜਿੱਥੇ ਉਹ ਕੁਦਰਤੀ ਤਰੀਕਿਆਂ ਨਾਲ ਆਪਣਾ ਇਲਾਜ ਅਤੇ ਡਿਟੌਕਸੀਫਿਕੇਸ਼ਨ (Detox) ਕਰਵਾਉਣਗੇ।
ਦੱਸਣਯੋਗ ਹੈ ਕਿ ਪਿਛਲੇ ਕੁੱਝ ਸਮੇਂ ਤੋਂ ਲਗਾਤਾਰ ਸਿਆਸੀ ਰੁਝੇਵਿਆਂ ਅਤੇ ਸਖ਼ਤ ਮਿਹਨਤ ਕਾਰਨ ਮੁੱਖ ਮੰਤਰੀ ਨੂੰ ਸਰੀਰਕ ਥਕਾਵਟ ਦੀ ਸ਼ਿਕਾਇਤ ਹੋਈ ਸੀ। ਇਸ ਤੋਂ ਬਾਅਦ ਡਾਕਟਰਾਂ ਨੇ ਉਨ੍ਹਾਂ ਨੂੰ ਕੁਝ ਦਿਨ ਆਰਾਮ ਕਰਨ ਅਤੇ ਆਪਣੀ ਸਿਹਤ ਵੱਲ ਵਿਸ਼ੇਸ਼ ਧਿਆਨ ਦੇਣ ਦੀ ਸਲਾਹ ਦਿੱਤੀ ਸੀ।
ਯੋਗਾ ਅਤੇ ਖ਼ਾਸ ਡਾਈਟ ਪਲਾਨ ਦਾ ਹਿੱਸਾ ਬਣਨਗੇ CM
ਸੂਤਰਾਂ ਅਨੁਸਾਰ ਇਸ ਸਿਹਤ ਯਾਤਰਾ ਦੌਰਾਨ ਮੁੱਖ ਮੰਤਰੀ ਭਗਵੰਤ ਮਾਨ, ਮਾਹਿਰਾਂ ਦੀ ਦੇਖਰੇਖ ਵਿੱਚ ਯੋਗਾ ਅਤੇ ਮੈਡੀਟੇਸ਼ਨ (ਧਿਆਨ) ਕਰਨਗੇ। ਸਰੀਰਕ ਤਾਜ਼ਗੀ ਅਤੇ ਊਰਜਾ ਹਾਸਲ ਕਰਨ ਲਈ ਇੱਕ ਖ਼ਾਸ ਡਾਈਟ ਪਲਾਨ (ਖੁਰਾਕ) ਦੀ ਪਾਲਣਾ ਕਰਨਗੇ।
ਆਪਣੀ ਇਸ ਸਿਹਤ ਯਾਤਰਾ ‘ਤੇ ਰਵਾਨਾ ਹੋਣ ਤੋਂ ਪਹਿਲਾਂ ਵੀ ਮੁੱਖ ਮੰਤਰੀ ਪੂਰੀ ਤਰ੍ਹਾਂ ਸਰਗਰਮ ਨਜ਼ਰ ਆਏ। ਉਨ੍ਹਾਂ ਨੇ ਸੂਬੇ ਦੇ ਕਈ ਅਹਿਮ ਵਿਕਾਸ ਪ੍ਰੋਜੈਕਟਾਂ ਦੇ ਕੰਮਕਾਜ ਦਾ ਜਾਇਜ਼ਾ ਲਿਆ ਅਤੇ ਕਈ ਨਵੇਂ ਕਾਰਜਾਂ ਦੇ ਉਦਘਾਟਨ ਵੀ ਕੀਤੇ।
ਸਰਕਾਰੀ ਅਧਿਕਾਰੀਆਂ ਮੁਤਾਬਕ ਮੁੱਖ ਮੰਤਰੀ ਦੀ ਗੈਰ-ਹਾਜ਼ਰੀ ਦੌਰਾਨ ਸੂਬੇ ਦੇ ਸਾਰੇ ਜ਼ਰੂਰੀ ਸਰਕਾਰੀ ਕੰਮਕਾਜ ਆਮ ਵਾਂਗ ਨਿਰੰਤਰ ਚੱਲਦੇ ਰਹਿਣਗੇ। ਉਹ ਇੱਕ ਹਫ਼ਤਾ ਪੂਰਾ ਹੋਣ ਤੋਂ ਬਾਅਦ ਵਾਪਸ ਪੰਜਾਬ ਪਰਤ ਕੇ ਆਪਣੀਆਂ ਸਰਕਾਰੀ ਜ਼ਿੰਮੇਵਾਰੀਆਂ ਨੂੰ ਮੁੜ ਸੰਭਾਲਣਗੇ।
