ਵੱਡਾ ਹਾਦਸਾ! ਉਸਾਰੀ ਅਧੀਨ ਗੋਦਾਮ ਦੀ ਛੱਤ ਡਿੱਗਣ ਕਾਰਨ 5 ਮਜ਼ਦੂਰਾਂ ਦੀ ਮੌਤ
ਮਲਬੇ ਹੇਠੋਂ ਹੁਣ ਤੱਕ 21 ਮਜ਼ਦੂਰਾਂ ਨੂੰ ਕੱਢ ਕੇ ਹਸਪਤਾਲ ਪਹੁੰਚਾਇਆ; ਕਈਆਂ ਦੀ ਹਾਲਤ ਬੇਹੱਦ ਗੰਭੀਰ- ਘਟਨਾ ਸਮੇਂ 40 ਤੋਂ 50 ਮਜ਼ਦੂਰਾਂ ਦੇ ਅੰਦਰ ਹੋਣ ਦਾ ਖਦਸ਼ਾ; ਜੀਵਨ ਦੇ ਸੰਕੇਤ ਲੱਭਣ ਲਈ ਸਨਿਫਰ ਕੁੱਤੇ ਅਤੇ ਡਰੋਨ ਤਾਇਨਾਤ
ਕੋਲਕਾਤਾ, 25 ਜੂਨ 2026-
ਕੋਲਕਾਤਾ ਦੇ ਤਾਰਤਲਾ ਥਾਣਾ ਖੇਤਰ ਤੋਂ ਇੱਕ ਬੇਹੱਦ ਦਰਦਨਾਕ ਅਤੇ ਭਿਆਨਕ ਹਾਦਸਾ ਸਾਹਮਣੇ ਆਇਆ ਹੈ। ਇੱਥੇ ਬ੍ਰੇਸ ਬ੍ਰਿਜ ਨੇੜੇ ਟਰਾਂਸਪੋਰਟ ਡਿਪੂ ਰੋਡ ‘ਤੇ ਉਸਾਰੀ ਅਧੀਨ ਇੱਕ ਗੋਦਾਮ ਦੀ ਛੱਤ ਬੁੱਧਵਾਰ ਦੁਪਹਿਰ 12 ਵਜੇ ਦੇ ਕਰੀਬ ਅਚਾਨਕ ਢਹਿ-ਢੇਰੀ (Roof Collapsed) ਹੋ ਗਈ। ਇਸ ਰੂਹ ਕੰਬਾਊ ਹਾਦਸੇ ਵਿੱਚ ਹੁਣ ਤੱਕ 5 ਮਜ਼ਦੂਰਾਂ ਦੀ ਮੌਤ ਹੋਣ ਦੀ ਪੁਸ਼ਟੀ ਹੋਈ ਹੈ, ਜਦੋਂ ਕਿ ਕਈ ਹੋਰਾਂ ਦੇ ਮਲਬੇ ਹੇਠ ਫਸੇ ਹੋਣ ਦਾ ਖਦਸ਼ਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਜਦੋਂ ਗੋਦਾਮ ਦੀ ਉਸਾਰੀ ਦਾ ਕੰਮ ਚੱਲ ਰਿਹਾ ਸੀ, ਤਾਂ ਅਚਾਨਕ ਲੋਹੇ ਦੇ ਵੱਡੇ ਬੀਮ ਅਤੇ ਕੰਕਰੀਟ ਦੀਆਂ ਭਾਰੀ ਸਲੈਬਾਂ ਹੇਠਾਂ ਆ ਡਿੱਗੀਆਂ, ਜਿਸ ਕਾਰਨ ਉੱਥੇ ਕੰਮ ਕਰ ਰਹੇ ਦਰਜਨਾਂ ਮਜ਼ਦੂਰ ਮਲਬੇ ਦੇ ਹੇਠਾਂ ਦੱਬ ਗਏ। ਹਾਦਸੇ ਤੋਂ ਬਾਅਦ ਗੋਦਾਮ ਦੇ ਅੰਦਰ ਬੇਹੱਦ ਖੌਫਨਾਕ ਮੰਜ਼ਰ ਦੇਖਣ ਨੂੰ ਮਿਲਿਆ। ਲੋਹੇ ਦੇ ਭਾਰੀ ਬੀਮਾਂ ਦੇ ਹੇਠਾਂ ਦੱਬਣ ਕਾਰਨ ਕਈ ਲਾਸ਼ਾਂ ਦੇ ਅੰਗ ਅਤੇ ਸਿਰ ਬੁਰੀ ਤਰ੍ਹਾਂ ਕੁਚਲੇ ਗਏ।
ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਕੋਲਕਾਤਾ ਪੁਲਿਸ, ਆਫ਼ਤ ਪ੍ਰਬੰਧਨ ਸਮੂਹ (DMG), ਸਿਵਲ ਡਿਫੈਂਸ ਅਤੇ ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਤੁਰੰਤ ਮੌਕੇ ‘ਤੇ ਪਹੁੰਚੀਆਂ। ਸ਼ੁਰੂਆਤੀ ਦੌਰ ਵਿੱਚ ਚਾਰ ਲੋਕਾਂ ਨੂੰ ਸਫਲਤਾਪੂਰਵਕ ਬਾਹਰ ਕੱਢਿਆ ਗਿਆ ਸੀ। ਹਾਦਸੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਰਾਜ ਸਰਕਾਰ ਅਤੇ ਪ੍ਰਸ਼ਾਸਨ ਦੀ ਬੇਨਤੀ ‘ਤੇ ਭਾਰਤੀ ਫ਼ੌਜ (Indian Army) ਦੀਆਂ ਚਾਰ ਟੁਕੜੀਆਂ ਨੂੰ ਵੀ ਮੌਕੇ ‘ਤੇ ਤਾਇਨਾਤ ਕੀਤਾ ਗਿਆ ਹੈ।
ਪੁਲਿਸ ਅਤੇ ਰਾਹਤ ਟੀਮਾਂ ਵੱਲੋਂ ਹੁਣ ਤੱਕ 21 ਮਜ਼ਦੂਰਾਂ ਨੂੰ ਮਲਬੇ ਵਿੱਚੋਂ ਸੁਰੱਖਿਅਤ ਬਾਹਰ ਕੱਢ ਕੇ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ, ਜਿਨ੍ਹਾਂ ਵਿੱਚੋਂ ਕਈਆਂ ਦੀ ਹਾਲਤ ਬੇਹੱਦ ਗੰਭੀਰ ਬਣੀ ਹੋਈ ਹੈ। ਅਧਿਕਾਰੀਆਂ ਮੁਤਾਬਕ ਹਾਦਸੇ ਦੇ ਵੇਲੇ ਇਮਾਰਤ ਦੇ ਅੰਦਰ 40 ਤੋਂ 50 ਮਜ਼ਦੂਰਾਂ ਦੇ ਕੰਮ ਕਰਨ ਦਾ ਅੰਦਾਜ਼ਾ ਹੈ, ਜਿਸ ਕਾਰਨ ਬਾਕੀ ਫਸੇ ਲੋਕਾਂ ਦੀ ਭਾਲ ਲਈ ਸਰਚ ਆਪਰੇਸ਼ਨ ਲਗਾਤਾਰ ਜਾਰੀ ਹੈ।
ਮੌਕੇ ‘ਤੇ ਮੌਜੂਦ NDRF ਅਤੇ SDRF ਦੇ ਕਰਮਚਾਰੀ ਕ੍ਰੇਨਾਂ ਦੀ ਮਦਦ ਨਾਲ ਲੋਹੇ ਦੇ ਭਾਰੀ ਬੀਮ ਕੱਟ ਕੇ ਪੀੜਤਾਂ ਨੂੰ ਬਾਹਰ ਕੱਢਣ ਦੀਆਂ ਕੋਸ਼ਿਸ਼ਾਂ ਵਿੱਚ ਜੁਟੇ ਹੋਏ ਹਨ। ਐਨ.ਡੀ.ਆਰ.ਐਫ. (NDRF) ਵੱਲੋਂ ਢਾਂਚੇ ਦੇ ਹੇਠਾਂ ਜ਼ਿੰਦਾ ਫਸੇ ਲੋਕਾਂ ਦੀ ਸਹੀ ਲੋਕੇਸ਼ਨ ਦਾ ਪਤਾ ਲਗਾਉਣ ਲਈ ਸਨਿਫਰ ਕੁੱਤੇ (Sniffer Dogs) ਅਤੇ ਓਵਰਹੈੱਡ ਡਰੋਨਾਂ ਦੀ ਵਰਤੋਂ ਵੀ ਕੀਤੀ ਜਾ ਰਹੀ ਹੈ।
