Mohali: ਪੁਲਿਸ ਥਾਣੇ ਅੱਗੇ ਖ਼ੁਦ ਨੂੰ ਅੱਗ ਲਾਉਣ ਵਾਲੀ ਮੁਟਿਆਰ ਦੀ ਮੌਤ
70 ਫੀਸਦੀ ਝੁਲਸੀ ਪੀੜਤ ਨੇ PGI ਵਿੱਚ ਤੋੜਿਆ ਦਮ; ਪਰਿਵਾਰ ਦਾ ਆਰੋਪ- ਜਦੋਂ ਬੇਟੀ ਅੱਗ ਲਗਾ ਰਹੀ ਸੀ, ਪੁਲਿਸ ਵਾਲੇ ਵੀਡੀਓ ਬਣਾ ਰਹੇ ਸਨ
ਚੌਕੀ ਇੰਚਾਰਜ ਸਣੇ ਦੋ ਲਾਈਨ ਹਾਜ਼ਰ, ਮੁੱਖ ਮੁਲਜ਼ਮ ਸ਼ੋਏਬ ਗ੍ਰਿਫ਼ਤਾਰ
Mohali/ਜ਼ੀਰਕਪੁਰ, 10 ਮਈ 2026:
ਬਲਟਾਣਾ (Mohali) ਪੁਲਿਸ ਚੌਕੀ ਦੇ ਬਾਹਰ ਖ਼ੁਦ ਨੂੰ ਅੱਗ ਲਾਉਣ ਵਾਲੀ ਮੁਟਿਆਰ ਆਖ਼ਰਕਾਰ ਜ਼ਿੰਦਗੀ ਦੀ ਜੰਗ ਹਾਰ ਗਈ ਹੈ। ਕਰੀਬ 70 ਫੀਸਦੀ ਤੱਕ ਝੁਲਸੀ ਪੀੜਤਾ ਨੇ ਸ਼ੁੱਕਰਵਾਰ ਦੇਰ ਰਾਤ ਪੀ.ਜੀ.ਆਈ. (PGI) ਚੰਡੀਗੜ੍ਹ ਵਿਖੇ ਦਮ ਤੋੜ ਦਿੱਤਾ।
ਪਿਛਲੇ 12 ਦਿਨਾਂ ਤੋਂ ਉਹ ਜ਼ੇਰੇ ਇਲਾਜ ਸੀ, ਪਰ ਇਨਫੈਕਸ਼ਨ ਵਧਣ ਅਤੇ ਸਾਹ ਲੈਣ ਵਿੱਚ ਦਿੱਕਤ ਕਾਰਨ ਉਸ ਦੀ ਹਾਲਤ ਵਿਗੜਦੀ ਚਲੀ ਗਈ।
ਸ਼ਨੀਵਾਰ ਨੂੰ ਪੋਸਟਮਾਰਟਮ ਤੋਂ ਬਾਅਦ ਪੁਲਿਸ ਦੀ ਮੌਜੂਦਗੀ ਵਿੱਚ ਮਨੀਮਾਜਰਾ ਦੇ ਸ਼ਮਸ਼ਾਨਘਾਟ ਵਿੱਚ ਉਸ ਦਾ ਅੰਤਿਮ ਸਸਕਾਰ ਕਰ ਦਿੱਤਾ ਗਿਆ।
ਮ੍ਰਿਤਕਾ ਦੀ ਮਾਂ ਨੇ ਦੋਸ਼ ਲਾਇਆ ਕਿ ਜੇਕਰ ਪੁਲਿਸ ਸਮੇਂ ਸਿਰ ਕਾਰਵਾਈ ਕਰਦੀ ਤਾਂ ਉਨ੍ਹਾਂ ਦੀ ਧੀ ਅੱਜ ਜ਼ਿੰਦਾ ਹੁੰਦੀ। ਪਰਿਵਾਰ ਅਨੁਸਾਰ ਮੁਲਜ਼ਮ ਨੌਜਵਾਨ ਲੰਬੇ ਸਮੇਂ ਤੋਂ ਮੁਟਿਆਰ ਦਾ ਸੋਸ਼ਣ ਕਰ ਰਿਹਾ ਸੀ।
ਭੈਣ ਨੇ ਦੱਸਿਆ ਕਿ ਮੁਟਿਆਰ ਨੇ ਮੁਲਜ਼ਮ ਨੂੰ ਪੰਜ ਲੱਖ ਰੁਪਏ ਦਾ ਲੋਨ ਦਿਵਾਇਆ ਸੀ ਅਤੇ ਕਰੀਬ ਚਾਰ ਲੱਖ ਰੁਪਏ ਦੇ ਸੋਨੇ ਦੇ ਗਹਿਣੇ ਵੀ ਦਿੱਤੇ ਸਨ।
