“2047 ਤੱਕ ਵਿਕਸਤ ਭਾਰਤ ਅਤੇ 3ਜੀ ਸਭ ਤੋਂ ਵੱਡੀ ਅਰਥਵਿਵਸਥਾ- ਅਸੀਂ ਇਹ ਕਰਕੇ ਦਿਖਾਵਾਂਗੇ”: PM Modi
ਰਾਜਨੀਤਿਕ ਯਾਤਰਾ ਦੇ 25 ਸਾਲ: ਪ੍ਰਧਾਨ ਮੰਤਰੀ ਮੋਦੀ ਨੇ ਦੱਸਿਆ ਆਪਣੇ ਜੀਵਨ ਦਾ ਮੂਲ ਮੰਤਰ ਅਤੇ ਭਵਿੱਖ ਦਾ ਸੰਕਲਪ
ਨਵੀਂ ਦਿੱਲੀ, 7 ਅਕਤੂਬਰ 2026- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮੁੱਖ ਮੰਤਰੀ ਅਤੇ ਪ੍ਰਧਾਨ ਮੰਤਰੀ ਵਜੋਂ ਜਨਤਕ ਸੇਵਾ ਵਿੱਚ ਆਪਣੇ 25 ਸਾਲ ਪੂਰੇ ਕਰ ਲਏ ਹਨ। ਇਸ ਖਾਸ ਮੌਕੇ ‘ਤੇ ਰਾਜਧਾਨੀ ਦਿੱਲੀ ਦੇ ਇੰਦਰਾ ਗਾਂਧੀ ਸਟੇਡੀਅਮ ਵਿੱਚ ਆਯੋਜਿਤ ਇੱਕ ਵਿਸ਼ੇਸ਼ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਪ੍ਰਧਾਨ ਮੰਤਰੀ ਨੇ ਆਪਣੇ ਜੀਵਨ ਦੇ ਸੰਘਰਸ਼ਾਂ, ਸਿਧਾਂਤਾਂ ਅਤੇ ਦੇਸ਼ ਦੇ ਭਵਿੱਖ ਲਈ ਆਪਣੇ ਦ੍ਰਿਸ਼ਟੀਕੋਣ ਨੂੰ ਦੇਸ਼ ਵਾਸੀਆਂ ਸਾਹਮਣੇ ਰੱਖਿਆ। ਉਨ੍ਹਾਂ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਉਹ ਇੱਕ ਅਜਿਹੇ ਵਿਅਕਤੀ ਹਨ ਜੋ ਕਿਸੇ ਵਿਅਕਤੀਗਤ ਇੱਛਾ ਲਈ ਨਹੀਂ, ਸਗੋਂ ਦੇਸ਼ ਸੇਵਾ ਦੇ ਮਿਸ਼ਨ ਲਈ ਜਿਉਂਦੇ ਹਨ।
ਆਪਣੇ ਸੰਬੋਧਨ ਦੌਰਾਨ ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ, “ਮੈਂ ਕਦੇ ਨਹੀਂ ਸੋਚਿਆ ਸੀ ਕਿ ਮੈਂ ਜ਼ਿੰਦਗੀ ਵਿੱਚ ਕੀ ਬਣਾਂਗਾ। ਮੇਰੀ ਜ਼ਿੰਦਗੀ ਦੀਆਂ ਚੁਣੌਤੀਆਂ ਅਤੇ ਜਿਸ ਨੇ ਵੀ ਮੈਨੂੰ ਹੇਠਾਂ ਲਿਆਂਦਾ, ਉਸ ਨੇ ਮੈਨੂੰ ਇਹ ਸਿਖਾਇਆ ਕਿ ਦੁਬਾਰਾ ਕਿਵੇਂ ਖੜ੍ਹੇ ਹੋਣਾ ਹੈ।” ਉਨ੍ਹਾਂ ਕਿਹਾ ਕਿ 25 