ਵੱਡੀ ਖ਼ਬਰ: ਪੰਜਾਬ ਸਮੇਤ ਦੇਸ਼ ਭਰ ‘ਚ SBI ਬੈਂਕ 6 ਦਿਨ ਰਹਿਣਗੇ ਬੰਦ, ਪੜ੍ਹੋ ਪੂਰੀ ਖ਼ਬਰ
SBI ਗਾਹਕਾਂ ਲਈ ਅਹਿਮ ਖ਼ਬਰ: ਅੱਜ 23 ਮਈ ਤੋਂ ਲਗਾਤਾਰ 6 ਦਿਨ ਬੰਦ ਰਹਿਣਗੀਆਂ ਸਟੇਟ ਬੈਂਕ ਆਫ਼ ਇੰਡੀਆ ਦੀਆਂ ਸ਼ਾਖਾਵਾਂ, ਜਾਣੋ ਵਜ੍ਹਾ
ਹੜਤਾਲ ਅਤੇ ਛੁੱਟੀਆਂ ਕਾਰਨ 23 ਮਈ ਤੋਂ 28 ਮਈ ਤੱਕ ਬੈਂਕਾਂ ‘ਚ ਨਹੀਂ ਹੋਵੇਗਾ ਕੋਈ ਕੰਮਕਾਜ
25 ਅਤੇ 26 ਮਈ ਨੂੰ ਬੈਂਕ ਕਰਮਚਾਰੀ ਯੂਨੀਅਨ ਵੱਲੋਂ ਦੇਸ਼ ਵਿਆਪੀ ਹੜਤਾਲ ਦਾ ਸੱਦਾ
ਬੈਂਕ ਸ਼ਾਖਾਵਾਂ ਬੰਦ ਰਹਿਣ ਦੇ ਬਾਵਜੂਦ ATM, UPI, ਯੋਨੋ ਐਪ ਅਤੇ ਡਿਜੀਟਲ ਬੈਂਕਿੰਗ ਸੇਵਾਵਾਂ ਚੱਲਦੀਆਂ ਰਹਿਣਗੀਆਂ
ਨਵੀਂ ਦਿੱਲੀ/ਚੰਡੀਗੜ੍ਹ, 23 ਮਈ 2026: ਦੇਸ਼ ਦੇ ਸਭ ਤੋਂ ਵੱਡੇ ਸਰਕਾਰੀ ਬੈਂਕ ‘ਸਟੇਟ ਬੈਂਕ ਆਫ਼ ਇੰਡੀਆ’ (SBI) ਦੇ ਗਾਹਕਾਂ ਲਈ ਇੱਕ ਬਹੁਤ ਹੀ ਮਹੱਤਵਪੂਰਨ ਖ਼ਬਰ ਹੈ। ਅੱਜ 23 ਮਈ (ਸ਼ਨੀਵਾਰ) ਤੋਂ ਲੈ ਕੇ 28 ਮਈ (ਵੀਰਵਾਰ) ਤੱਕ ਲਗਾਤਾਰ 6 ਦਿਨਾਂ ਲਈ ਐਸ.ਬੀ.ਆਈ. ਦੀਆਂ ਸ਼ਾਖਾਵਾਂ ਬੰਦ ਰਹਿਣਗੀਆਂ।
ਇਸ ਲੰਮੀ ਬੰਦੀ ਕਾਰਨ ਗਾਹਕ ਬੈਂਕ ਬ੍ਰਾਂਚਾਂ ਵਿੱਚ ਜਾ ਕੇ ਪੈਸਿਆਂ ਦਾ ਲੈਣ-ਦੇਣ, ਚੈੱਕ ਕਲੀਅਰੈਂਸ ਜਾਂ ਕੋਈ ਹੋਰ ਜ਼ਰੂਰੀ ਕਾਗਜ਼ੀ ਕੰਮ ਨਹੀਂ ਕਰ ਸਕਣਗੇ। ਇਨ੍ਹਾਂ 6 ਦਿਨਾਂ ਤੋਂ ਬਾਅਦ ਹੁਣ ਬੈਂਕਾਂ ਵਿੱਚ ਨਿਯਮਿਤ ਕੰਮਕਾਜ ਸ਼ੁੱਕਰਵਾਰ, 29 ਮਈ 2026 ਨੂੰ ਦੁਬਾਰਾ ਸ਼ੁਰੂ ਹੋਵੇਗਾ।
