ਵੱਡੀ ਖ਼ਬਰ: 3 Tech ਮੁਲਾਜ਼ਮਾਂ ਦੀ ਦਰਦਨਾਕ ਮੌਤ
ਛੁੱਟੀਆਂ ਮਨਾਉਣ ਗਏ Tech ਮੁਲਾਜ਼ਮਾਂ ਨਾਲ ਵਾਪਰਿਆ ਦਰਦਨਾਕ ਭਾਣਾ, ਸਮੁੰਦਰ ਦੀਆਂ ਤੇਜ਼ ਲਹਿਰਾਂ ‘ਚ ਵਹਿਣ ਨਾਲ 3 ਮੌਤ
ਗੋਕਰਨ / ਬੈਂਗਲੁਰੂ 3 ਨਵੰਬਰ 2026- ਕਰਨਾਟਕ ਦੇ ਮਸ਼ਹੂਰ ਸੈਰ-ਸਪਾਟਾ ਕੇਂਦਰ ਗੋਕਰਨ ਤੋਂ ਇੱਕ ਬਹੁਤ ਹੀ ਮੰਦਭਾਗੀ ਅਤੇ ਦਰਦਨਾਕ ਖ਼ਬਰ ਸਾਹਮਣੇ ਆਈ ਹੈ। ਇੱਥੇ ਸਮੁੰਦਰ ਦੇ ਕੰਢੇ ਘੁੰਮਣ ਗਏ ਬੈਂਗਲੁਰੂ ਦੀ ਇੱਕ ਨਾਮੀ ਕੰਪਨੀ ਦੇ ਤਿੰਨ ਕਰਮਚਾਰੀਆਂ ਦੀ ਸਮੁੰਦਰ ਵਿੱਚ ਡੁੱਬਣ ਕਾਰਨ ਮੌਤ ਹੋ ਗਈ। ਐਤਵਾਰ ਨੂੰ ਸਮੁੰਦਰ ਵਿੱਚ ਅਚਾਨਕ ਉੱਠੀਆਂ ਤੇਜ਼ ਅਤੇ ਭਿਆਨਕ ਲਹਿਰਾਂ ਦੀ ਲਪੇਟ ਵਿੱਚ ਆਉਣ ਨਾਲ ਕੁੱਲ ਪੰਜ ਮੁਲਾਜ਼ਮ ਪਾਣੀ ਦੇ ਤੇਜ਼ ਵਹਾਅ ਵਿੱਚ ਵਹਿ ਗਏ ਸਨ। ਘਟਨਾ ਦੀ ਜਾਣਕਾਰੀ ਮਿਲਦੇ ਹੀ ਬਚਾਅ ਦਲ, ਲਾਈਫਗਾਰਡ ਅਤੇ ਸਥਾਨਕ ਮਛੇਰਿਆਂ ਦੀ ਮਦਦ ਨਾਲ ਤੁਰੰਤ ਬਚਾਅ ਅਭਿਆਨ ਸ਼ੁਰੂ ਕੀਤਾ ਗਿਆ।
ਹਾਲਾਂਕਿ, ਕਾਫ਼ੀ ਜੱਦੋ-ਜਹਿਦ ਦੇ ਬਾਅਦ ਵੀ ਤਿੰਨ ਨੌਜਵਾਨਾਂ ਨੂੰ ਬਚਾਇਆ ਨਹੀਂ ਜਾ ਸਕਿਆ ਅਤੇ ਬਾਅਦ ਵਿੱਚ ਉਨ੍ਹਾਂ ਦੀਆਂ ਦੇਹਾਂ ਬਰਾਮਦ ਕਰ ਲਈਆਂ ਗਈਆਂ। ਮ੍ਰਿਤਕਾਂ ਦੀ ਪਛਾਣ 22 ਸਾਲਾ ਸ਼ੋਭਾ ਦਾਸ ਦੇਵੇਂਦਰਨਾਥ, ਮੁਹੰਮਦ ਅਕਰਮ ਇਸਮਾਈਲ ਅਹਿਮਦ ਅਤੇ 24 ਸਾਲਾ ਵਿਸ਼ਵਾ ਏ.ਕੇ. ਵਜੋਂ ਹੋਈ ਹੈ। ਜਾਣਕਾਰੀ ਅਨੁਸਾਰ ਮ੍ਰਿਤਕਾਂ ਵਿੱਚ ਸ਼ਾਮਲ ਸ਼ੋਭਾ ਦਾਸ ਮੂਲ ਰੂਪ ਵਿੱਚ ਝਾਰਖੰਡ ਦੀ ਰਹਿਣ ਵਾਲੀ ਸੀ। ਇਹ ਤਿੰਨੋਂ ਨੌਜਵਾਨ ਬੈਂਗਲੁਰੂ ਦੇ ਬੇਲੰਦੂਰ ਇਲਾਕੇ ਵਿੱਚ ਸਥਿਤ ‘ਅਲੋਰੀਕਾ ਈਕੋਪੇਸ’ (Alorica Ecospace) ਨਾਮਕ ਕੰਪਨੀ ਵਿੱਚ ਕੰਮ ਕਰਦੇ ਸਨ।
