ਗ਼ਦਰ ਪਾਰਟੀ ਦਾ 113ਵਾਂ ਸਥਾਪਨਾ ਦਿਵਸ ਮਨਾਇਆ
Daljeet Kaur
ਸੰਗਰੂਰ, 21 ਅਪ੍ਰੈਲ 2026- ਇਨਕਲਾਬੀ ਵਿਰਾਸਤ ਪ੍ਰਚਾਰ ਮੰਚ ਪੰਜਾਬ ਵੱਲੋਂ ਅੱਜ ਸਥਾਨਕ ਤੇਜਾ ਸਿੰਘ ਸੁਤੰਤਰ ਭਵਨ ਵਿਖੇ ਗ਼ਦਰ ਪਾਰਟੀ ਦਾ 113ਵਾਂ ਸਥਾਪਨਾ ਦਿਵਸ ਮਨਾਇਆ ਗਿਆ। ਇਸ ਮੌਕੇ ਮੰਚ ਦੇ ਸੂਬਾ ਪ੍ਰਧਾਨ ਬਲਬੀਰ ਲੌਂਗੋਵਾਲ ਵੱਲੋਂ ਪਰਚਾ ਪੜ੍ਹਿਆ ਗਿਆ ਜਿਸ ਵਿੱਚ ਗ਼ਦਰ ਪਾਰਟੀ ਦੇ ਹੋਂਦ ਵਿੱਚ ਆਉਣ ਲਈ ਜ਼ਿੰਮੇਵਾਰ ਉਸ ਸਮੇਂ ਦੇ ਪਦਾਰਥਕ ਹਾਲਤਾਂ ‘ਤੇ ਚਾਨਣਾ ਪਾਇਆ ਗਿਆ।
ਪਾਰਟੀ ਦੇ ਉਹਨਾਂ ਮੁੱਢਲੇ ਮੈਂਬਰਾਂ ਜਿਵੇਂ ਕਰਤਾਰ ਸਿੰਘ ਸਰਾਭਾ,ਬਾਬਾ ਸੋਹਣ ਸਿੰਘ ਭਕਨਾ,ਲਾਲਾ ਹਰਦਿਆਲ ਆਦਿ ਬਾਰੇ ਦੱਸਿਆ ਜਿਹਨਾਂ ਨੇ ਅੰਗਰੇਜ਼ਾਂ ਦੀ ਗੁਲਾਮੀ ਦੇ ਸਤਾਏ ਭਾਰਤੀ ਲੋਕਾਂ ਦੇ ਹਾਲਾਤ ਅਤੇ ਵਿਦੇਸ਼ਾਂ ਜਿਵੇਂ ਅਮਰੀਕਾ, ਕੈਨੇਡਾ,ਫਿਲਪਾਈਨ,ਮਨੀਲਾ ਆਦਿ ਵਿੱਚ ਵੀ ਭਾਰਤੀ ਲੋਕਾਂ ਦੀ ਅਪਮਾਨਜਨਕ ਹਾਲਤ ਤੋਂ ਤੰਗ ਆ ਕੇ ਭਾਰਤੀ ਲੋਕਾਂ ਨੂੰ ਇਸ ਨਰਕ ਭਰੀ ਜ਼ਿੰਦਗੀ ਤੋਂ ਹਥਿਆਰਬੰਦ ਬਗਾਵਤ ਰਾਹੀਂ ਅਜ਼ਾਦ ਕਰਵਾਉਣ ਦੇ ਮਕਸਦ ਨਾਲ ਅਮਰੀਕਾ ਵਿਖੇ ਗ਼ਦਰ ਪਾਰਟੀ ਦੀ ਸਥਾਪਨਾ ਕੀਤੀ।
ਪਰਚੇ ਵਿੱਚ ਚਾਨਣਾ ਪਾਇਆ ਗਿਆ ਕਿ ਇਹ ਪਾਰਟੀ ਇੱਕ ਧਰਮ ਨਿਰਪੱਖ ਪਾਰਟੀ ਸੀ ਅਤੇ ਸਾਰੇ ਧਰਮਾਂ ਅਤੇ ਜਾਤਾਂ ਦੇ ਲੋਕਾਂ ਨੇ ਇਸ ਲਹਿਰ ਤਹਿਤ ਫਾਂਸੀ ਦੇ ਰੱਸਿਆਂ ਨੂੰ ਚੁੰਮਿਆ ਅਤੇ ਉਮਰ ਕੈਦਾਂ ਕੱਟੀਆਂ ਅਤੇ ਕਾਲੇਪਾਣੀ ਦੀਆਂ ਸਜ਼ਾਵਾਂ ਕੱਟੀਆਂ। ਪਰਚੇ ਵਿੱਚ ਅੱਜ ਦੇ ਸਮੇਂ ਵਿੱਚ ਗ਼ਦਰ ਪਾਰਟੀ ਦੀ ਵਿਚਾਰਧਾਰਾ ਦੀ ਸਾਰਥਿਕਤਾ ‘ਤੇ ਵੀ ਚਾਨਣਾ ਪਾਇਆ ਗਿਆ।
