ਵੱਡੀ ਖ਼ਬਰ: ਮੋਦੀ ਸਰਕਾਰ ਨੇ ਬਦਲਿਆ ਇੱਕ ਸੂਬੇ ਦਾ ਨਾਮ
ਕੇਂਦਰ ਦਾ ਵੱਡਾ ਫੈਸਲਾ: ‘ਕੇਰਲ’ ਹੁਣ ਅਧਿਕਾਰਤ ਤੌਰ ‘ਤੇ ਬਣੇਗਾ ‘ਕੇਰਲਮ’; ਮੋਦੀ ਕੈਬਨਿਟ ਨੇ ਦਿੱਤੀ ਮਨਜ਼ੂਰੀ
ਭਾਸ਼ਾ ਅਤੇ ਸੱਭਿਆਚਾਰਕ ਵਿਰਾਸਤ ਨੂੰ ਮਿਲੇਗਾ ਮਾਣ; ਕੇਰਲ ਵਿਧਾਨ ਸਭਾ ਨੂੰ ਭੇਜਿਆ ਜਾਵੇਗਾ ਬਿੱਲ ਦਾ ਖਰੜਾ
ਨਵੀਂ ਦਿੱਲੀ 24 ਫਰਵਰੀ 2026: ਕੇਂਦਰ ਦੀ ਮੋਦੀ ਕੈਬਨਿਟ ਨੇ ਦੱਖਣੀ ਭਾਰਤੀ ਰਾਜ ‘ਕੇਰਲ’ ਦਾ ਨਾਮ ਅਧਿਕਾਰਤ ਤੌਰ ‘ਤੇ ਬਦਲ ਕੇ ‘ਕੇਰਲਮ’ ਕਰਨ ਦੇ ਪ੍ਰਸਤਾਵ ਨੂੰ ਪ੍ਰਵਾਨਗੀ ਦੇ ਦਿੱਤੀ ਹੈ। ਮੋਦੀ ਕੈਬਨਿਟ ਨੇ ‘ਸੇਵਾ ਤੀਰਥ’ ਤੋਂ ਇਹ ਪਹਿਲਾ ਇਤਿਹਾਸਕ ਫੈਸਲਾ ਲਿਆ ਹੈ।
ਕੇਂਦਰੀ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਕੈਬਨਿਟ ਦੇ ਫੈਸਲਿਆਂ ਦੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਹ ਮੰਗ ਭਾਸ਼ਾਈ ਆਧਾਰ ‘ਤੇ ਰਾਜਾਂ ਦੇ ਪੁਨਰਗਠਨ ਦੇ ਸਮੇਂ ਤੋਂ ਹੀ ਉੱਠ ਰਹੀ ਸੀ।
‘ਕੇਰਲਮ’ ਸ਼ਬਦ ਮਲਿਆਲਮ ਭਾਸ਼ਾ ਅਤੇ ਉੱਥੋਂ ਦੀ ਅਮੀਰ ਸੱਭਿਆਚਾਰਕ ਵਿਰਾਸਤ ਨਾਲ ਡੂੰਘਾਈ ਨਾਲ ਜੁੜਿਆ ਹੋਇਆ ਹੈ। ਇਹ ਫੈਸਲਾ ਅਜਿਹੇ ਸਮੇਂ ਆਇਆ ਹੈ ਜਦੋਂ ਰਾਜ ਵਿੱਚ ਵਿਧਾਨ ਸਭਾ ਚੋਣਾਂ ਵੀ ਨੇੜੇ ਹਨ। ਵੈਸ਼ਨਵ ਨੇ ਦੱਸਿਆ ਕਿ ਵਿਧਾਨ ਸਭਾ ਨੂੰ ਡਰਾਫਟ ਭੇਜਿਆ ਜਾਵੇਗਾ।
ਕੈਬਨਿਟ ਦੀ ਮਨਜ਼ੂਰੀ ਤੋਂ ਬਾਅਦ, ਹੁਣ ਨਾਮ ਬਦਲਣ ਨਾਲ ਸਬੰਧਤ ਬਿੱਲ (Bill) ਨੂੰ ਕੇਰਲ ਵਿਧਾਨ ਸਭਾ ਵਿੱਚ ਅੰਤਿਮ ਸਹਿਮਤੀ ਲਈ ਭੇਜਿਆ ਜਾਵੇਗਾ। ਕੇਰਲ ਵਿਧਾਨ ਸਭਾ ਨੇ 24 ਜੂਨ 2024 ਨੂੰ ਸਰਵਸੰਮਤੀ ਨਾਲ ਇਸ ਸਬੰਧੀ ਇੱਕ ਮਤਾ ਪਾਸ ਕਰਕੇ ਕੇਂਦਰ ਨੂੰ ਭੇਜਿਆ ਸੀ।
ਮੁੱਖ ਮੰਤਰੀ ਪਿਨਰਾਈ ਵਿਜਯਨ ਦਾ ਉਦੇਸ਼ ਹੈ ਕਿ ਸੰਵਿਧਾਨ ਦੀ ਅਠਵੀਂ ਅਨੁਸੂਚੀ ਵਿੱਚ ਦਰਜ ਸਾਰੀਆਂ ਭਾਸ਼ਾਵਾਂ ਵਿੱਚ ਰਾਜ ਦਾ ਨਾਮ ਹੁਣ ‘ਕੇਰਲਮ’ ਵਜੋਂ ਹੀ ਪਛਾਣਿਆ ਜਾਵੇ। ਇਸ ਬਦਲਾਅ ਦੀ ਮੰਗ ਨੂੰ ਕੇਵਲ ਸੱਤਾਧਾਰੀ ਧਿਰ ਨੇ ਹੀ ਨਹੀਂ, ਸਗੋਂ ਵਿਰੋਧੀ ਧਿਰ ਨੇ ਵੀ ਸਮਰਥਨ ਦਿੱਤਾ ਸੀ।
ਕੇਰਲ ਭਾਜਪਾ ਪ੍ਰਧਾਨ ਰਾਜੀਵ ਚੰਦਰਸ਼ੇਖਰ ਨੇ ਵੀ ਪ੍ਰਧਾਨ ਮੰਤਰੀ ਮੋਦੀ ਨੂੰ ਪੱਤਰ ਲਿਖ ਕੇ ‘ਕੇਰਲਮ’ ਨਾਮ ਅਪਣਾਉਣ ਦੀ ਅਪੀਲ ਕੀਤੀ ਸੀ। ਕੈਬਨਿਟ ਨੇ ਸਪੱਸ਼ਟ ਕੀਤਾ ਕਿ ‘ਸੇਵਾ ਤੀਰਥ’ ਤੋਂ ਲਏ ਗਏ ਸਾਰੇ ਫੈਸਲੇ ਦੇਸ਼ ਦੇ 140 ਕਰੋੜ ਨਾਗਰਿਕਾਂ ਦੇ ਹਿੱਤਾਂ ਨੂੰ ਮੁੱਖ ਰੱਖ ਕੇ ਲਏ ਗਏ ਹਨ। pk
