ਆਂਗਣਵਾੜੀ ਹੈਲਪਰ ‘ਰਮਨਦੀਪ’ ਦੇ ਕਤਲ ਮਾਮਲੇ ‘ਚ ਨਵਾਂ ਮੋੜ; ਪਰਿਵਾਰ ਨੇ ਪੁਲਿਸ ‘ਤੇ ਲਗਾਏ ਬਿਆਨ ਤੋੜਨ-ਮਰੋੜਨ ਦੇ ਇਲਜ਼ਾਮ; ਸਰਵ ਯੂਨੀਅਨ ਦੀ ਪ੍ਰਧਾਨ ਮੈਡਮ ਛੀਨਾ ਨੇ ਇਨਸਾਫ਼ ਲਈ ਖੋਲ੍ਹਿਆ ਮੋਰਚਾ
ਲੰਬੀ 23 ਅਪ੍ਰੈਲ 2026-
ਸ੍ਰੀ ਮੁਕਤਸਰ ਸਾਹਿਬ ਦੇ ਹਲਕਾ ਲੰਬੀ ਅਧੀਨ ਪੈਂਦੇ ਪਿੰਡ ਫਤਿਹਪੁਰ ਮਣੀਆਂ ਵਾਲਾ ਵਿੱਚ ਡਿਊਟੀ ਦੌਰਾਨ ਆਂਗਣਵਾੜੀ ਹੈਲਪਰ ਰਮਨਦੀਪ ਕੌਰ ਦੇ ਹੋਏ ਵਹਿਸ਼ੀਆਨਾ ਕਤਲ ਨੇ ਪੂਰੇ ਇਲਾਕੇ ਵਿੱਚ ਦਹਿਸ਼ਤ ਅਤੇ ਰੋਸ ਦਾ ਮਾਹੌਲ ਪੈਦਾ ਕਰ ਦਿੱਤਾ ਹੈ। ਜਿੱਥੇ ਪਰਿਵਾਰ ਆਪਣੀ ਨੂੰਹ ਦੇ ਕਤਲ ਦੇ ਗ਼ਮ ਵਿੱਚ ਡੁੱਬਿਆ ਹੈ, ਉੱਥੇ ਹੀ ਪੁਲਿਸ ਵੱਲੋਂ ਮਾਮਲੇ ਨੂੰ ਕਥਿਤ ਤੌਰ ‘ਤੇ “ਪ੍ਰੇਮ ਸਬੰਧਾਂ” ਦਾ ਰੂਪ ਦੇ ਕੇ ਸੁਲਝਾਉਣ ਦੇ ਦਾਅਵਿਆਂ ਨੇ ਇੱਕ ਨਵਾਂ ਵਿਵਾਦ ਖੜ੍ਹਾ ਕਰ ਦਿੱਤਾ ਹੈ।
ਸਰਵ ਆਂਗਣਵਾੜੀ ਯੂਨੀਅਨ ਦੀ ਪ੍ਰਧਾਨ ਬਰਿੰਦਰਜੀਤ ਕੌਰ ਛੀਨਾ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ, ਬੀਤੇ ਕੱਲ੍ਹ ਰਮਨਦੀਪ ਕੌਰ ਰੋਜ਼ਾਨਾ ਵਾਂਗ ਸਵੇਰੇ 8 ਵਜੇ ਆਪਣੇ ਸੈਂਟਰ ਦੀ ਸਫਾਈ ਕਰਨ ਪਹੁੰਚੀ ਸੀ।
ਸੈਂਟਰ ਦੇ ਸਾਹਮਣੇ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਮੁਤਾਬਕ, ਇੱਕ ਅਣਪਛਾਤਾ ਨੌਜਵਾਨ 8:17 ਵਜੇ ਸੈਂਟਰ ਦੇ ਅੰਦਰ ਦਾਖ਼ਲ ਹੋਇਆ। ਉਸ ਨੇ ਅੰਦਰ ਪਈ ਲੋਹੇ ਦੀ ਰਾਡ ਨਾਲ ਰਮਨਦੀਪ ਦੇ ਸਿਰ ‘ਤੇ ਕਈ ਵਾਰ ਕੀਤੇ, ਜਿਸ ਨਾਲ ਉਸ ਦੀਆਂ ਬ੍ਰੇਨ ਦੀਆਂ ਹੱਡੀਆਂ ਤੱਕ ਫਿੱਸ ਗਈਆਂ। ਇੰਨਾ ਹੀ ਨਹੀਂ, ਕਾਤਲ ਨੇ ਬੜੀ ਬੇਰਹਿਮੀ ਨਾਲ ਬਲੇਡ ਨਾਲ ਰਮਨਦੀਪ ਦਾ ਗਲਾ ਵੱਢ ਦਿੱਤਾ। 8:26 ਵਜੇ ਕਾਤਲ ਕੰਧ ਟੱਪ ਕੇ ਫ਼ਰਾਰ ਹੋ ਗਿਆ। ਮਹਿਜ਼ 9 ਮਿੰਟਾਂ ਵਿੱਚ ਇਸ ਖ਼ੂਨੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ।
ਪੁਲਿਸ ਦੀ ਥਿਊਰੀ ‘ਤੇ ਪਰਿਵਾਰ ਦੇ ਸਵਾਲ
ਪੁਲਿਸ ਵੱਲੋਂ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਮ੍ਰਿਤਕਾ ਦੇ ਆਪਣੇ ਕਾਤਲ ਨਾਲ ਨਜਾਇਜ਼ ਸਬੰਧ ਸਨ ਅਤੇ 6 ਮਹੀਨੇ ਪਹਿਲਾਂ ਉਸ ਦੇ ਪਤੀ ਨੇ ਇਸ ਸਬੰਧੀ ਸ਼ਿਕਾਇਤ ਦਿੱਤੀ ਸੀ। ਪਰ ਰਮਨਦੀਪ ਦੇ ਪਤੀ ਅਤੇ ਸਹੁਰਾ ਪਰਿਵਾਰ ਨੇ ਇਨ੍ਹਾਂ ਦੋਸ਼ਾਂ ਨੂੰ ਸਿਰੇ ਤੋਂ ਨਕਾਰ ਦਿੱਤਾ ਹੈ।
ਮੈਡਮ ਛੀਨਾ ਮੁਤਾਬਿਕ ਜਦੋਂ ਉਹ ਅੱਜ ਰਮਨਦੀਪ ਕੌਰ ਦੇ ਘਰ ਪਹੁੰਚੇ ਤਾਂ, ਉੱਥੇ ਮੌਜੂਦ ਰਮਨਦੀਪ ਦੇ ਪਤੀ ਨੇ ਕਿਹਾ ਕਿ, “ਮੈਂ ਕਦੇ ਕੋਈ ਸ਼ਿਕਾਇਤ ਨਹੀਂ ਦਿੱਤੀ। ਪੁਲਿਸ ਮੇਰੇ ਬਿਆਨਾਂ ਨੂੰ ਤੋੜ-ਮਰੋੜ ਕੇ ਪੇਸ਼ ਕਰ ਰਹੀ ਹੈ। ਜੇਕਰ ਮੇਰੀ ਪਤਨੀ ਮਾੜੀ ਹੁੰਦੀ ਤਾਂ ਮੈਂ ਉਸ ਨੂੰ ਪਹਿਲਾਂ ਹੀ ਘਰੋਂ ਕੱਢ ਦਿੰਦਾ ਜਾਂ ਕਾਰਵਾਈ ਕਰਦਾ।” ਮੈਡਮ ਛੀਨਾ ਮੁਤਾਬਿਕ, ਸਾਰਾ ਪਿੰਡ ਅਤੇ ਸਹੁਰਾ ਪਰਿਵਾਰ ਰਮਨਦੀਪ ਦੇ ਚਰਿੱਤਰ ਦੀ ਸਿਫ਼ਤ ਕਰ ਰਿਹਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਪੁਲਿਸ ਇੱਕ ਮਰੀ ਹੋਈ ਔਰਤ ਦੇ ਚਰਿੱਤਰ ‘ਤੇ ਦਾਗ ਲਗਾ ਕੇ ਅਸਲ ਸਾਜ਼ਿਸ਼ ਨੂੰ ਛੁਪਾ ਰਹੀ ਹੈ।