ਇਸ ਤੋਂ ਬਾਅਦ ਮੰਚ ਦੇ ਸੂਬਾ ਜਨਰਲ ਸਕੱਤਰ ਰਾਕੇਸ਼ ਕੁਮਾਰ ਇਤਿਹਾਸਕਾਰ ਸੁਨਾਮ ਨੇ ਗ਼ਦਰ ਪਾਰਟੀ ਦੁਆਰਾ ਛਾਪੇ ਗਏ ਇਤਿਹਾਸ ‘ਤੇ ਚਾਨਣਾ ਪਾਉਂਦੇ ਹੋਏ ਗ਼ਦਰ ਅਖ਼ਬਾਰ ਦੀ ਛਪਾਈ, ਇਸ ਵਿੱਚ ਛਪੀਆਂ ਕੁਝ ਮਹੱਤਵਪੂਰਨ ਰਚਨਾਵਾਂ ਬਾਰੇ ਸਰੋਤਿਆਂ ਨੂੰ ਜਾਣੂ ਕਰਵਾਇਆ ਅਤੇ ਦੱਸਿਆ ਕਿ ਕਿਵੇਂ ਇਸ ਅਖ਼ਬਾਰ ਵਿੱਚ ਆਮ ਲੋਕਾਂ ਦੀ ਭਾਸ਼ਾ ਵਿੱਚ ਛਪੀਆਂ ਕਵਿਤਾਵਾਂ,ਲੇਖਾਂ ਨੇ ਭਾਰਤ ਦੇ ਲੋਕਾਂ ਵਿੱਚ ਗ਼ੁਲਾਮੀ ਵਿਰੁੱਧ ਚੇਤਨਾ ਦਾ ਵਿਕਾਸ ਕੀਤਾ ਅਤੇ ਉਹਨਾਂ ਵਿੱਚ ਦੇਸ਼ ਦੀ ਅਜ਼ਾਦੀ ਲਈ ਕੁਰਬਾਨੀ ਦਾ ਜਜ਼ਬਾ ਭਰਿਆ। ਕੁਝ ਮਹੱਤਵਪੂਰਨ ਕਵਿਤਾਵਾਂ ਨੂੰ ਸਟੇਜ ਤੋਂ ਸੁਣਾਇਆ ਵੀ ਗਿਆ। ਗ਼ਦਰੀਆਂ ਦੁਆਰਾ ਛਾਪੇ ਗਏ ਪਰਚਿਆਂ ਬਾਰੇ ਵੀ ਦੱਸਿਆ ਗਿਆ। ਅੰਗਰੇਜ਼ਾਂ ਦੁਆਰਾ ਗ਼ਦਰ ਪਾਰਟੀ ਦੇ ਸਾਹਿਤ ਦੀ ਸੈਂਸਰਸ਼ਿਪ ਬਾਰੇ ਅਤੇ ਉਪਰੰਤ ਗ਼ਦਰੀਆਂ ਦੁਆਰਾ ਭਾਰਤ ਵਿੱਚ ਛਾਪਾਖਾਨਾ ਸਥਾਪਿਤ ਕਰਕੇ ਐਲਾਨ-ਏ-ਜੰਗ, ਗ਼ਦਰ ਸੰਦੇਸ਼,ਤਿਲਕ, ਰਿਕਾਬ ਗੰਜ ਆਦਿ ਪਰਚੇ ਛਾਪੇ।