ਮਾਂ ਨੇ ਸਭ ਤੋਂ ਖ਼ੌਫ਼ਨਾਕ ਇਲਜ਼ਾਮ ਲਾਉਂਦਿਆਂ ਕਿਹਾ ਕਿ ਜਦੋਂ ਉਨ੍ਹਾਂ ਦੀ ਧੀ ਚੌਕੀ ਅੰਦਰ ਪੈਟਰੋਲ ਪਾ ਰਹੀ ਸੀ, ਤਾਂ ਉੱਥੇ ਮੌਜੂਦ ਕੁਝ ਪੁਲਿਸ ਮੁਲਾਜ਼ਮ ਉਸ ਨੂੰ ਬਚਾਉਣ ਦੀ ਬਜਾਏ ਮੋਬਾਈਲ ਫ਼ੋਨਾਂ ਨਾਲ ਵੀਡੀਓ ਬਣਾ ਰਹੇ ਸਨ।
ਪੀੜਤਾ ਦੀ ਵੱਡੀ ਭੈਣ ਨੇ ਦੋਸ਼ ਲਾਇਆ ਕਿ ਚੰਡੀ-ਮੰਦਿਰ ਥਾਣੇ ਵਿੱਚ ਵੀ ਉਨ੍ਹਾਂ ਦੀ ਸੁਣਵਾਈ ਨਹੀਂ ਹੋਈ। ਪਰਿਵਾਰ ਨੇ ਇੱਕ ਐਸ.ਆਈ. (SI) ‘ਤੇ ਮੁਲਜ਼ਮ ਨੂੰ ਬਚਾਉਣ ਬਦਲੇ 40 ਹਜ਼ਾਰ ਰੁਪਏ ਲੈਣ ਦਾ ਦੋਸ਼ ਵੀ ਲਾਇਆ।
ਉਨ੍ਹਾਂ ਕਿਹਾ ਕਿ ਬਾਅਦ ਵਿੱਚ ਉਨ੍ਹਾਂ ਨੂੰ ਬਲਟਾਣਾ ਚੌਕੀ ਭੇਜ ਦਿੱਤਾ ਗਿਆ, ਜਿੱਥੇ ਮੁਟਿਆਰ ਨਾਲ ਅਸ਼ਲੀਲ ਸਵਾਲ ਪੁੱਛੇ ਗਏ ਅਤੇ ਮਾੜਾ ਸਲੂਕ ਕੀਤਾ ਗਿਆ।
ਮਾਮਲੇ ਦੇ ਤੂਲ ਫੜਨ ਤੋਂ ਬਾਅਦ ਪੰਜਾਬ ਰਾਜ ਅਤੇ ਚੰਡੀਗੜ੍ਹ ਮਨੁੱਖੀ ਅਧਿਕਾਰ ਕਮਿਸ਼ਨ ਨੇ ਇਸ ਦਾ ਖ਼ੁਦ ਨੋਟਿਸ ਲੈਂਦਿਆਂ ਮੋਹਾਲੀ ਦੇ ਡੀ.ਸੀ. ਅਤੇ ਐਸ.ਐਸ.ਪੀ. ਤੋਂ ਰਿਪੋਰਟ ਤਲਬ ਕੀਤੀ ਹੈ।
ਐਸ.ਐਸ.ਪੀ. ਹਰਮਨ ਹੰਸ ਨੇ ਤੁਰੰਤ ਕਾਰਵਾਈ ਕਰਦਿਆਂ ਬਲਟਾਣਾ ਚੌਕੀ ਇੰਚਾਰਜ ਗੁਰਪ੍ਰੀਤ ਸਿੰਘ ਅਤੇ ਜਾਂਚ ਅਧਿਕਾਰੀ ਨੂੰ ਲਾਈਨ ਹਾਜ਼ਰ ਕਰ ਦਿੱਤਾ ਹੈ।
ਐਸ.ਪੀ. ਰੂਰਲ ਮਨਪ੍ਰੀਤ ਸਿੰਘ ਨੇ ਦੱਸਿਆ ਕਿ ਮੁੱਖ ਮੁਲਜ਼ਮ ਸ਼ੋਏਬ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਉਸ ਵਿਰੁੱਧ ਖ਼ੁਦਕੁਸ਼ੀ ਲਈ ਉਕਸਾਉਣ ਸਣੇ ਹੋਰ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।