ਮੈਡਮ ਛੀਨਾ ਨੇ ਕਿਹਾ ਕਿ, ਪਰਿਵਾਰ ਨੇ ਮਾਮਲੇ ਵਿੱਚ ਰਮਨਦੀਪ ਦੀ ਇੱਕ ਸਹੇਲੀ ਦੇ ਰੋਲ ‘ਤੇ ਸ਼ੱਕ ਜਤਾਇਆ ਹੈ। ਇਸ ਤੋਂ ਇਲਾਵਾ, ਕਾਤਲ ਨੇ ਪਿੰਡ ਵਿੱਚ ਕਈ ਲੋਕਾਂ ਤੋਂ ਸੈਂਟਰ ਦਾ ਰਾਹ ਪੁੱਛਿਆ ਸੀ, ਜੋ ਕਿ ਕਿਸੇ ਵੱਡੀ ‘ਰੇਕੀ’ ਵੱਲ ਇਸ਼ਾਰਾ ਕਰਦਾ ਹੈ।
ਸਰਵ ਆਂਗਣਵਾੜੀ ਯੂਨੀਅਨ ਦੀ ਪ੍ਰਧਾਨ ਬਰਿੰਦਰਜੀਤ ਕੌਰ ਛੀਨਾ ਨੇ ਇਸ ਘਟਨਾ ਦੀ ਸਖ਼ਤ ਨਿਖੇਧੀ ਕਰਦਿਆਂ ਮੰਗ ਕੀਤੀ ਕਿ, ਕਤਲ ਦੀ ਗੁੱਥੀ ਨੂੰ ਸੁਲਝਾਇਆ ਜਾਵੇ ਅਤੇ ਚਰਿੱਤਰ ‘ਤੇ ਦਾਗ ਲਗਾਉਣ ਦੀ ਬਜਾਏ ਅਸਲ ਕਾਰਨ ਪਤਾ ਕੀਤੇ ਜਾਣ। ਰਮਨਦੀਪ ‘ਆਨ-ਡਿਊਟੀ’ ਸੀ, ਇਸ ਲਈ ਉਸਦੇ ਪਤੀ ਨੂੰ ਸਰਕਾਰੀ ਨੌਕਰੀ ਅਤੇ ਪਰਿਵਾਰ ਨੂੰ ਆਰਥਿਕ ਸਹਾਇਤਾ ਦਿੱਤੀ ਜਾਵੇ। ਮ੍ਰਿਤਕਾ ਆਪਣੇ ਪਿੱਛੇ 7 ਸਾਲ ਦੀ ਬੇਟੀ ਅਤੇ 5 ਸਾਲ ਦਾ ਬੇਟਾ ਛੱਡ ਗਈ ਹੈ, ਜਿਨ੍ਹਾਂ ਦੇ ਭਵਿੱਖ ਦੀ ਜ਼ਿੰਮੇਵਾਰੀ ਸਰਕਾਰ ਚੁੱਕੇ।
ਮੈਡਮ ਛੀਨਾ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਸਰਕਾਰ ਅਤੇ ਪੁਲਿਸ ਨੇ ਇਨਸਾਫ਼ ਨਾ ਦਿੱਤਾ ਅਤੇ ਪਰਿਵਾਰ ਦੀਆਂ ਮੰਗਾਂ ਨਾ ਮੰਨੀਆਂ, ਤਾਂ ਜਥੇਬੰਦੀ ਵੱਲੋਂ ਤਿੱਖਾ ਸੰਘਰਸ਼ ਵਿੱਢਿਆ ਜਾਵੇਗਾ ਅਤੇ ਸਰਕਾਰ ਦੇ ਖ਼ਿਲਾਫ਼ ਮੋਰਚਾ ਖੋਲ੍ਹਿਆ ਜਾਵੇਗਾ।