ਸਾਲਾਂ ਦੀ ਇਸ ਯਾਤਰਾ ਨੂੰ ਲੋਕ ਸ਼ਾਇਦ ਇੱਕ ਵੱਡੀ ਪ੍ਰਾਪਤੀ ਸਮਝਦੇ ਹਨ, ਪਰ ਇਹ ਮੇਰੇ ਲਈ ਕਿਸੇ ਨਿੱਜੀ ਵਡਿਆਈ ਦਾ ਮਾਮਲਾ ਨਹੀਂ ਹੈ। ਉਨ੍ਹਾਂ ਨੇ ਆਪਣੇ ਅਤੀਤ ਨੂੰ ਯਾਦ ਕਰਦਿਆਂ ਦੱਸਿਆ ਕਿ 25 ਸਾਲ ਪਹਿਲਾਂ, 50 ਸਾਲ ਦੀ ਉਮਰ ਵਿੱਚ ਉਹ ਜੰਗਲਾਂ ਵਿੱਚ ਆਦਿਵਾਸੀਆਂ ਦੇ ਵਿਚਕਾਰ ਅਤੇ ਪਹਾੜਾਂ ਵਿੱਚ ਰਹਿੰਦੇ ਸਨ।
ਉਨ੍ਹਾਂ ਨੇ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਵਿੱਚ ਇੱਕ ਸੰਗਠਨਾਤਮਕ ਵਰਕਰ ਦਾ ਰਸਤਾ ਚੁਣਿਆ ਸੀ ਅਤੇ ਉਨ੍ਹਾਂ ਦਾ ਕੰਮ ਹਮੇਸ਼ਾ ਸੰਗਠਨ ਤੱਕ ਹੀ ਸੀਮਤ ਸੀ। ਜੇਕਰ ਉਹ ਚੋਣ ਰਾਜਨੀਤੀ ਵਿੱਚ ਚਮਕਣਾ ਚਾਹੁੰਦੇ, ਤਾਂ ਬਹੁਤ ਪਹਿਲਾਂ ਮੈਦਾਨ ਵਿੱਚ ਉਤਰ ਸਕਦੇ ਸਨ, ਪਰ ਅਜਿਹਾ ਕਰਨਾ ਉਨ੍ਹਾਂ ਦਾ ਸੁਭਾਅ ਨਹੀਂ ਸੀ। ਪ੍ਰਧਾਨ ਮੰਤਰੀ ਨੇ ਦੇਸ਼ ਦੇ ਉੱਜਵਲ ਭਵਿੱਖ ਦਾ ਸੰਕਲਪ ਦੁਹਰਾਉਂਦਿਆਂ ਇੱਕ ਸ਼ਕਤੀਸ਼ਾਲੀ ਨਾਅਰਾ ਦਿੱਤਾ।
ਉਨ੍ਹਾਂ ਕਿਹਾ, “2047 ਤੱਕ ਭਾਰਤ ਨੂੰ ਵਿਕਸਤ ਬਣਾਉਣਾ, ਅਸੀਂ ਇਹ ਕਰਾਂਗੇ। ਭਾਰਤ ਨੂੰ ਦੁਨੀਆ ਦੀ ਤੀਜੀ ਸਭ ਤੋਂ ਵੱਡੀ ਅਰਥਵਿਵਸਥਾ ਬਣਾਉਣਾ, ਅਸੀਂ ਇਹ ਕਰਾਂਗੇ। ਸਵੈ-ਨਿਰਭਰ ਭਾਰਤ ਦਾ ਸੁਪਨਾ ਪੂਰਾ ਕਰਨਾ, ਅਸੀਂ ਇਹ ਕਰਾਂਗੇ। ਉਲੰਪਿਕ ਖੇਡਾਂ ਦੀ ਮੇਜ਼ਬਾਨੀ ਕਰਨੀ, ਅਸੀਂ ਇਹ ਕਰਾਂਗੇ ਅਤੇ ਪੁਲਾੜ ਵਿੱਚ ਨਵੇਂ ਕਦਮ ਰੱਖਣਾ, ਅਸੀਂ ਇਹ ਵੀ ਕਰਾਂਗੇ।” ਉਨ੍ਹਾਂ ਕਿਹਾ ਕਿ ਦੇਸ਼ ਦੇ ਲੋਕਾਂ ਵਿੱਚ ਇਹ ਊਰਜਾ ਅਤੇ ਵਿਸ਼ਵਾਸ ਸ਼ਾਨਦਾਰ ਹੈ। ਜਦੋਂ ਦੇਸ਼ ਭਗਤੀ ਅਤੇ ਤਰੱਕੀ ਦਾ ਜਜ਼ਬਾ ਖੂਨ ਵਾਂਗ ਵਗਦਾ ਹੈ, ਤਾਂ ਦੁਨੀਆ ਦੀ ਕੋਈ ਵੀ ਤਾਕਤ ਭਾਰਤ ਨੂੰ ਅੱਗੇ ਵਧਣ ਤੋਂ ਨਹੀਂ ਰੋਕ ਸਕਦੀ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਬਚਪਨ ਤੋਂ ਮਿਲੀ ਸਿੱਖਿਆ ਨੇ ਉਨ੍ਹਾਂ ਨੂੰ ਇੱਕ ਅਜਿਹਾ ਵਿਅਕਤੀ ਬਣਾਇਆ ਹੈ ਜੋ ਕੇਵਲ ਦੇਸ਼ ਲਈ ਨਿਰਸਵਾਰਥ ਕੰਮ ਕਰਨਾ ਚਾਹੁੰਦਾ ਹੈ। ਉਨ੍ਹਾਂ ਕਿਹਾ, “ਮੇਰੇ ਲਈ ਕੰਮ ਹੀ ਸਭ ਕੁਝ ਹੈ ਅਤੇ ਕੰਮ ਹੀ ਮੇਰਾ ਧਰਮ ਹੈ। ਸ਼੍ਰੀਮਦ ਭਗਵਦ ਗੀਤਾ ਸਾਨੂੰ ‘ਕਰਮਣਯੇ ਵਾਧਿਕਾਰਸਤੇ’ ਦਾ ਉਪਦੇਸ਼ ਦਿੰਦੀ ਹੈ ਅਤੇ ਮੈਂ ਇਸੇ ਉਪਦੇਸ਼ ਨੂੰ ਮੰਨਦਿਆਂ ਆਪਣੀ ਯੋਗਤਾ ਅਨੁਸਾਰ ਦੇਸ਼ ਵਾਸਤੇ ਕੰਮ ਕਰਨਾ ਜਾਰੀ ਰੱਖਣਾ ਚਾਹੁੰਦਾ ਹਾਂ।”
ਆਪਣੇ ਭਾਸ਼ਣ ਦੇ ਅੰਤ ਵਿੱਚ ਪੀਐਮ ਮੋਦੀ ਨੇ ਕਿਹਾ ਕਿ ਇਸ ਪਵਿੱਤਰ ਧਰਤੀ ‘ਤੇ ਜਨਮ ਲੈਣ ਦਾ ਅਹਿਸਾਸ ਹੀ ਅੰਮ੍ਰਿਤ ਵਾਂਗ ਹੈ। ਸੱਤਾ ਦੇ ਸੁੱਖ ਅਤੇ ਪਦ-ਪ੍ਰਤਿਸ਼ਠਾ ਇਸ ਦੇ ਮੁਕਾਬਲੇ ਕੁੱਝ ਵੀ ਨਹੀਂ ਹਨ। ਅਹੁਦਾ ਅਤੇ ਮਾਣ-ਸਨਮਾਨ ਦੁਨੀਆ ਵਿੱਚ ਕਿਤੇ ਵੀ ਮਿਲ ਸਕਦੇ ਹਨ, ਪਰ ਭਾਰਤ ਵਰਗੀ ਪਵਿੱਤਰ ਧਰਤੀ ਹੋਰ ਕਿਤੇ ਨਹੀਂ ਮਿਲ ਸਕਦੀ। ਭਾਰਤ ਨੇ ਸਭ ਤੋਂ ਹਨੇਰੇ ਯੁੱਗ ਵਿੱਚ ਵੀ ਮਨੁੱਖਤਾ ਨੂੰ ਗਿਆਨ ਅਤੇ ਕਦਰਾਂ-ਕੀਮਤਾਂ ਦੀ ਰੌਸ਼ਨੀ ਦਿੱਤੀ ਹੈ, ਅਤੇ ਅਜਿਹੇ ਦੇਸ਼ ਦੀ ਸੇਵਾ ਕਰਨ ਦਾ ਮੌਕਾ ਅਨਮੋਲ ਹੈ। ਉਨ੍ਹਾਂ ਕਿਹਾ ਕਿ ਮੇਰੇ 25 ਸਾਲਾਂ ਦਾ ਮੁਲਾਂਕਣ ਇਸ ਗੱਲ ‘ਤੇ ਅਧਾਰਤ ਨਹੀਂ ਹੋਵੇਗਾ ਕਿ ਮੈਂ ਕਿੱਥੇ ਪਹੁੰਚਿਆ ਹਾਂ, ਸਗੋਂ ਇਸ ਗੱਲ ‘ਤੇ ਹੋਵੇਗਾ ਕਿ ਮੇਰਾ ਦੇਸ਼ ਕਿੱਥੇ ਪਹੁੰਚਿਆ ਹੈ।