ਪ੍ਰਾਪਤ ਜਾਣਕਾਰੀ ਅਨੁਸਾਰ, ਕੰਪਨੀ ਦੇ 16 ਕਰਮਚਾਰੀਆਂ ਦੀ ਇੱਕ ਟੀਮ ਸ਼ਨੀਵਾਰ ਸ਼ਾਮ ਨੂੰ ਛੁੱਟੀਆਂ ਮਨਾਉਣ ਅਤੇ ਘੁੰਮਣ-ਫਿਰਨ ਲਈ ਗੋਕਰਨ ਪਹੁੰਚੀ ਸੀ। ਇਹ ਸਾਰੇ ਕਰਮਚਾਰੀ ਸਮੁੰਦਰ ਦੇ ਕੰਢੇ ਨੇੜੇ ਹੀ ਸਥਿਤ ਇੱਕ ਨਿੱਜੀ ਰਿਜ਼ੌਰਟ ਵਿੱਚ ਠਹਿਰੇ ਹੋਏ ਸਨ। ਐਤਵਾਰ ਨੂੰ ਟੀਮ ਦੇ ਪੰਜ ਮੈਂਬਰ ਡੁੱਬਣਸ਼ਸ਼ੀ ਬੀਚ ‘ਤੇ ਸਮੁੰਦਰ ਦੀਆਂ ਲਹਿਰਾਂ ਦਾ ਆਨੰਦ ਲੈਂਦੇ ਹੋਏ ਪਾਣੀ ਵਿੱਚ ਉਤਰ ਗਏ। ਇਸੇ ਦੌਰਾਨ ਅਚਾਨਕ ਸਮੁੰਦਰ ਵਿੱਚ ਬਹੁਤ ਤੇਜ਼ ਲਹਿਰਾਂ ਉੱਠੀਆਂ, ਜਿਨ੍ਹਾਂ ਨੇ ਪੰਜਾਂ ਨੌਜਵਾਨਾਂ ਨੂੰ ਸੰਭਲਣ ਦਾ ਮੌਕਾ ਤੱਕ ਨਹੀਂ ਦਿੱਤਾ ਅਤੇ ਉਹ ਕੰਢੇ ਤੋਂ ਦੂਰ ਡੂੰਘੇ ਪਾਣੀ ਵਿੱਚ ਵਹਿ ਗਏ।
ਪਾਣੀ ਦੇ ਤੇਜ਼ ਵਹਾਅ ਅਤੇ ਚੜ੍ਹਦੀਆਂ ਲਹਿਰਾਂ ਵਿਚਕਾਰ ਇਹ ਕਰਮਚਾਰੀ ਖ਼ੁਦ ਨੂੰ ਸੰਭਾਲਣ ਅਤੇ ਕੰਢੇ ਤੱਕ ਪਹੁੰਚਣ ਲਈ ਲਗਾਤਾਰ ਜੱਦੋ-ਜਹਿਦ ਕਰਦੇ ਰਹੇ। ਘਟਨਾ ਦੀ ਇਤਲਾਹ ਮਿਲਦਿਆਂ ਹੀ ਬਚਾਅ ਕਾਰਜ ਸ਼ੁਰੂ ਕੀਤੇ ਗਏ, ਜਿਸ ਵਿੱਚ ਸਥਾਨਕ ਲਾਈਫਗਾਰਡਾਂ ਦੇ ਨਾਲ-ਨਾਲ ਸਥਾਨਕ ਮਛੇਰਿਆਂ ਨੇ ਵੀ ਪੂਰੀ ਬਹਾਦਰੀ ਨਾਲ ਹਿੱਸਾ ਲਿਆ।
ਭਾਰੀ ਮਸ਼ੱਕਤ ਤੋਂ ਬਾਅਦ ਪੰਜਾਂ ਵਿੱਚੋਂ ਦੋ ਕਰਮਚਾਰੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ। ਬਚਾਏ ਗਏ ਨੌਜਵਾਨਾਂ ਦੀ ਪਛਾਣ ਨਿਸ਼ਾਂਤ ਡੀ.ਵੀ. ਅਤੇ ਮੁਹੰਮਦ ਕਾਸਿਮ ਵਜੋਂ ਹੋਈ ਹੈ। ਦੋਵਾਂ ਨੂੰ ਤੁਰੰਤ ਮੁੱਢਲੀ ਡਾਕਟਰੀ ਸਹਾਇਤਾ ਲਈ ਗੋਕਰਨ ਦੇ ਸਰਕਾਰੀ ਪ੍ਰਾਇਮਰੀ ਹੈਲਥ ਸੈਂਟਰ (ਹਸਪਤਾਲ) ਵਿਖੇ ਭਰਤੀ ਕਰਵਾਇਆ ਗਿਆ, ਜਿੱਥੇ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਹੈ।
ਇਸ ਦਰਦਨਾਕ ਹਾਦਸੇ ਤੋਂ ਬਾਅਦ ਨਾਲ ਆਏ ਬਾਕੀ ਕਰਮਚਾਰੀਆਂ ਅਤੇ ਮ੍ਰਿਤਕਾਂ ਦੇ ਪਰਿਵਾਰਾਂ ਵਿੱਚ ਗਮ ਦਾ ਮਾਹੌਲ ਛਾ ਗਿਆ ਹੈ। ਮਨੋਰੰਜਨ ਅਤੇ ਮੌਜ-ਮਸਤੀ ਲਈ ਸ਼ੁਰੂ ਹੋਇਆ ਇਹ ਖ਼ੁਸ਼ਨੁਮਾ ਸਫ਼ਰ ਪਲਕ ਝਪਕਦਿਆਂ ਹੀ ਇੱਕ ਕਦੇ ਨਾ ਭੁੱਲਣ ਵਾਲੇ ਦੁਖਾਂਤ ਵਿੱਚ ਤਬਦੀਲ ਹੋ ਗਿਆ। ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਅੱਗੇ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
