ਵੱਡੀ ਖ਼ਬਰ: ਵਿਆਹ ਤੋਂ ਪਹਿਲਾਂ ਸਰੀਰਕ ਸਬੰਧ ਬਣਾਉਣ ‘ਤੇ ਸੁਪਰੀਮ ਕੋਰਟ ਸਖ਼ਤ! ਔਰਤ ਨੂੰ ਪੁੱਛੇ ਤਿੱਖੇ ਸਵਾਲ, ਕਿਹਾ…
ਨਵੀਂ ਦਿੱਲੀ, 17 ਫਰਵਰੀ 2026-
ਵਿਆਹ ਤੋਂ ਪਹਿਲਾਂ ਸਰੀਰਕ ਸੰਬੰਧ ਬਣਾਉਣ ਵਾਲਿਆਂ ਲਈ ਸੁਪਰੀਮ ਕੋਰਟ ਨੇ ਇੱਕ ਸਖਤ ਟਿੱਪਣੀ ਕੀਤੀ ਹੈ। ਕੋਰਟ ਨੇ ਕਿਹਾ ਹੈ ਕਿ ਜੇਕਰ ਔਰਤਾਂ ਵਿਆਹ ਪ੍ਰਤੀ ਇੰਨੀਆਂ ਹੀ ਗੰਭੀਰ ਹਨ ਤਾਂ ਉਹਨਾਂ ਨੂੰ ਵਿਆਹ ਤੋਂ ਪਹਿਲਾਂ, ਕਿਸੇ ਵੀ ਮਰਦ ਨੂੰ ਜਾਣੇ ਪਛਾਣੇ ਬਿਨਾਂ ਸੈਕਸ ਕਰਨ ਤੋਂ ਗੁਰੇਜ ਕਰਨਾ ਚਾਹੀਦਾ ਹੈ। ਕੋਰਟ ਨੇ ਇੱਕ ਮਾਮਲੇ ਵਿੱਚ ਸੁਣਵਾਈ ਦੌਰਾਨ ਕਿਹਾ ਹੈ ਕਿ ਪਹਿਲੀ ਨਜ਼ਰੇ ਅਜਿਹੇ ਮਾਮਲੇ ਸਹਿਮਤੀ ਜਾਪਦੇ ਹਨ ਅਤੇ ਜਦੋਂ ਦੋਵਾਂ ਵਿਚਾਲੇ (ਕੁੜੀ ਮੁੰਡੇ) ਵਿਆਹ ਬਾਰੇ ਗੱਲ ਸਿਰੇ ਨਹੀਂ ਲੱਗਦੀ ਤਾਂ ਇਸ ਨੂੰ ਬਲਾਤਕਾਰ ਦਾ ਰੂਪ ਦੇ ਦਿੱਤਾ ਜਾਂਦਾ ਹੈ।
ਦਰਅਸਲ, ਸੁਪਰੀਮ ਕੋਰਟ ਨੇ “ਵਿਆਹ ਦਾ ਝੂਠਾ ਵਾਅਦਾ ਕਰਕੇ ਬਲਾਤਕਾਰ” ਦੇ ਇੱਕ ਮਾਮਲੇ ਦੀ ਸੁਣਵਾਈ ਦੌਰਾਨ ਇੱਕ ਤਿੱਖੀ ਟਿੱਪਣੀ ਕੀਤੀ। ਅਦਾਲਤ ਨੇ ਸਪੱਸ਼ਟ ਤੌਰ ‘ਤੇ ਕਿਹਾ ਕਿ ਜੇਕਰ ਔਰਤਾਂ ਵਿਆਹ ਪ੍ਰਤੀ ਗੰਭੀਰ ਹਨ ਤਾਂ ਉਨ੍ਹਾਂ ਨੂੰ ਵਿਆਹ ਤੋਂ ਪਹਿਲਾਂ ਸੈਕਸ ਕਰਨ ਬਾਰੇ “ਬਹੁਤ ਸਾਵਧਾਨ” ਰਹਿਣਾ ਚਾਹੀਦਾ ਹੈ। ਜਸਟਿਸ ਬੀ.