Doctor Suicide! ਪ੍ਰੇਮ ਸਬੰਧਾਂ ਦੇ ਚੱਲਦਿਆਂ ਲੁਧਿਆਣਾ ਦੇ ਡਾਕਟਰ ਨੇ ਸਰਕਾਰੀ ਹਸਪਤਾਲ ‘ਚ ਕੀਤੀ ਖ਼ੁਦਕੁਸ਼ੀ, ਸੁਸਾਈਡ ਨੋਟ ‘ਚ ਲਿਖੀ ਵਜ੍ਹਾ
ਦਿੱਲੀ/ਲੁਧਿਆਣਾ, 06 ਜੁਲਾਈ 2026- ਦਿੱਲੀ ਦੇ ਇੱਕ ਸਰਕਾਰੀ ਹਸਪਤਾਲ ਵਿੱਚ ਤਾਇਨਾਤ ਡਾਕਟਰ ਵੱਲੋਂ ਆਪਣੇ ਆਪ ਨੂੰ ਐਨਸਥੀਸੀਆ ਦਾ ਇੰਜੈਕਸ਼ਨ ਲਗਾ ਕੇ ਖ਼ੁਦਕੁਸ਼ੀ ਕਰਨ ਦਾ ਬੇਹੱਦ ਦੁਖਦਾਈ ਮਾਮਲਾ ਸਾਹਮਣੇ ਆਇਆ ਹੈ। ਹਸਪਤਾਲ ਵਿੱਚ ਤਾਇਨਾਤ 35 ਸਾਲਾ ਸੀਨੀਅਰ ਰੈਜ਼ੀਡੈਂਟ (SR) ਡਾਕਟਰ ਸਿਮਰਪ੍ਰੀਤ ਡਿਊਟੀ ਰੂਮ ਵਿੱਚ ਮ੍ਰਿਤਕ ਪਾਏ ਗਏ ਹਨ। ਕਮਰੇ ਵਿੱਚੋਂ 3 ਪੰਨਿਆਂ ਦਾ ਸੁਸਾਈਡ ਨੋਟ ਅਤੇ ਇੱਕ ਡਾਇਰੀ ਵੀ ਬਰਾਮਦ ਹੋਈ ਹੈ।
ਸ਼ੁਰੂਆਤੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਖ਼ੁਦਕੁਸ਼ੀ ਦਾ ਕਾਰਨ ਪ੍ਰੇਮ ਪ੍ਰਸੰਗ ਹੋ ਸਕਦਾ ਹੈ। ਪੁਲਿਸ ਨੇ ਲਾਸ਼ ਨੂੰ ਪੋਸਟਮਾਰਟਮ ਲਈ ਮੋਰਚਰੀ ਵਿੱਚ ਰਖਵਾ ਦਿੱਤਾ ਹੈ ਅਤੇ ਕੱਲ੍ਹ ਮੈਡੀਕਲ ਬੋਰਡ ਰਾਹੀਂ ਪੋਸਟਮਾਰਟਮ ਕਰਵਾਇਆ ਜਾਵੇਗਾ। ਸਿਵਲ ਲਾਈਨਜ਼ ਥਾਣਾ ਪੁਲਿਸ ਇਸ ਪੂਰੇ ਮਾਮਲੇ ਦੀ ਬਾਰੀਕੀ ਨਾਲ ਜਾਂਚ ਕਰ ਰਹੀ ਹੈ। ਪੁਲਿਸ ਨੂੰ ਪੀ.ਸੀ.ਆਰ (PCR) ਕਾਲ ਨੰਬਰ 25A ਰਾਹੀਂ ਸਿਵਲ ਲਾਈਨਜ਼ ਥਾਣੇ ਨੂੰ ਇਸ ਘਟਨਾ ਦੀ ਸੂਚਨਾ ਮਿਲੀ ਸੀ।
ਡਾ. ਸਿਮਰਪ੍ਰੀਤ ਸਿਵਲ ਲਾਈਨ ਸਥਿਤ ਅਰੁਣਾ ਆਸਫ਼ ਅਲੀ ਹਸਪਤਾਲ ਦੇ ਐਨਸਥੀਸੀਆ ਵਿਭਾਗ ਵਿੱਚ ਪਿਛਲੇ 3 ਸਾਲਾਂ ਤੋਂ ਕਾਰਜਸ਼ੀਲ ਸਨ। ਜਦੋਂ ਪੁਲਿਸ ਅਰੁਣਾ ਆਸਫ਼ ਅਲੀ ਹਸਪਤਾਲ ਪਹੁੰਚੀ ਤਾਂ ਪਤਾ ਲੱਗਿਆ ਕਿ ਐਨਸਥੀਸੀਆ ਵਿਭਾਗ ਵਿੱਚ ਐਸ.ਆਰ (SR) ਦੇ ਅਹੁਦੇ ‘ਤੇ ਤਾਇਨਾਤ ਡਾ. ਸਿਮਰਪ੍ਰੀਤ ਸਿੰਘ ਆਨੰਦ ਡਿਊਟੀ ਰੂਮ ਨੰਬਰ-109 ਵਿੱਚ ਬੇਹੋਸ਼ੀ ਦੀ ਹਾਲਤ ਵਿੱਚ ਮਿਲੇ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਡਾ. ਸਿਮਰਪ੍ਰੀਤ ਸਿੰਘ ਆਨੰਦ ਮੂਲ ਰੂਪ ਵਿੱਚ ਪੰਜਾਬ ਦੇ ਲੁਧਿਆਣਾ ਦੇ ਰਹਿਣ ਵਾਲੇ ਸਨ।