ਇਸ ਪਰਚੇ ਵਿੱਚ ਗ਼ਦਰੀਆਂ ਦੁਆਰਾ ਭਾਰਤ ਵਿੱਚ ਆ ਕੇ ਕੀਤੇ ਗਏ ਇਨਕਲਾਬੀ ਕਾਰਨਾਮਿਆਂ ‘ਤੇ ਅਤੇ ਉਹਨਾਂ ਦੁਆਰਾ ਭਾਰਤੀ ਫੌਜ ਨੂੰ ਗ਼ਦਰ ਲਈ ਤਿਆਰ ਕਰਨ ਬਾਰੇ ਵੀ ਚਾਨਣਾ ਪਾਇਆ। ਗ਼ਦਰੀਆਂ ਨੇ ਕਈ ਵਾਰ ਬਗਾਵਤ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਿਹਨਾਂ ਕਈ ਕੋਸ਼ਿਸ਼ਾਂ ਮੁਖ਼ਬਰਾਂ ਕਾਰਨ ਅਸਫਲ ਹੋ ਗਈਆਂ ਅਤੇ ਇਸ ਉਪਰੰਤ ਗ਼ਦਰੀਆਂ ਨੂੰ ਅੰਗਰੇਜ਼ਾਂ ਦੁਆਰਾ ਸਖ਼ਤ ਸਜ਼ਾਵਾਂ ਦਿੱਤੀਆਂ ਗਈਆਂ। ਬੁਲਾਰੇ ਦੁਆਰਾ ਦੱਸਿਆ ਗਿਆ ਕਿ ਜਿੰਨੀ ਵੱਡੀ ਗ਼ਦਰ ਪਾਰਟੀ ਦੀ ਲਹਿਰ ਸੀ, ਉਸ ਹਿਸਾਬ ਨਾਲ ਇਸ ਲਹਿਰ ਬਾਰੇ ਬਹੁਤ ਥੋੜ੍ਹਾ ਖੋਜੀ ਕੰਮ ਹੋਇਆ ਹੈ ਅਤੇ ਮੰਚ ਆਪਣੇ ਵਿਤ ਅਨੁਸਾਰ ਇਹ ਕੰਮ ਅੱਗੇ ਵਧਾਵੇਗਾ।
ਇਸ ਤੋਂ ਬਾਅਦ ਮੰਚ ਦੇ ਸੂਬਾ ਪ੍ਰੈੱਸ ਸਕੱਤਰ ਦੁਆਰਾ ਸਟੇਜ ਤੋਂ ਕੁਝ ਲੋਕ ਪੱਖੀ ਮਤੇ ਪੜ੍ਹੇ ਗਏ ਜਿਹਨਾਂ ਨੂੰ ਸਰੋਤਿਆਂ ਦੁਆਰਾ ਸਰਵ ਸੰਮਤੀ ਨਾਲ ਪਾਸ ਕੀਤਾ ਗਿਆ।
ਇਸ ਪ੍ਰੋਗਰਾਮ ਵਿੱਚ ਮੰਚ ਤੋਂ ਇਲਾਵਾ ਜ਼ਮਹੂਰੀ ਅਧਿਕਾਰ ਸਭਾ ਪੰਜਾਬ, ਬੀ.ਕੇ.ਯੂ. ਉਗਰਾਹਾਂ, ਕ੍ਰਾਂਤੀਕਾਰੀ ਪੇਂਡੂ ਮਜ਼ਦੂਰ ਯੂਨੀਅਨ ਪੰਜਾਬ, ਡੈਮੋਕ੍ਰੈਟਿਕ ਟੀਚਰਜ਼ ਫਰੰਟ ਪੰਜਾਬ, ਤਰਕਸ਼ੀਲ ਸੁਸਾਇਟੀ ਪੰਜਾਬ,ਦੇਸ਼ ਭਗਤ ਯਾਦਗਾਰ ਲੌਂਗੋਵਾਲ, ਪੰਜਾਬ ਸਟੂਡੈਂਟਸ ਯੂਨੀਅਨ,ਡੈਮੋਕ੍ਰੈਟਿਕ ਸਟੂਡੈਂਟਸ ਆਰਗੇਨਾਈਜੇਸ਼ਨ,ਅਦਾਰਾ ਤਰਕਸ਼,ਗੌਰਮਿੰਟ ਟੀਚਰਜ਼ ਯੂਨੀਅਨ ਦੇ ਆਗੂਆਂ ਅਤੇ ਕਾਰਕੁਨਾਂ ਤੋਂ ਇਲਾਵਾ ਵੱਡੀ ਗਿਣਤੀ ਵਿੱਚ ਆਮ ਲੋਕਾਂ ਨੇ ਭਾਗ ਲਿਆ। ਚਿੰਤਨ ਪ੍ਰਕਾਸ਼ਨ ਲੁਧਿਆਣਾ ਵੱਲੋਂ ਅਗਾਂਹਵਧੂ ਸਾਹਿਤ ਦੀ ਸਟਾਲ ਵੀ ਲਾਈ ਗਈ।