ਵੀ. ਨਾਗਰਥਨਾ ਅਤੇ ਉੱਜਵਲ ਭੂਯਾਨ ਦੇ ਬੈਂਚ ਨੇ ਇਸ ਮਾਮਲੇ ਵਿੱਚ ਆਪਸੀ ਸਹਿਮਤੀ ਵੱਲ ਇਸ਼ਾਰਾ ਕੀਤਾ ਅਤੇ ਪਟੀਸ਼ਨਕਰਤਾ ਨੂੰ ਕਈ ਸਖ਼ਤ ਸਵਾਲ ਪੁੱਛੇ।
ਇਹ ਮਾਮਲਾ ਇੱਕ ਜਵਾਨ ਕੁੜੀ ਅਤੇ ਆਦਮੀ ਨਾਲ ਸਬੰਧਤ ਹੈ, ਜੋ 2022 ਵਿੱਚ ਇੱਕ ਮੈਟਰੀਮੋਨੀਅਲ ਵੈੱਬਸਾਈਟ ਰਾਹੀਂ ਮਿਲੇ ਸਨ। ਕੁੜੀ ਦਾ ਦੋਸ਼ ਸੀ ਕਿ ਆਦਮੀ ਨੇ ਵਿਆਹ ਦਾ ਵਾਅਦਾ ਕੀਤਾ ਸੀ, ਅਤੇ ਉਹ ਉਸ ਨਾਲ ਦਿੱਲੀ ਅਤੇ ਫਿਰ ਦੁਬਈ ਗਈ। ਬਾਅਦ ਵਿੱਚ, ਉਸਨੂੰ (ਕੁੜੀ ਨੂੰ) ਪਤਾ ਲੱਗਾ ਕਿ ਆਦਮੀ ਪਹਿਲਾਂ ਹੀ ਵਿਆਹਿਆ ਹੋਇਆ ਸੀ। ਕੁੜੀ ਦੇ ਵਕੀਲ ਨੇ ਦਲੀਲ ਦਿੱਤੀ ਕਿ ਆਦਮੀ ਨੇ ਨਾ ਸਿਰਫ਼ ਉਸਨੂੰ ਧੋਖਾ ਦਿੱਤਾ, ਸਗੋਂ ਉਨ੍ਹਾਂ ਦੇ ਨਜ਼ਦੀਕੀ ਪਲਾਂ ਦੀਆਂ ਵੀਡੀਓ ਬਣਾ ਕੇ ਉਸਨੂੰ ਬਲੈਕਮੇਲ ਵੀ ਕੀਤਾ।
ਇਸ ਮਾਮਲੇ ਵਿੱਚ ਸੁਣਵਾਈ ਦੌਰਾਨ, ਜਸਟਿਸ ਬੀ.ਵੀ. ਨਾਗਰਥਨਾ ਨੇ ਕੁੜੀ ਦੇ ਰਵੱਈਏ ‘ਤੇ ਹੈਰਾਨੀ ਪ੍ਰਗਟ ਕੀਤੀ ਅਤੇ ਸਿੱਧੇ ਤੌਰ ‘ਤੇ ਪੁੱਛਿਆ ਕਿ ਉਸਨੂੰ ਇੱਕ ਅਜਨਬੀ ‘ਤੇ ਇੰਨਾ ਭਰੋਸਾ ਕਿਉਂ ਹੈ? ਬੈਂਚ ਨੇ ਪੁੱਛਿਆ, “ਜੇਕਰ ਤੁਸੀਂ ਕਿਸੇ ਵੈੱਬਸਾਈਟ ਰਾਹੀਂ ਮਿਲੇ ਸੀ ਅਤੇ ਅਣਜਾਣ ਸੀ, ਤਾਂ ਤੁਸੀਂ ਬਿਨਾਂ ਲੋੜੀਂਦੀ ਜਾਣਕਾਰੀ ਦੇ ਉਸ ਨਾਲ ਦਿੱਲੀ ਅਤੇ ਦੁਬਈ ਕਿਵੇਂ ਗਏ?”
