ਮਹਾਕੁੰਭ ‘ਚ ਮਸ਼ਹੂਰ ਹੋਏ IIT ਬਾਬੇ ਨੇ ਰਚਾਇਆ ਵਿਆਹ; ਕਰਨਾਟਕ ਦੀ ਇੰਜੀਨੀਅਰ ਬਣੀ ਜੀਵਨ ਸਾਥਣ
ਝੱਜਰ/ਹਿਮਾਚਲ ਪ੍ਰਦੇਸ਼, 7 ਅਪ੍ਰੈਲ 2026:
ਪ੍ਰਯਾਗਰਾਜ ਮਹਾਕੁੰਭ ਮੇਲੇ ਵਿੱਚ ਆਪਣੀ ਵਿਲੱਖਣ ਜੀਵਨ ਸ਼ੈਲੀ ਕਾਰਨ ਸੁਰਖੀਆਂ ਬਟੋਰਨ ਵਾਲੇ ਬਾਬਾ ਅਭੈ ਸਿੰਘ ਇੱਕ ਵਾਰ ਫਿਰ ਚਰਚਾ ਵਿੱਚ ਹਨ। ਲੰਬੇ ਸਮੇਂ ਬਾਅਦ ਉਹ ਸੋਮਵਾਰ ਨੂੰ ਹਰਿਆਣਾ ਦੇ ਝੱਜਰ ਵਿੱਚ ਆਪਣੀ ਪਤਨੀ ਨਾਲ ਨਜ਼ਰ ਆਏ। ਉਨ੍ਹਾਂ ਖੁਲਾਸਾ ਕੀਤਾ ਕਿ ਉਨ੍ਹਾਂ ਨੇ 15 ਫਰਵਰੀ ਨੂੰ ਸ਼ਿਵਰਾਤਰੀ ਦੇ ਮੌਕੇ ‘ਤੇ ਹਿਮਾਚਲ ਦੇ ਅਘੰਜਰ ਮੰਦਰ ਵਿੱਚ ਵਿਆਹ ਕਰ ਲਿਆ ਸੀ ਅਤੇ 19 ਫਰਵਰੀ ਨੂੰ ਕੋਰਟ ਮੈਰਿਜ ਵੀ ਕਰਵਾਈ।
ਭਗਵੇਂ ਕੱਪੜੇ ਪਹਿਨੀ ਅਭੈ ਸਿੰਘ ਆਪਣੇ ਪਿਤਾ (ਜੋ ਕਿ ਇੱਕ ਵਕੀਲ ਹਨ) ਦੇ ਚੈਂਬਰ ਵਿੱਚ ਪਹੁੰਚੇ। ਉਨ੍ਹਾਂ ਕਿਹਾ, “ਅਸੀਂ ਦੋਵੇਂ ਆਪਣੀ ਜ਼ਿੰਦਗੀ ਤੋਂ ਬਹੁਤ ਖੁਸ਼ ਹਾਂ ਅਤੇ ਫਿਲਹਾਲ ਸਾਦਗੀ ਨਾਲ ਰਹਿ ਰਹੇ ਹਾਂ।” ਉਨ੍ਹਾਂ ਯਾਦ ਕੀਤਾ ਕਿ ਅਧਿਆਤਮ ਵੱਲ ਜਾਣ ਤੋਂ ਪਹਿਲਾਂ ਉਹ ਵੀ ਇਸੇ ਚੈਂਬਰ ਵਿੱਚ ਬੈਠ ਕੇ ਆਪਣੇ ਪਿਤਾ ਦੀਆਂ ਅਰਜ਼ੀਆਂ ਚੈੱਕ ਕਰਿਆ ਕਰਦੇ ਸਨ।
ਕੌਣ ਹੈ ਅਭੈ ਸਿੰਘ ਦੀ ਪਤਨੀ?