ਜਾਣੋ 6 ਦਿਨਾਂ ਦੀ ਬੰਦੀ ਦੀ ਪੂਰੀ ਟਾਈਮਲਾਈਨ
- 23 ਮਈ (ਅੱਜ): ਮਹੀਨੇ ਦਾ ਚੌਥਾ ਸ਼ਨੀਵਾਰ (ਸਰਕਾਰੀ ਛੁੱਟੀ)
- 24 ਮਈ (ਕੱਲ੍ਹ): ਐਤਵਾਰ (ਸਪਤਾਹਿਕ ਛੁੱਟੀ)
- 25 ਮਈ (ਸੋਮਵਾਰ): ਐਸ.ਬੀ.ਆਈ. ਸਟਾਫ਼ ਫੈਡਰੇਸ਼ਨ ਦੀ ਦੇਸ਼ ਵਿਆਪੀ ਹੜਤਾਲ
- 26 ਮਈ (ਮੰਗਲਵਾਰ): ਬੈਂਕ ਕਰਮਚਾਰੀਆਂ ਦੀ ਹੜਤਾਲ ਦਾ ਦੂਜਾ ਦਿਨ
- 27 ਮਈ (ਬੁੱਧਵਾਰ): ਬਕਰੀਦ (ਈਦ-ਉਲ-ਅਜ਼ਹਾ) ਦੇ ਸਬੰਧ ਵਿੱਚ ਕਈ ਰਾਜਾਂ ਵਿੱਚ ਸਰਕਾਰੀ ਛੁੱਟੀ
- 28 ਮਈ (ਵੀਰਵਾਰ): ਬਕਰੀਦ ਤਿਉਹਾਰ ਕਾਰਨ ਲਗਾਤਾਰ ਦੂਜੇ ਦਿਨ ਕਈ ਸੂਬਿਆਂ ‘ਚ ਛੁੱਟੀ
ਕਿਉਂ ਹੋ ਰਹੀ ਹੈ 2 ਦਿਨ ਦੀ ਦੇਸ਼ ਵਿਆਪੀ ਹੜਤਾਲ?
ਦਰਅਸਲ, ‘ਆਲ ਇੰਡੀਆ ਸਟੇਟ ਬੈਂਕ ਆਫ਼ ਇੰਡੀਆ ਸਟਾਫ਼ ਫੈਡਰੇਸ਼ਨ’ (AISBISF) ਨੇ ਬੈਂਕ ਕਰਮਚਾਰੀਆਂ ਦੀਆਂ ਲੰਮੇ ਸਮੇਂ ਤੋਂ ਲਟਕਦੀਆਂ ਆ ਰਹੀਆਂ ਮੰਗਾਂ ਨੂੰ ਲੈ ਕੇ 25 ਅਤੇ 26 ਮਈ ਨੂੰ 2 ਦਿਨਾਂ ਦੀ ਹੜਤਾਲ ਦਾ ਐਲਾਨ ਕੀਤਾ ਹੈ।
ਬੈਂਕ ਯੂਨੀਅਨ ਦਾ ਦੋਸ਼ ਹੈ ਕਿ ਬੈਂਕ ਮੈਨੇਜਮੈਂਟ ਕਰਮਚਾਰੀਆਂ ਨਾਲ ਜੁੜੇ ਕਈ ਫੈਸਲੇ ਉਨ੍ਹਾਂ ਦੀ ਸਹਿਮਤੀ ਜਾਂ ਸਲਾਹ ਤੋਂ ਬਿਨਾਂ ਹੀ ਲਾਗੂ ਕਰ ਰਿਹਾ ਹੈ, ਜਿਸ ਕਾਰਨ ਕਰਮਚਾਰੀਆਂ ਵਿੱਚ ਭਾਰੀ ਰੋਸ ਹੈ। ਯੂਨੀਅਨ ਨੇ ਬੈਂਕ ਪ੍ਰਬੰਧਕਾਂ ਅੱਗੇ 16 ਮੁੱਖ ਮੰਗਾਂ ਰੱਖੀਆਂ ਹਨ।