ਡਾ. ਸਿਮਰਪ੍ਰੀਤ 4-5 ਜੁਲਾਈ ਦੀ ਰਾਤ 8 ਵਜੇ ਤੋਂ ਸਵੇਰੇ 8 ਵਜੇ ਤੱਕ ਨਾਈਟ ਡਿਊਟੀ ‘ਤੇ ਸਨ। ਉਨ੍ਹਾਂ ਦੇ ਡਿਊਟੀ ਰੂਮ ਦਾ ਦਰਵਾਜ਼ਾ ਅੰਦਰੋਂ ਬੰਦ ਸੀ। ਸਵੇਰੇ ਕਰੀਬ 9 ਵਜੇ ਜਦੋਂ ਕੋਈ ਜਵਾਬ ਨਾ ਮਿਲਿਆ ਤਾਂ ਦਰਵਾਜ਼ਾ ਤੋੜ ਕੇ ਕਮਰਾ ਖੋਲ੍ਹਿਆ ਗਿਆ। ਇਸ ਤੋਂ ਬਾਅਦ ਡਾਕਟਰ ਨੂੰ ਤੁਰੰਤ ਐਮਰਜੈਂਸੀ ਵਿੱਚ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਮ੍ਰਿਤਕ ਦੇ ਖੱਬੇ ਹੱਥ ਵਿੱਚ ਕੈਨੁਲਾ (Cannula) ਲੱਗਿਆ ਹੋਇਆ ਸੀ।
ਪੁਲਿਸ ਮੁਤਾਬਕ ਇਹ ਕੈਨੁਲਾ ਰਾਤ 10 ਵਜੇ ਮ੍ਰਿਤਕ ਦੇ ਕਹਿਣ ‘ਤੇ ਹੀ ਇੱਕ ਟੈਕਨੀਸ਼ੀਅਨ ਅਸਿਸਟੈਂਟ ਨੇ ਲਗਾਇਆ ਸੀ। ਜ਼ਿਲ੍ਹਾ ਕਰਾਈਮ ਟੀਮ ਅਤੇ ਐਫ.ਐਸ.ਐਲ (FSL) ਰੋਹਿਣੀ ਦੀ ਟੀਮ ਨੂੰ ਕਮਰੇ ਵਿੱਚੋਂ ਸਰਿੰਜਾਂ ਅਤੇ ਦਵਾਈਆਂ ਦੀਆਂ ਖਾਲੀ ਸ਼ੀਸ਼ੀਆਂ ਮਿਲੀਆਂ ਹਨ। ਇਸ ਦੇ ਨਾਲ ਹੀ ਕਮਰੇ ਵਿੱਚ ਪਏ ਇੱਕ ਕਾਲੇ ਬੈਗ ਵਿੱਚੋਂ ਸੁਸਾਈਡ ਨੋਟ ਅਤੇ ਡਾਇਰੀ ਬਰਾਮਦ ਹੋਈ ਹੈ। 3 ਪੰਨਿਆਂ ਦੇ ਸੁਸਾਈਡ ਨੋਟ ਵਿੱਚ ਡਾਕਟਰ ਨੇ ਲਿਖਿਆ ਹੈ ਕਿ ਉਨ੍ਹਾਂ ਨੇ ਖ਼ੁਦਕੁਸ਼ੀ ਆਪਣੀ ਮਰਜ਼ੀ ਨਾਲ ਕੀਤੀ ਹੈ।
ਸੁਸਾਈਡ ਨੋਟ ਵਿੱਚ ਉਨ੍ਹਾਂ ਨੇ ਇਸੇ ਹਸਪਤਾਲ ਦੇ ਐਨਸਥੀਸੀਆ ਵਿਭਾਗ ਵਿੱਚ ਪਿਛਲੇ 2 ਸਾਲਾਂ ਤੋਂ ਐਸ.ਆਰ ਦੇ ਅਹੁਦੇ ‘ਤੇ ਤਾਇਨਾਤ ਡਾ. ਆਕਾਂਕਸ਼ਾ ਚੌਧਰੀ ਨਾਲ ਆਪਣੇ ਅਫੇਅਰ (ਪ੍ਰੇਮ ਸਬੰਧਾਂ) ਦਾ ਵੀ ਜ਼ਿਕਰ ਕੀਤਾ ਹੈ। ਡਾ. ਆਕਾਂਕਸ਼ਾ ਮੱਧ ਪ੍ਰਦੇਸ਼ ਦੇ ਜਬਲਪੁਰ ਦੀ ਰਹਿਣ ਵਾਲੀ ਹੈ। ਡਾਕਟਰ ਨੇ ਸੁਸਾਈਡ ਨੋਟ ਵਿੱਚ ਲਿਖਿਆ ਕਿ ਦੋਵਾਂ ਦੀ ਜਾਤ (Caste) ਵੱਖ-ਵੱਖ ਹੋਣ ਕਾਰਨ ਉਨ੍ਹਾਂ ਦੇ ਪਰਿਵਾਰ ਵਾਲੇ ਵਿਆਹ ਲਈ ਰਾਜ਼ੀ ਨਹੀਂ ਸਨ, ਜਿਸ ਕਾਰਨ ਉਨ੍ਹਾਂ ਨੇ ਇਹ ਖ਼ੌਫ਼ਨਾਕ ਕਦਮ ਚੁੱਕਿਆ।
