ਵੱਡੀ ਖ਼ਬਰ: ਕੇਂਦਰੀ ਵਿਦਿਆਲਾ ਦੇ ਡਿਪਟੀ ਪ੍ਰਿੰਸੀਪਲ ਦਾ ਪੁੱਤਰ 15 ਫੁੱਟ ਡੂੰਘੇ ਖੱਡੇ ‘ਚ ਡਿੱਗਿਆ, FIR ਦਰਜ
ਖੇਡਦਿਆਂ-ਖੇਡਦਿਆਂ 15 ਫੁੱਟ ਡੂੰਘੇ ਖੱਡੇ ‘ਚ ਡਿੱਗਿਆ ਕੇਂਦਰੀ ਵਿਦਿਆਲਾ ਦੇ ਡਿਪਟੀ ਪ੍ਰਿੰਸੀਪਲ ਦਾ ਪੁੱਤ; ਪੁਲਿਸ ਨੇ ਠੇਕੇਦਾਰ ਸਮੇਤ 3 ‘ਤੇ ਦਰਜ ਕੀਤੀ FIR
ਗ੍ਰੇਟਰ ਨੋਇਡਾ, 26 ਜੁਲਾਈ 2026: ਗ੍ਰੇਟਰ ਨੋਇਡਾ ਦੀ ਇੱਕ ਰਿਹਾਇਸ਼ੀ ਸੁਸਾਇਟੀ ਤੋਂ ਬਹੁਤ ਹੀ ਦੁਖਦਾਈ ਅਤੇ ਰੂਹ ਕੰਬਾਊ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ ਲਾਪਰਵਾਹੀ ਨਾਲ ਛੱਡੇ ਗਏ ਇੱਕ ਬੋਰਿੰਗ ਦੇ ਖੱਡੇ ਨੇ 6 ਸਾਲ ਦੇ ਮਾਸੂਮ ਬੱਚੇ ਦੀ ਜਾਨ ਲੈ ਲਈ। ਇਹ ਦਰਦਨਾਕ ਹਾਦਸਾ ਸ਼ਨੀਵਾਰ ਨੂੰ ਵਾਪਰਿਆ, ਜਿਸ ਤੋਂ ਬਾਅਦ ਇਲਾਕੇ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ ਅਤੇ ਸਥਾਨਕ ਲੋਕਾਂ ਵਿੱਚ ਪ੍ਰਸ਼ਾਸਨ ਤੇ ਠੇਕੇਦਾਰ ਦੀ ਲਾਪਰਵਾਹੀ ਨੂੰ ਲੈ ਕੇ ਭਾਰੀ ਰੋਸ ਦੇਖਣ ਨੂੰ ਮਿਲ ਰਿਹਾ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਹ ਹਾਦਸਾ ਗ੍ਰੇਟਰ ਨੋਇਡਾ ਦੇ ਥਾਣਾ ‘ਨਾਲੇਜ ਪਾਰਕ’ ਖੇਤਰ ਵਿੱਚ ਸਥਿਤ ‘ਕਲਾਧਾਮ ਸੁਸਾਇਟੀ’ ਦੇ ਕੋਲ ਵਾਪਰਿਆ। ਮ੍ਰਿਤਕ ਬੱਚੇ ਦੀ ਪਛਾਣ 6 ਸਾਲਾ ਅਵਿਆਨ ਸੂਰਿਆ ਵਜੋਂ ਹੋਈ ਹੈ। ਅਵਿਆਨ ਦੇ ਪਿਤਾ ਸੀਵਾਨ ਯਾਦਵ ਕੇਂਦਰੀ ਵਿਦਿਆਲਾ ਵਿੱਚ ਡਿਪਟੀ ਪ੍ਰਿੰਸੀਪਲ ਵਜੋਂ ਸੇਵਾਵਾਂ ਨਿਭਾ ਰਹੇ ਹਨ।
ਐਤਵਾਰ ਨੂੰ ਜਦੋਂ ਮੀਡੀਆ ਘਟਨਾ ਸਥਾਨ ‘ਤੇ ਪਹੁੰਚਿਆ ਤਾਂ ਉੱਥੇ ਸੜਕ ਕਿਨਾਰੇ ਬੱਚਿਆਂ ਦਾ ਕ੍ਰਿਕਟ ਬੈਟ ਅਤੇ ਵਿਕਟਾਂ ਪਈਆਂ ਹੋਈਆਂ ਸਨ, ਜੋ ਘਟਨਾ ਦੇ ਸਮੇਂ ਦੀ ਦੁਖਦ ਕਹਾਣੀ ਬਿਆਨ ਕਰ ਰਹੀਆਂ ਸਨ। ਚਸ਼ਮਦੀਦਾਂ ਅਤੇ ਸਥਾਨਕ ਲੋਕਾਂ ਨੇ ਦੱਸਿਆ ਕਿ ਅਵਿਆਨ ਹੋਰਨਾਂ ਬੱਚਿਆਂ ਨਾਲ ਸੜਕ ‘ਤੇ ਕ੍ਰਿਕਟ ਖੇਡ ਰਿਹਾ ਸੀ। ਖੇਡਦੇ-ਖੇਡਦੇ ਅਚਾਨਕ ਉਹ ਸੜਕ ਦੇ ਬਿਲਕੁਲ ਨਾਲ ਬੋਰਿੰਗ ਵਾਸਤੇ ਪੁੱਟੇ ਗਏ ਲਗਭਗ 15 ਫੁੱਟ ਡੂੰਘੇ ਖੱਡੇ ਵਿੱਚ ਜਾ ਡਿੱਗਿਆ।
