Punjab News: NRI ਨਬਾਲਿਗ ਭਤੀਜੀ ਨਾਲ ਅਸ਼ਲੀਲ ਹਰਕਤਾਂ ਕਰਨ ਦੇ ਦੋਸ਼ ‘ਚ ਚਾਚੇ ਵਿਰੁੱਧ FIR ਦਰਜ
ਵਿਦੇਸ਼ੀ ਐੱਨ.ਆਰ.ਆਈ. (NRI) ਪਰਿਵਾਰ ਦੀ 13 ਸਾਲਾ ਬੱਚੀ ਨੂੰ ਬਣਾਇਆ ਨਿਸ਼ਾਨਾ
ਸੋਸ਼ਲ ਮੀਡੀਆ ਰਾਹੀਂ ਭੇਜਦਾ ਸੀ ਅਸ਼ਲੀਲ ਮੈਸੇਜ, ਪੰਚਾਇਤੀ ਰਾਜ਼ੀਨਾਮੇ ਤੋਂ ਬਾਅਦ ਵੀ ਨਹੀਂ ਆਇਆ ਬਾਜ਼
ਪੁਲਿਸ ਨੇ ਮੁਲਜ਼ਮ ਸੌਰਵ ਵੜੈਚ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਕਾਨੂੰਨੀ ਕਾਰਵਾਈ ਕੀਤੀ ਸ਼ੁਰੂ
Punjab News: ਟਾਂਡਾ ਉੜਮੁੜ (ਹੁਸ਼ਿਆਰਪੁਰ), 10 ਮਈ 2026: ਥਾਣਾ ਟਾਂਡਾ ਪੁਲਿਸ ਨੇ ਰਿਸ਼ਤਿਆਂ ਨੂੰ ਤਾਰ-ਤਾਰ ਕਰਨ ਵਾਲੀ ਇੱਕ ਘਟਨਾ ਵਿੱਚ ਇੱਕ ਨਬਾਲਿਗ ਲੜਕੀ ਨਾਲ ਅਸ਼ਲੀਲ ਹਰਕਤਾਂ ਕਰਨ ਅਤੇ ਉਸ ਨੂੰ ਪ੍ਰੇਸ਼ਾਨ ਕਰਨ ਦੇ ਦੋਸ਼ ਹੇਠ ਉਸਦੇ ਸਕੇ ਚਾਚੇ ਵਿਰੁੱਧ ਮਾਮਲਾ ਦਰਜ ਕੀਤਾ ਹੈ। ਮੁਲਜ਼ਮ ਦੀ ਪਛਾਣ ਸੌਰਵ ਵਜੋਂ ਹੋਈ ਹੈ।
ਐੱਸ.ਐੱਚ.ਓ. ਟਾਂਡਾ ਗੁਰਿੰਦਰਜੀਤ ਸਿੰਘ ਨਾਗਰਾ ਨੇ ਦੱਸਿਆ ਕਿ ਪੀੜਤ ਨਬਾਲਿਗ ਲੜਕੀ ਦੇ ਪਿਤਾ, ਜੋ ਵਿਦੇਸ਼ ਵਿੱਚ ਪੱਕੇ ਤੌਰ ‘ਤੇ ਵਸੇ ਹੋਏ ਹਨ, ਨੇ ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿੱਚ ਦੱਸਿਆ ਕਿ ਉਹ ਨਵੰਬਰ 2024 ਵਿੱਚ ਆਪਣੇ ਦੋ ਬੱਚਿਆਂ (8 ਸਾਲਾ ਪੁੱਤਰ ਅਤੇ 13 ਸਾਲਾ ਧੀ) ਨਾਲ ਇੰਡੀਆ ਆਪਣੇ ਪਿੰਡ ਘੁੰਮਣ ਆਏ ਸਨ। ਪਿੰਡ ਵਿੱਚ ਉਹ ਸਾਂਝੇ ਪਰਿਵਾਰ ਵਿੱਚ ਰਹਿ ਰਹੇ ਸਨ।
