ਕਲਯੁਗੀ ਪਿਤਾ ਨੇ ਬੇਰਹਿਮੀ ਨਾਲ ਕੀਤਾ ਜੌੜੀਆਂ ਧੀਆਂ ਦਾ ਕਤਲ, CCTV ‘ਚ ਕੈਦ ਹੋਈ ਦਿਲ ਕੰਬਾਊ ਵਾਰਦਾਤ
ਕਾਨਪੁਰ (UP), 20 ਅਪ੍ਰੈਲ 2026
ਉੱਤਰ ਪ੍ਰਦੇਸ਼ ਦੇ ਕਾਨਪੁਰ ਦੇ ਕਿਦਵਈ ਨਗਰ ਇਲਾਕੇ ਵਿੱਚ ਇੱਕ ਪਿਤਾ ਵੱਲੋਂ ਆਪਣੀਆਂ ਹੀ ਦੋ ਮਾਸੂਮ ਜੌੜੀਆਂ ਧੀਆਂ ਦਾ ਬੇਰਹਿਮੀ ਨਾਲ ਕਤਲ ਕਰਨ ਦਾ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ।
ਮੁਲਜ਼ਮ ਪਿਤਾ ਸ਼ਸ਼ੀਰੰਜਨ ਮਿਸ਼ਰਾ ਨੇ ਇਸ ਘਿਨਾਉਣੀ ਵਾਰਦਾਤ ਨੂੰ ਬੜੀ ਸੋਚੀ-ਸਮਝੀ ਸਾਜ਼ਿਸ਼ ਤਹਿਤ ਅੰਜਾਮ ਦਿੱਤਾ, ਜਿਸ ਦੀ ਸਾਰੀ ਫੁਟੇਜ ਘਰ ਵਿੱਚ ਲੱਗੇ ਸੀਸੀਟੀਵੀ (CCTV) ਕੈਮਰਿਆਂ ਵਿੱਚ ਕੈਦ ਹੋ ਗਈ ਹੈ।
ਸ਼ਨੀਵਾਰ ਰਾਤ ਕਰੀਬ 11 ਵਜੇ ਸਾਰਾ ਪਰਿਵਾਰ ਇਕੱਠੇ ਖਾਣਾ ਖਾਣ ਤੋਂ ਬਾਅਦ ਟੀਵੀ ਦੇਖ ਰਿਹਾ ਸੀ। ਜਦੋਂ ਪਿਤਾ ਨੇ ਟੀਵੀ ਬੰਦ ਕਰਨ ਲਈ ਕਿਹਾ ਤਾਂ ਧੀਆਂ ਨੇ ਕਾਰਟੂਨ ਦੇਖਣ ਦੀ ਜ਼ਿੱਦ ਕੀਤੀ। ਇਸ ਗੱਲ ‘ਤੇ ਸ਼ਸ਼ੀਰੰਜਨ ਗੁੱਸੇ ਵਿੱਚ ਆ ਗਿਆ ਅਤੇ ਪਰਿਵਾਰ ਨੂੰ ਕੁੱਟਣ ਦੀ ਧਮਕੀ ਦਿੱਤੀ।
ਡਰ ਦੇ ਮਾਰੇ ਪਤਨੀ ਰੇਸ਼ਮਾ ਆਪਣੇ ਬੇਟੇ ਰੁਦਰਵ ਨੂੰ ਲੈ ਕੇ ਦੂਜੇ ਕਮਰੇ ਵਿੱਚ ਚਲੀ ਗਈ, ਜਦੋਂ ਕਿ ਦੋਵੇਂ ਧੀਆਂ ਰਿੱਧੀ ਅਤੇ ਸਿੱਧੀ ਆਪਣੇ ਪਿਤਾ ਦੇ ਕਮਰੇ ਵਿੱਚ ਸੌਣ ਚਲੀਆਂ ਗਈਆਂ।
ਪੁਲਿਸ ਪੁੱਛਗਿੱਛ ਵਿੱਚ ਖੁਲਾਸਾ ਹੋਇਆ ਹੈ ਕਿ ਇਹ ਕਤਲ ਕੋਈ ਅਚਾਨਕ ਹੋਇਆ ਗੁੱਸਾ ਨਹੀਂ ਸੀ, ਸਗੋਂ ਮੁਲਜ਼ਮ ਕਈ ਦਿਨਾਂ ਤੋਂ ਇਸ ਦੀ ਸਾਜ਼ਿਸ਼ ਰਚ ਰਿਹਾ ਸੀ।
ਉਸ ਨੇ 5 ਦਿਨ ਪਹਿਲਾਂ ਹੀ ਮੂਲਗੰਜ ਬਾਜ਼ਾਰ ਤੋਂ 500 ਰੁਪਏ ਵਿੱਚ ਇੱਕ ਤੇਜ਼ਧਾਰ ‘ਚਾਪੜ’ ਖਰੀਦਿਆ ਸੀ ਅਤੇ ਉਸ ਨੂੰ ਆਪਣੇ ਬੈਗ ਵਿੱਚ ਛੁਪਾ ਕੇ ਅਲਮਾਰੀ ਵਿੱਚ ਰੱਖ ਦਿੱਤਾ ਸੀ।