ਇਨ੍ਹਾਂ ਵਿੱਚ ਪਿਛਲੇ ਕਈ ਸਾਲਾਂ ਤੋਂ ਖਾਲੀ ਪਏ ਸਪੋਰਟ ਸਟਾਫ਼ ਅਤੇ ਮੈਸੇਂਜਰਾਂ ਦੇ ਅਹੁਦਿਆਂ ‘ਤੇ ਨਵੀਂ ਭਰਤੀ ਕਰਨਾ, ਸੂਰਤ ਬ੍ਰਾਂਚ ਵਿੱਚ ਹੋਈ ਡਕੈਤੀ ਦੇ ਮੱਦੇਨਜ਼ਰ ਬੈਂਕਾਂ ਵਿੱਚ ਸੁਰੱਖਿਆ ਗਾਰਡਾਂ ਦੀ ਗਿਣਤੀ ਵਧਾਉਣਾ, ਨੈਸ਼ਨਲ ਪੈਨਸ਼ਨ ਸਿਸਟਮ (NPS) ਵਿੱਚ ਫੰਡ ਮੈਨੇਜਰ ਬਦਲਣ ਦੀ ਆਜ਼ਾਦੀ ਦੇਣਾ ਅਤੇ ਤਨਖਾਹਾਂ ਵਿੱਚ ਅਸਮਾਨਤਾ ਨੂੰ ਦੂਰ ਕਰਨਾ ਸ਼ਾਮਲ ਹੈ।
ਡਿਜੀਟਲ ਸੇਵਾਵਾਂ ਰਹਿਣਗੀਆਂ ਚਾਲੂ, ਗਾਹਕਾਂ ਨੂੰ ਨਹੀਂ ਹੋਵੇਗੀ ਪਰੇਸ਼ਾਨੀ
ਬੈਂਕਾਂ ਦੇ 6 ਦਿਨ ਬੰਦ ਰਹਿਣ ਦੇ ਬਾਵਜੂਦ ਗਾਹਕਾਂ ਨੂੰ ਕੈਸ਼ ਜਾਂ ਲੈਣ-ਦੇਣ ਲਈ ਪਰੇਸ਼ਾਨ ਹੋਣ ਦੀ ਲੋੜ ਨਹੀਂ ਪਵੇਗੀ। ਬੈਂਕ ਪ੍ਰਸ਼ਾਸਨ ਮੁਤਾਬਕ ਸਾਰੇ ਏ.ਟੀ.ਐਮ. (ATM) ਵਿੱਚ ਕੈਸ਼ ਦੀ ਉਪਲਬਧਤਾ ਯਕੀਨੀ ਬਣਾਈ ਜਾਵੇਗੀ।
ਇਸ ਤੋਂ ਇਲਾਵਾ ਯੂ.ਪੀ.ਆਈ. (UPI) ਟ੍ਰਾਂਜੈਕਸ਼ਨ, ਬੈਂਕ ਦੀ ‘ਯੋਨੋ’ (YONO) ਮੋਬਾਈਲ ਐਪ, ਬੈਂਕ ਪੋਰਟਲ ਅਤੇ ਕਸਟਮਰ ਸਰਵਿਸ ਪੁਆਇੰਟ (CSP) ਰਾਹੀਂ ਡਿਜੀਟਲ ਲੈਣ-ਦੇਣ ਦੀਆਂ ਸੇਵਾਵਾਂ 24 ਘੰਟੇ ਬਿਨਾਂ ਕਿਸੇ ਰੁਕਾਵਟ ਦੇ ਚਾਲੂ ਰਹਿਣਗੀਆਂ।