ਪਿਤਾ ਅਨੁਸਾਰ, ਇਸ ਦੌਰਾਨ ਲੜਕੀ ਦੇ ਚਾਚੇ ਨੇ ਉਸ ਦੀ ਫੇਸਬੁੱਕ ਆਈ.ਡੀ. ਰਾਹੀਂ ਉਸ ਨਾਲ ਸੰਪਰਕ ਵਧਾਇਆ ਅਤੇ ਘਰ ਵਿੱਚ ਰਹਿੰਦਿਆਂ ਹੀ ਉਸ ਨਾਲ ਛੇੜਛਾੜ ਕਰਨੀ ਸ਼ੁਰੂ ਕਰ ਦਿੱਤੀ। ਸ਼ੁਰੂਆਤ ਵਿੱਚ ਪਰਿਵਾਰ ਨੂੰ ਇਸ ਗੱਲ ਦਾ ਸ਼ੱਕ ਨਹੀਂ ਹੋਇਆ।
ਜਦੋਂ ਪਰਿਵਾਰ ਆਪਣੀ ਭੂਆ ਦੇ ਪਿੰਡ ਗਿਆ, ਤਾਂ ਉੱਥੇ ਵੀ ਚਾਚਾ ਉਨ੍ਹਾਂ ਦੇ ਪਿੱਛੇ ਪਹੁੰਚ ਗਿਆ। ਭੂਆ ਵੱਲੋਂ ਚਾਚਾ ਦੀਆਂ ਹਰਕਤਾਂ ਬਾਰੇ ਸ਼ੱਕ ਜ਼ਾਹਿਰ ਕਰਨ ਤੋਂ ਬਾਅਦ ਜਦੋਂ ਪਿਤਾ ਨੇ ਬੇਟੀ ਦਾ ਮੋਬਾਈਲ ਚੈੱਕ ਕੀਤਾ, ਤਾਂ ਉਸ ਵਿੱਚ ਸੌਰਵ ਵੱਲੋਂ ਭੇਜੇ ਅਸ਼ਲੀਲ ਮੈਸੇਜ ਮਿਲੇ। ਉਸ ਸਮੇਂ ਪਿੰਡ ਦੀ ਪੰਚਾਇਤ ਵਿੱਚ ਚਾਚਾ ਨੇ ਮੁਆਫ਼ੀ ਮੰਗ ਲਈ ਅਤੇ ਲਿਖਤੀ ਰਾਜ਼ੀਨਾਮਾ ਹੋ ਗਿਆ।
ਫਰਵਰੀ 2025 ਵਿੱਚ ਲੜਕੀ ਆਪਣੀ ਮਾਂ ਨਾਲ ਵਾਪਸ ਵਿਦੇਸ਼ ਚਲੀ ਗਈ, ਪਰ ਮੁਲਜ਼ਮ ਚਾਚਾ ਫਿਰ ਵੀ ਬਾਜ਼ ਨਹੀਂ ਆਇਆ। ਉਸ ਨੇ ਇੰਸਟਾਗ੍ਰਾਮ ਅਤੇ ਫੇਸਬੁੱਕ ‘ਤੇ ਵੱਖ-ਵੱਖ ਫਰਜ਼ੀ ਆਈ.ਡੀਜ਼ ਬਣਾ ਕੇ ਲੜਕੀ ਨੂੰ ਲਗਾਤਾਰ ਅਸ਼ਲੀਲ ਮੈਸੇਜ ਭੇਜਣੇ ਜਾਰੀ ਰੱਖੇ। ਜਦੋਂ ਲੜਕੀ ਦੇ ਪਿਤਾ ਨੂੰ ਇਸ ਗੱਲ ਦੀ ਜਾਣਕਾਰੀ ਮਿਲੀ, ਤਾਂ ਉਹ ਤੁਰੰਤ ਇੰਡੀਆ ਆਏ ਅਤੇ ਟਾਂਡਾ ਪੁਲਿਸ ਕੋਲ ਇਨਸਾਫ਼ ਦੀ ਗੁਹਾਰ ਲਾਈ।
ਟਾਂਡਾ ਪੁਲਿਸ ਨੇ ਪਿਤਾ ਦੇ ਬਿਆਨਾਂ ਦੇ ਆਧਾਰ ‘ਤੇ ਮੁਲਜ਼ਮ ਸੌਰਵ ਖ਼ਿਲਾਫ਼ ਧਾਰਾ 354, 354-A ਅਤੇ ਹੋਰ ਸਬੰਧਤ ਧਾਰਾਵਾਂ ਤਹਿਤ ਕੇਸ ਦਰਜ ਕਰ ਲਿਆ ਹੈ। ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਬੱਚੀ ਨੂੰ ਇਨਸਾਫ਼ ਦਿਵਾਇਆ ਜਾਵੇਗਾ।
