Heavy Rain: ਪੰਜਾਬ ‘ਚ ਭਾਰੀ ਮੀਂਹ ਅਤੇ ਤੇਜ਼ ਤੂਫ਼ਾਨ ਦਾ ਕਹਿਰ; ਦਰਖੱਤ ਡਿੱਗੇ- ਸੜਕਾਂ ਬੰਦ! ਕਈ ਸ਼ਹਿਰਾਂ ‘ਚ ਬੱਤੀ ਗੁੱਲ
Heavy Rain: ਮੌਸਮ ਨੇ ਲਈ ਕਰਵਟ: ਤੇਜ਼ ਤੂਫ਼ਾਨ ਅਤੇ ਮੂਸਲਾਧਾਰ ਬਾਰਿਸ਼ ਨੇ ਰੋਕੀ ਸ਼ਹਿਰ ਦੀ ਰਫ਼ਤਾਰ; ਕਈ ਇਲਾਕਿਆਂ ‘ਚ ਪੈ ਰਿਹਾ ਘੁੱਪ ਹਨੇਰਾ
ਚੰਡੀਗੜ੍ਹ, 3 ਮਈ 2026:
Heavy Rain: ਅੱਜ ਐਤਵਾਰ ਦੀ ਛੁੱਟੀ ਦਾ ਆਗਾਜ਼ ਆਮ ਵਾਂਗ ਚਿੱਟੀ ਸਵੇਰ ਨਾਲ ਨਹੀਂ, ਸਗੋਂ ਕਾਲੇ ਸੰਘਣੇ ਬੱਦਲਾਂ ਦੇ ਪਹਿਰੇ ਹੇਠ ਹੋਇਆ।
ਅਸਮਾਨ ਵਿੱਚ ਉਮੜੇ ਬੱਦਲਾਂ ਨੇ ਅਜਿਹਾ ਡੇਰਾ ਲਾਇਆ ਕਿ, ਪੰਜਾਬ ਦੇ ਬਹੁ-ਗਿਣਤੀ ਸ਼ਹਿਰਾਂ ‘ਚ ਸਵੇਰ ਵੇਲੇ ਹੀ ਰਾਤ ਵਰਗਾ ਨਜ਼ਾਰਾ ਬਣ ਗਿਆ।
ਹਾਲਾਤ ਇੰਨੇ ਖ਼ਰਾਬ ਸਨ ਕਿ ਸੜਕਾਂ ‘ਤੇ ਚੱਲ ਰਹੀਆਂ ਗੱਡੀਆਂ ਨੂੰ ਦਿਨ ਵੇਲੇ ਹੀ ਹੈੱਡਲਾਈਟਾਂ ਜਗਾਉਣੀਆਂ ਪਈਆਂ।
50 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਚੱਲੀਆਂ ਹਵਾਵਾਂ
ਮੌਸਮ ਨੇ ਅਚਾਨਕ ਕਰਵਟ ਲਈ ਅਤੇ ਦੇਖਦੇ ਹੀ ਦੇਖਦੇ ਕਰੀਬ 40 ਤੋਂ 50 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਤੇਜ਼ ਤੂਫ਼ਾਨੀ ਹਵਾਵਾਂ ਚੱਲਣ ਲੱਗੀਆਂ।
ਬੱਦਲਾਂ ਦੀ ਗਰਜ ਅਤੇ ਬਿਜਲੀ ਦੀ ਚਮਕ ਦੇ ਵਿਚਕਾਰ ਸ਼ੁਰੂ ਹੋਈ ਮੂਸਲਾਧਾਰ ਬਾਰਿਸ਼ ਨੇ ਲੋਕਾਂ ਨੂੰ ਘਰਾਂ ਵਿੱਚ ਕੈਦ ਹੋਣ ਲਈ ਮਜਬੂਰ ਕਰ ਦਿੱਤਾ।
ਦਰੱਖਤ ਉਖੜੇ, ਰਫ਼ਤਾਰ ਪਈ ਮੱਠੀ
ਤੂਫ਼ਾਨ ਦਾ ਅਸਰ ਪੰਜਾਬ ਦੇ ਕਈ ਇਲਾਕਿਆਂ ਦੇ ਬੁਨਿਆਦੀ ਢਾਂਚੇ ‘ਤੇ ਵੀ ਦੇਖਣ ਨੂੰ ਮਿਲਿਆ। ਹਵਾਵਾਂ ਦਾ ਵੇਗ ਇੰਨਾ ਤੇਜ਼ ਸੀ ਕਿ ਕਈ ਇਲਾਕਿਆਂ ਵਿੱਚ ਪੁਰਾਣੇ ਅਤੇ ਭਾਰੀ ਦਰੱਖਤ ਜੜ੍ਹੋਂ ਉਖੜ ਕੇ ਸੜਕਾਂ ‘ਤੇ ਜਾ ਡਿੱਗੇ।
ਇਸ ਦੇ ਕਾਰਨ ਕਈ ਮੁੱਖ ਮਾਰਗਾਂ ‘ਤੇ ਲੰਬਾ ਜਾਮ ਲੱਗ ਗਿਆ ਅਤੇ ਆਵਾਜਾਈ ਪ੍ਰਬੰਧ ਪੂਰੀ ਤਰ੍ਹਾਂ ਨਾਲ ਪ੍ਰਭਾਵਿਤ ਹੋ ਗਿਆ।
ਦਿਨ ਦੇ ਉਜਾਲੇ ਵਿੱਚ ਘੁੱਪ ਹਨੇਰਾ ਹੋਣ ਅਤੇ ਲਗਾਤਾਰ ਹੋ ਰਹੀ ਬਾਰਿਸ਼ ਕਾਰਨ ਲੋਕ ਘਰਾਂ ਤੋਂ ਬਾਹਰ ਨਿਕਲਣ ਦੀ ਹਿੰਮਤ ਨਹੀਂ ਜੁਟਾ ਸਕੇ।
ਦਰੱਖਤ ਡਿੱਗਣ ਅਤੇ ਤੇਜ਼ ਹਵਾਵਾਂ ਕਾਰਨ ਚੰਡੀਗੜ੍ਹ ਵਰਗੇ ਵਿਕਸਤ ਸ਼ਹਿਰ ਦੇ ਕਈ ਸੈਕਟਰਾਂ ਵਿੱਚ ਘੰਟਿਆਂ ਬੱਧੀ ਬਿਜਲੀ ਸਪਲਾਈ ਠੱਪ ਰਹੀ।
ਲਗਾਤਾਰ ਹੋਈ ਤੇਜ਼ ਬਾਰਿਸ਼ ਕਾਰਨ ਨੀਵੇਂ ਇਲਾਕਿਆਂ ਵਿੱਚ ਪਾਣੀ ਭਰ ਗਿਆ, ਜਿਸ ਕਾਰਨ ਰਾਹਗੀਰਾਂ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ।
ਮੌਸਮ ਵਿਭਾਗ ਅਨੁਸਾਰ ਆਉਣ ਵਾਲੇ ਕੁਝ ਘੰਟਿਆਂ ਤੱਕ ਸਥਿਤੀ ਅਜਿਹੀ ਹੀ ਬਣੀ ਰਹਿ ਸਕਦੀ ਹੈ, ਇਸ ਲਈ ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਸਾਵਧਾਨ ਰਹਿਣ ਦੀ ਅਪੀਲ ਕੀਤੀ ਹੈ।