ਅਦਾਲਤ ਨੇ ਕਿਹਾ ਕਿ ਜੇਕਰ ਕੋਈ ਔਰਤ ਵਿਆਹ ਪ੍ਰਤੀ ਗੰਭੀਰ ਹੈ, ਤਾਂ ਉਸਨੂੰ ਵਿਆਹ ਤੋਂ ਪਹਿਲਾਂ ਦੇ ਰਿਸ਼ਤੇ ਵਿੱਚ ਦਾਖਲ (ਸਰੀਰਕ ਸਬੰਧ) ਹੋਣ ਵਿੱਚ ਸਾਵਧਾਨੀ ਵਰਤਣੀ ਚਾਹੀਦੀ ਹੈ। ਕੋਰਟ ਨੇ ਕਿਹਾ ਕਿ, ਬਿਨਾਂ ਜਾਣੇ ਪਛਾਣੇ ਕਿਸੇ ‘ਤੇ ਵੀ ਇੰਨਾ ਅੰਨ੍ਹਾ ਭਰੋਸਾ ਸਮਝ ਤੋਂ ਪਰੇ ਹੈ।
ਸਹਿਮਤੀ ਜਾਂ ਜ਼ਬਰਦਸਤੀ?
ਅਦਾਲਤ ਨੇ ਟਿੱਪਣੀ ਕੀਤੀ ਕਿ, ਮਾਮਲੇ ਦੇ ਤੱਥਾਂ ਨੂੰ ਦੇਖਦੇ ਹੋਏ, ਪਹਿਲੀ ਨਜ਼ਰੇ ਇਹ ਸਹਿਮਤੀ ਵਾਲਾ ਰਿਸ਼ਤਾ (ਰਿਲੇਸ਼ਨ) ਜਾਪਦਾ ਹੈ। ਜਦੋਂ ਕੁੜੀ ਦੇ ਵਕੀਲ ਨੇ ਵੀਡੀਓ ਵਾਇਰਲ ਕਰਨ ਦੀ ਧਮਕੀ ਦਾ ਜ਼ਿਕਰ ਕੀਤਾ, ਤਾਂ ਵੀ ਬੈਂਚ ਆਪਣੇ ਰੁਖ਼ ‘ਤੇ ਅੜਿਆ ਰਿਹਾ। ਅਦਾਲਤ ਨੇ ਕਿਹਾ ਕਿ ਦੋਸ਼ਾਂ ਦੀ ਗੰਭੀਰਤਾ ਦੇ ਬਾਵਜੂਦ, ਬੁਨਿਆਦੀ ਸਵਾਲ ਇਹੀ ਰਹਿੰਦਾ ਹੈ: ਇੱਕ ਅਜਨਬੀ ਨਾਲ ਅਜਿਹਾ ਰਿਸ਼ਤਾ ਕਿਉਂ ਸਥਾਪਿਤ ਕੀਤਾ ਗਿਆ?
ਇਸ ਮਾਮਲੇ ਵਿੱਚ ਲੰਬੀ ਬਹਿਸ ਤੋਂ ਬਾਅਦ, ਸੁਪਰੀਮ ਕੋਰਟ ਨੇ ਦੋਵਾਂ ਧਿਰਾਂ ਨੂੰ ਆਪਸੀ ਸਮਝੌਤੇ ਦੀ ਸੰਭਾਵਨਾ ਦੀ ਪੜਚੋਲ ਕਰਨ ਦੀ ਸਲਾਹ ਦਿੱਤੀ। ਬੈਂਚ ਨੇ ਕਿਹਾ ਕਿ ਅਜਿਹੇ ਸਹਿਮਤੀ ਵਾਲੇ ਮਾਮਲਿਆਂ ਨੂੰ ਲੰਮਾ ਕਰਨਾ, ਮੁਕੱਦਮੇ ਚਲਾਉਣਾ ਅਤੇ ਸਜ਼ਾ ਤੱਕ ਪਹੁੰਚਾਉਣਾ ਸ਼ਾਇਦ ਉਚਿਤ ਨਹੀਂ ਹੋਵੇਗਾ।