ਰਾਤ 1:50 ਵਜੇ ਤੋਂ 3:35 ਵਜੇ ਦੇ ਵਿਚਕਾਰ ਮੁਲਜ਼ਮ ਨੇ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਉਸ ਨੇ ਪਹਿਲਾਂ ‘ਸਿੱਧੀ’ ਦਾ ਗਲਾ ਘੁੱਟਿਆ ਅਤੇ ਫਿਰ ਚਾਪੜ ਤੇ ਹਥੌੜੇ ਨਾਲ ਉਸ ਦਾ ਕਤਲ ਕਰ ਦਿੱਤਾ। ਉਸ ਨੂੰ ਡਰ ਸੀ ਕਿ ਜੇਕਰ ਉਹ ਦੂਜੀ ਬੇਟੀ ਨੂੰ ਪਹਿਲਾਂ ਮਾਰਦਾ ਤਾਂ ਸਿੱਧੀ ਰੌਲਾ ਪਾ ਕੇ ਆਪਣੀ ਮਾਂ ਨੂੰ ਜਗਾ ਸਕਦੀ ਸੀ।
ਇਸ ਤੋਂ ਬਾਅਦ ਜਦੋਂ ‘ਰਿੱਧੀ’ ਵਾਸ਼ਰੂਮ ਜਾਣ ਲਈ ਉੱਠੀ, ਤਾਂ ਮੁਲਜ਼ਮ ਉਸ ਨੂੰ ਵਾਪਸ ਲਿਆ ਕੇ ਸੁਆਉਣ ਤੋਂ ਬਾਅਦ ਉਸ ਦਾ ਵੀ ਕਤਲ ਕਰ ਦਿੱਤਾ।
ਪਤਨੀ ‘ਤੇ ਪਹਿਲਾਂ ਵੀ ਕਰ ਚੁੱਕਾ ਸੀ ਹਮਲਾ
ਪਤਨੀ ਰੇਸ਼ਮਾ ਨੇ ਦੱਸਿਆ ਕਿ ਸ਼ਸ਼ੀਰੰਜਨ ਨਸ਼ੇ ਦਾ ਆਦੀ ਹੈ ਅਤੇ ਬਹੁਤ ਗੁੱਸੇਖ਼ੋਰ ਹੈ। ਦੋ ਸਾਲ ਪਹਿਲਾਂ ਵੀ ਉਹ ਰੇਸ਼ਮਾ ‘ਤੇ ਚਾਕੂ ਨਾਲ ਦੋ ਵਾਰ ਜਾਨਲੇਵਾ ਹਮਲਾ ਕਰ ਚੁੱਕਾ ਸੀ।
ਪਤਨੀ ਨੇ ਦੱਸਿਆ ਕਿ ਦੋਵਾਂ ਦੇ ਸਬੰਧ ਠੀਕ ਨਹੀਂ ਸਨ ਅਤੇ ਉਹ ਕਈ ਸਾਲਾਂ ਤੋਂ ਵੱਖ-ਵੱਖ ਕਮਰਿਆਂ ਵਿੱਚ ਸੌਂਦੇ ਸਨ। ਧੀਆਂ ਆਪਣੇ ਪਿਤਾ ਨਾਲ ਜ਼ਿਆਦਾ ਲਗਾਵ ਹੋਣ ਕਾਰਨ ਉਸੇ ਕੋਲ ਸੌਂਦੀਆਂ ਸਨ, ਜਿਨ੍ਹਾਂ ਨੂੰ ਉਸ ਨੇ ਮੌਤ ਦੇ ਘਾਟ ਉਤਾਰ ਦਿੱਤਾ।
ਦੱਖਣੀ ਕਾਨਪੁਰ ਦੇ ਡੀਸੀਪੀ ਦੀਪੇਂਦਰ ਨਾਥ ਚੌਧਰੀ ਨੇ ਦੱਸਿਆ ਕਿ ਮੁਲਜ਼ਮ ਪਿਤਾ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਕਤਲ ਵਿੱਚ ਵਰਤਿਆ ਗਿਆ ਚਾਪੜ ਤੇ ਹਥੌੜਾ ਵੀ ਬਰਾਮਦ ਕਰ ਲਿਆ ਗਿਆ ਹੈ।
ਪੁਲਿਸ ਅਨੁਸਾਰ ਮੁਲਜ਼ਮ ਨੇ ਆਪਣਾ ਜੁਰਮ ਕਬੂਲ ਕਰ ਲਿਆ ਹੈ, ਪਰ ਅਜੇ ਤੱਕ ਕਤਲ ਦੀ ਅਸਲ ਵਜ੍ਹਾ ਸਪੱਸ਼ਟ ਨਹੀਂ ਕੀਤੀ ਹੈ।