ਹਾਦਸੇ ਤੋਂ ਬਾਅਦ ਤੁਰੰਤ ਬੱਚੇ ਨੂੰ ਬਾਹਰ ਕੱਢ ਕੇ ਹਸਪਤਾਲ ਪਹੁੰਚਾਇਆ ਗਿਆ, ਪਰ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਆਪਣੇ ਮਾਸੂਮ ਪੁੱਤਰ ਦੀ ਅਚਾਨਕ ਹੋਈ ਮੌਤ ਤੋਂ ਬਾਅਦ ਪਰਿਵਾਰ ‘ਤੇ ਦੁੱਖਾਂ ਦਾ ਪਹਾੜ ਟੁੱਟ ਪਿਆ ਹੈ। ਅਵਿਆਨ ਦੇ ਪਿਤਾ ਸੀਵਾਨ ਯਾਦਵ ਨੇ ਰੋਂਦੇ ਹੋਏ ਆਪਣੇ ਦਰਦ ਦਾ ਪ੍ਰਗਟਾਵਾ ਕੀਤਾ। ਉਨ੍ਹਾਂ ਕਿਹਾ, “ਅਧਿਕਾਰੀਆਂ ਅਤੇ ਠੇਕੇਦਾਰ ਦੀ ਅਣਗਹਿਲੀ ਤੇ ਲਾਪਰਵਾਹੀ ਕਾਰਨ ਮੇਰੇ ਬੱਚੇ ਦੀ ਜਾਨ ਗਈ ਹੈ। ਇਹ ਬਹੁਤ ਹੀ ਗ਼ਲਤ ਹੈ। ਜੇਕਰ ਖੱਡੇ ਨੂੰ ਢੁਕਵੇਂ ਤਰੀਕੇ ਨਾਲ ਢੱਕਿਆ ਹੁੰਦਾ ਜਾਂ ਉੱਥੇ ਸੁਰੱਖਿਆ ਦੇ ਇੰਤਜ਼ਾਮ ਕੀਤੇ ਹੁੰਦੇ, ਤਾਂ ਅੱਜ ਮੇਰਾ ਪੁੱਤ ਸਾਡੇ ਨਾਲ ਹੁੰਦਾ।”
ਇਸ ਦਰਦਨਾਕ ਹਾਦਸੇ ਦਾ ਨੋਟਿਸ ਲੈਂਦਿਆਂ ਪੁਲਿਸ ਪ੍ਰਸ਼ਾਸਨ ਹਰਕਤ ਵਿੱਚ ਆ ਗਿਆ ਹੈ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਨਾਲੇਜ ਪਾਰਕ ਥਾਣਾ ਪੁਲਿਸ ਨੇ ਕਾਰਵਾਈ ਕਰਦਿਆਂ ਬੋਰਿੰਗ ਦਾ ਕੰਮ ਕਰਵਾ ਰਹੇ ਠੇਕੇਦਾਰ ਸਮੇਤ ਤਿੰਨ ਹੋਰ ਵਿਅਕਤੀਆਂ ਖ਼ਿਲਾਫ਼ ਗੰਭੀਰ ਧਾਰਾਵਾਂ ਹੇਠ ਐਫ.ਆਈ.ਆਰ. (FIR) ਦਰਜ ਕਰ ਲਈ ਹੈ।
ਪੁਲਿਸ ਨੇ ਕਾਰਵਾਈ ਕਰਦੇ ਹੋਏ ਮੁੱਖ ਠੇਕੇਦਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ, ਜਦਕਿ ਮਾਮਲੇ ‘ਚ ਨਾਮਜ਼ਦ ਬਾਕੀ ਦੋਸ਼ੀਆਂ ਦੀ ਭਾਲ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ। ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜਨਤਕ ਥਾਂ ‘ਤੇ ਬਿਨ੍ਹਾਂ ਕਿਸੇ ਸੁਰੱਖਿਆ ਇੰਤਜ਼ਾਮ ਦੇ ਇੰਨਾ ਡੂੰਘਾ ਖੱਡਾ ਖੁੱਲ੍ਹਾ ਛੱਡਣਾ ਵੱਡੀ ਅਪਰਾਧਿਕ ਲਾਪਰਵਾਹੀ ਹੈ ਅਤੇ ਇਸ ਮਾਮਲੇ ‘ਚ ਦੋਸ਼ੀਆਂ ਵਿਰੁੱਧ ਸਖ਼ਤ ਤੋਂ ਸਖ਼ਤ ਕਾਨੂੰਨੀ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾਵੇਗੀ।