ਅਭੈ ਸਿੰਘ ਦੀ ਪਤਨੀ ਪ੍ਰਤੀਕਾ ਮੂਲ ਰੂਪ ਵਿੱਚ ਕਰਨਾਟਕ ਦੀ ਰਹਿਣ ਵਾਲੀ ਹੈ ਅਤੇ ਉਹ ਵੀ ਪੇਸ਼ੇ ਤੋਂ ਇੱਕ ਇੰਜੀਨੀਅਰ ਹੈ। ਪ੍ਰਤੀਕਾ ਨੇ ਦੱਸਿਆ ਕਿ ਅਭੈ ਬਹੁਤ ਹੀ ਇਮਾਨਦਾਰ ਅਤੇ ਸੱਚੇ ਇਨਸਾਨ ਹਨ। ਉਹ ਦੋਵੇਂ ਇੱਕ ਸਾਲ ਪਹਿਲਾਂ ਮਿਲੇ ਸਨ ਅਤੇ ਹੁਣ ਹਿਮਾਚਲ ਦੇ ਧਰਮਸ਼ਾਲਾ ਵਿੱਚ ਰਹਿ ਰਹੇ ਹਨ।
‘ਸਨਾਤਨ ਯੂਨੀਵਰਸਿਟੀ’ ਬਣਾਉਣ ਦਾ ਟੀਚਾ
ਜੋੜੇ ਨੇ ਆਪਣੇ ਭਵਿੱਖ ਦੇ ਵਿਜ਼ਨ ਬਾਰੇ ਦੱਸਦਿਆਂ ਕਿਹਾ ਕਿ ਉਹ ‘ਸਨਾਤਨ ਯੂਨੀਵਰਸਿਟੀ’ ਬਣਾਉਣ ਦੀ ਯੋਜਨਾ ਬਣਾ ਰਹੇ ਹਨ। ਇਸ ਦਾ ਮਕਸਦ ਅਧਿਆਤਮ ਨਾਲ ਜੁੜੇ ਗੁਰੂਆਂ ਅਤੇ ਸਾਧਕਾਂ ਨੂੰ ਇੱਕ ਮੰਚ ‘ਤੇ ਇਕੱਠਾ ਕਰਨਾ ਹੈ। ਉਹ ਆਪਣੇ ਪਰਿਵਾਰਕ ਮੈਂਬਰਾਂ ਅਤੇ ਸੱਸ-ਸਹੁਰੇ ਨੂੰ ਮਿਲਣ ਲਈ ਝੱਜਰ ਆਏ ਹੋਏ ਹਨ।
ਅਭੈ ਸਿੰਘ ਮੂਲ ਰੂਪ ਵਿੱਚ ਝੱਜਰ ਦੇ ਪਿੰਡ ਸਾਸਰੋਲੀ ਦੇ ਰਹਿਣ ਵਾਲੇ ਹਨ। ਉਨ੍ਹਾਂ ਦੇ ਪਿਤਾ ਕਰਨ ਸਿੰਘ ਝੱਜਰ ਬਾਰ ਐਸੋਸੀਏਸ਼ਨ ਦੇ ਪ੍ਰਧਾਨ ਰਹਿ ਚੁੱਕੇ ਹਨ। ਬੰਬੇ IIT ਤੋਂ ਐਰੋਸਪੇਸ ਇੰਜੀਨੀਅਰਿੰਗ ਕਰਨ ਵਾਲੇ ਅਭੈ ਸਿੰਘ ਉਸ ਸਮੇਂ ਦੇਸ਼-ਵਿਦੇਸ਼ ਵਿੱਚ ਮਸ਼ਹੂਰ ਹੋਏ ਸਨ ਜਦੋਂ ਉਹ ਉੱਚੀ ਵਿੱਦਿਆ ਹਾਸਲ ਕਰਨ ਦੇ ਬਾਵਜੂਦ ਮਹਾਕੁੰਭ ਵਿੱਚ ਸੰਨਿਆਸੀ ਭੇਸ ਵਿੱਚ ਨਜ਼ਰ ਆਏ ਸਨ।
